Хуваарийн дагуу өнөөдөр  МАН-ын бүлэг хуралдаж энэ долоо хоногт УИХ, Байнгын хороогоор хэлэлцэгдэх асуудлуудын талаар хэлэлцжээ. Өнөөдрийн хуралдаанаар МАН-ын бүлэг гурван үндсэн асуудлыг хэлэлцсэний хамгийн чухал нь нийгэм, эдийн засгийн өнөөгийн нөхцөл байдалтай холбоотой асуудал байсан гэдгийг тус бүлгийн дарга С.Бямбацогт онцоллоо. Мөн өнөөдрийн хуралдаанаар “Давхар дээл”-ийг дан болгох хуулийн төсөл, Авлигажсан төсөв буюу төсөвт өртөг нь нэмэгдсэн гэх шалтгаанаар царцаагаад буй 234 барилгын аудитын шалгалтын дүнтэй танилцсан байна.

МАН-ын бүлгийн өнөөдрийн хуралдаанаар эдийн засгийн өнөөгийн нөхцөл байдлын талаар хэлэлцээд эдийн засаг хямарсан гэсэн дүгнэлтэд хүрсэн байна. Өнөөдөр Эдийн засгийн хөгжлийн саяд Н.Батбаяр эдийн засгийн хөгжлийг эрчимжүүлэх тогтоолын төслийг УИХ-д өргөн барьсан. Гэтэл бодит байдал дээр эдийн засгийг цааш эрчимжүүлэх бус уналтанд орж буй байдлыг зогсоох аргыг бодож олох ёстой гэж тус намын бүлгээс үзэж байгаа аж. Мөн ард иргэдийн амьдралыг хэрхэн сайжруулах вэ, ажилгүйдлийг яаж нэмэгдэлүүлэхгүй байхав, ядуурлыг хэрхэн бууруулах вэ гэдэг асуудлыг ярих ёстой гэлээ. С.Бямбацогт энэ үеэр "Нэг жилийн дотор бүртгэлтэй ажилгүйчүүдийн тоо 20 хувиар нэмэгдсэн. 2012 онд ядуурлын төвшин 27 хувьтай байсан бол одоо 40 хувь руу дөхөж байна. Иргэдийн бодит орлого нэмэгдээгүй, нийгэмд баян хоосны ялгаа улам ихэсч, орлогын тэгш бус байдал газар авч, эдийн засаг хямралт байдал руу шилжлээ" гэв. Тиймээс эдийн засгийн хямралыг даван туулах гарц шийдлүүдийг эрх баригчдад санал болгож, улс орны эдийн засгийг хямралд хүргэсэн Засгийн газарт хариуцлага тооцож ажиллах ёстой гэж гишүүд байр сууриа илэрхийллээ.


Ерөнхийлөгч Ц.Элбэгдорж бүрэн эрхийнхээ хүрээнд Засгийн газрын гишүүн УИХ-ын гишүүнээр давхар ажиллахгүй байх хуулийн төслийг санаачлан боловсруулсан. Уг хуулийн төслийг намрын чуулганы хуралдаанаар хэлэлцэх үеэр АН-ын бүлэг завсарлага авсан. ҮУг хуулийг төслийг хэлэлцэхгүй, цаг хожихын тулд АН-ын бүлэг завсарлага авч, намрын чуулганыг цагаас нь өмнө завсарлуулсан гэж МАН-ын бүлгийн дарга С.Бямбацогт хэллээ. УИХ-ын дарга З.Энхболд тус хуулийн төслийг энэ долоо хоногт хамгийн эхэнд хэлэлцэнэ гэж хэлсэн. Энэ дагуу ирэх пүрэв гаригт уг асуудлыг хамгийн эхэнд хэлэлцэх ёстой гэж МАН-ын бүлгийн гишүүд үзэж байгаа аж. Хэрвээ "Давхар дээл"-ийг дан болгох хуулийн төслийг хойшлуулбал хууль зөрчсөн асуудал болно. УИХ-ын дарга уг асуудлыг хойшлуулбал түүнтэй хариуцлагын асуудлыг ярина гэв. Мөн уг хуулийн төслийг хэлэлцэх үеэр Засгийн газрын 17 сайд оролцох ёсгүй. Учир нь сонирхлын зөрчил үүснэ. МАН-ын бүлгээс дээрх 17 сайдад уг асуудлыг хэлэлцэх үеэр хуралдаанд сайн дураараа оролцохгүй байх шаардлагыг хүргүүлгэхээр болжээ.

Үүний зэрэгцээ МАН-ын бүлэг "давхар дээл"-ийг дан болгох хуулийн төслийг 2014 оны долдугаар сарын 1-нээс эхлэн мөрдөх ёстой гэсэн байр суурьтай байна. "Хэрэв хуулийг 2016 оноос эхэлж мөрдүүлнэ гэвэл хуулийн ач холбогдол нь буурна", "2016 оноос эхэлж мөрдөх юм бол одоо хэлэлцэх шаардлагагүй", "Хуулийг хоёр жилийн дараа хэрэгжүүлнэ гэж батлах нь буруу", "Ухаалаг төрийн тухай өнөөдөр ярих мөртлөө давхар дээлээ дараа тайлна гэх нь ард түмнийг басамжилж байгаа хэрэг" гэх мэтээр бүлгийн гишүүд байр сууриа илэрхийллээ.


   МАН-ын бүлгийн хуралдаанаар Монгол Улсын 2014 оны төсвийн тухай хуульд “0” дүнтэй тусгагдсан 243 төсөл арга хэмжээний төсөвт өртөг нэмэгдсэн, гүйцэтгэл удааширсан шалтгааныг нарийвчлан тогтоосон талаарх Үндэсний аудитын газрын дүгнэлтийг авч хэлэлцлээ. Дүгнэлттэй холбогдуулан Монгол Улсын ерөнхий аудитор А.Зангад бүлгийн гишүүдийн асуултад хариулав. Тэрээр 2014 оны төсөв авлигажсан эсэх, 243 объектын хэдийнх нь төсөвт өртөг хэтэрсэн бэ гэж асуусан бүлгийн гишүүдийн асуултад тодорхой хариулт өгч чадсангүй. Өөрөөр хэлбэл, энэ оны төсөвт "0" дүнтэй тусгагдсан 243 объект авлигажсан эсэхийг Үндэсний аудитын газар нотолж чадаагүй бөгөөд үүнийг нотлох боломжгүй гэдгээ ч ерөнхий аудитор А.Зангад энэ үеэр хүлээн зөвшөөрөв.

  Үндэсний аудитын газарт царцсан объект, төсөл, арга хэмжээний төсөвт өртөг удааширсан, нэмэгдсэн шалтгааныг тогтоох үүргийг УИХ-аас өгсөн. Гэтэл тус байгууллага тухайн объектуудыг ангилж, заримыг нь энэ жил, заримыг нь ирэх жил, заримыг нь битгий санхүүжүүл, зориулалтыг өөрчилж худалд гэх мэтээр хуулиар олгосон эрх мэдлээс нь хэтэрсэн дүгнэлт гаргах ёсгүй гэж гишүүд үзлээ. Хуульд заасны дагуу Засгийн газар энэ талаар саналаа оруулж ирсний дараа УИХ аль объектыг хойшлуулахаа мэдэх ёстой гэж гишүүд байр сууриа илэрхийлэв. Тиймээс Үндэсний аудитын газар авлигажсан төсвийг илрүүлэх УИХ-аас даалгасан үүргийг бүрэн биелүүлж чадсангүй гэж МАН-ын бүлгийн гишүүд дүгнэв. Иймд Ерөнхий сайд Н.Алтанхуягийг "авлигажсан төсөв" гэдэг үгээ буцаах, эдгээр объект авлигажсан эсэхийг Авлигатай тэмцэх газраар шалгуулахыг шаардлаа. 2014 төсвийн төслийг хэлэлцэх үед Д.Оюунхорол гишүүнээр ахлуулсан бүлгийн ажлын хэсэг төсвийн тодотголыг хариуцан ажиллах юм.