Цуврал 5.
   
    Монголын эдийн засгийн хөгжлийн яам гэж сайн, муу хоёрын туйл болсон газар болов. Учир нь Эдийн засгийн хөгжлийн сайд Н.Батбаяр үргэлж сайн юм ярьдаг нэгэн. Муу юм ярьсан хүмүүсийг загнаж зэмлэж зөвхөн “сайн л юм ярь” гэж тулгадаг. Харин Эдийн засгийн хөгжлийн дэд сайд О.Чулуунбат бол Н.Батбаярын нөгөө туйл. Түүний амнаас улс орны хөгжлийн талаар ганц ч удаа сайн үг гараагүй. Дандаа муу үг хэлж, муу юм ярьж Засгийн газраа шүүмжилдэг болов. Тэгээд энэ ажлаа улс орны бодит байдал хэмээн тайлбарладаг.

    Өөрөөр хэлбэл ард түмэн Эдийн засгийн хөгжлийн хоёр сайдын хэн нь үнэн, хэн нь эрх ашгийнхаа төлөө худлаа яриад байгааг ойлгоход төвөгтэй болов. Тэдний энэ үл ойлгогдом байдал яамны хамт олноос хальж Засгийн газрын хуралдаан, шаргал ордонд хүртэл үргэлжлэх болжээ. Учир нь Эдийн засгийн хөгжлийн яамны сайдын зөвлөлийн хурлаас эхлээд л бусад хуралдаанууд дээр хоёр сайд илэрхий зөрүүтэй мэдээллийг урьд урьдаасаа харж байгаад хийдэг болсон гэж эх сурвалж мэдээлэв. Тэгээд яамны ажилчид нь хоёр сайдынхаа хэнийх нь талд орохоо мэдэхээ больдог аж. Ийм байдал нь Засгийн газрын хуралдаан дээр ч ажиглагддаг болж.

    Нөхцөл байдал ингэж хүндрэх болсон тул Эдийн засгийн хөгжлийн хоёр сайдын хэн нэгнийг нь огцруулж байж асуудал горминдоо орно гэдэг дээр Засгийн тэргүүн нэгджээ. Тиймээс Н.Батбаяр дэд сайдыгаа огцруулахаар Засгийн газрынхаа гишүүдтэй ярьж эхэлжээ. Харин Засгийн тэргүүн наад асуудлаа Засгийн гишүүдтэй биш МАХН-ынхантай ойлголцож байж шийдвэрлэх ёстойг сануулжээ. Тэгээд Н.Батбаяр шадар сайд Д.Тэрбишдагватай ойлголцох гэж хэд хэд оролдсон сураг гарав. Харин Хууль зүйн дэд сайдаа огцруулж байгаа МАХН-ынхан дахин нэг дэд сайдаа тавьж туухыг хүсээгүй гэнэ.

    Н.Батбаяр ингэж Засгийн газраа муулах болсон дэд сайдаа огцруулах гэж хөөцөлдөж байх хойгуур нь О.Чулуунбат ч зүгээр суугаагүй. О.Чулуунбат эдийн засгийн нөхцөл байдлыг илэрхий худлаа ярьж байгаа, улс орны эдийн засаг хүндэрч байгаа нь Н.Батбаяртай шууд холбоотой гэсэн байр сууринаасаа буцаагүй аж. Тиймээс хуучин МАН-ын гишүүдтэйгээ уулзаж Н.Батбаярыг огцруулахгүйгээр эдийн засаг хэзээ ч сайжрахгүй гэж ухуулж яваа сураг гарав. Бас АН-ын зарим гишүүдтэй ч энэ асуудлаар санал солилцох болжээ.

    Өөрөөр хэлбэл эдийн засгаа сүйрүүлсэн Эдийн засгийн хөгжлийн хоёр сайд бие биеэ огцруулах их аянд гарлаа. Хэн нэгэн нь санасандаа хүрч нөгөөгөөрөө туг тахиж байж асуудал шийдэгдэж мэдэх юм. Харин тэдний зөрчлийг улс төрийн хүчнүүд зорилгодоо ашиглавал Засгийн газрын хувь заяанд асуудал үүсэх магадлал бий болов.

    Өмнө Хууль зүйн сайд Х.Тэмүүжин дэд сайд Э.Эрдэнэжамьянтайгаа муудалцсаар байгаад огцруулаад авсан. Харин одоо Эдийн засгийн хөгжлийн сайд Н.Батбаяр дэд сайдыгаа огцруулах гэж эрмэлзэж байна. Мөн Эрүүл мэндийн сайд Н.Удвал дэд сайд Ж.Амарсанаатайгаан тун түнжин муутайг үйл явдлууд нотлох болсон. Энэ байдлыг дүгнэж үзвэл засагт хамтарсан АН-ынхан МАХН-ынхантайгаа бүхий л түвшинд зөрчилдөж эхлэв.

    Ийнхүү Засгийн газрын гишүүдийн хоорондын харилцаа Засгийн газраа хүндрүүлсээр байна.