Хаврын чуулган эхлэхтэй зэрэгцэн өчигдөр Чингисийн талбайд Иргэний нийгмийн байгууллагынхан сүр дуулиантай жагсав.

 Иргэний нийгмийн 109 байгууллагаас бүрдсэн жагсагчид “Монголдоо сайхан амьдармаар байна” уриан дор жагсаж, Засгийн газрын сайд нараас “Давхар дээлээ” тайлахыг шаардан тэрүүхэн тэндээ улс төр хийгээд авлаа. Мөн ураны асуудлаар дуугарч, Урт нэртэй хуулийг өөрчлөхийг эсэргүүцэхээ илэрхийлсэн юм. Гэхдээ тус жагсаал эхнээсээ дуусах хүртлээ зохион байгуулалтгүй, замбараагүй болж өнгөрсөн гэдгийг хамгийн эхэнд дурдъя. Тэднийг харсан хүмүүс Чингисийн талбайд хонь, хурга нийлээ юу гэхээр юм ярив.

“Гал үндэстэн” холбооноос эхлээд мэргэжлийн бокс, дэлхийн залуучуудын холбооны гишүүд гээд 109 газраас ирсэн янз бүрийн хүмүүс сүүлдээ “Чи аль байгууллагынх бэ”, “Би нөхдөө олдоггүй ээ”, “Би тэр холбооных” зэргийн юм ярьж, төөрч будилж харагдана лээ. Мэдээж клуб, холбоогоо төлөөлөөд хүн бүр индэр дээрээс үг хэлчих санаатай микропон булаалцалдана. Энэ нь сүүлдээ хэрүүл болж “Чи яагаад намайг үг хэлүүлдэггүй юм” зэргээр муудалцацгаана. Сүүлдээ тэдний хэрүүл чанга яригчаар сонсогдож, юун яасан "Монголдоо сайхан амьдрах" болов. Жагсаал сонирхож яваа зарим хүмүүст тэд уриалга, шийдэл санаа хүргэхээсээ илүү хошин шог үзүүлж орхисон гэж хэлэхэд илүүдэхгүй биз.

Ямартай ч хөл, толгой нь олдохгүй, хэн, хаана юу яриад буй нь тодорхойгүй дор бүрнээ орилж, чарласан замбараагүй жагсаалаар энэ хаврын улс төр эхэллээ.

Гэхдээ тэдний улс төр нэг их хол явахгүй нь тодорхой юм. Ядаж тэд Ж.Батзандан, О.Магнай, Г.Уянга эгч нарынхаа жагсаал хийх арга барилаас суралцаагүй бололтой.

Ж.Батзандан, О.Магнай нар “Эрүүл нийгэм-Иргэний хөдөлгөөн”-ний нэрээр тэртээ 10 жилийн өмнө өвлийн хүйтэн, хаврын хавсаргыг сөрж жагсаж байлаа.  Тэд эх орон, газар шороо, ард түмний нэрээр жагсч, тэмцэж явсан ч үнэн хэрэгтээ тэдний жагсаал цуглаан АН-ыг томорч, эрх мэдэлд хүргэхэд л ихээхэн нөлөөлсөн байх. Тухайн үед Ж.Батзандан, О.Магнай нар М.Энхболдын Засгийн газрыг огцруулах, эрх баригчдын үйл ажиллагааг буруутгах гэх мэт АН-ын улс төрийн ажилд их дэмжлэг үзүүлж байсан юм.

Энэ хэрээр өнөөдөр АН ч томорч, жагсагчид ч албан тушаалд очжээ.  С.Ганбаатар, Ж.Батзандан, Г.Уянга, Л.Цог тэргүүтэй хүмүүс саарал ордонд заларсан бол О.Магнай ШӨХТГ-ын дарга болсон байна. Эднээс хойш иргэний нийгмийн байгууллагынханы жагсаал, цуглаан хэнд ч сонин биш болсон. Нэр хүнд нь навс унасан иргэний нийгмийнхэний гудамжины улс төр нэг хэсэгтээ нам, гүм байсан ч харин энэ хавраас нилээн идэвхжүүлнэ хэмээн тэд өөрсдөө ярьж явна. 

Эдийн засаг хямарч, улс төрчид учраа олохоо байсан энэ цаг Иргэний нийгэмийнхэний хувьд мэдээж сайхан далим. Монголын улс төрд шийдэж чадахгүй асуудал олон болж эрх баригч, сөрөг хүчнээрээ талцаж хуваагдахийн хэрээр улс төр гудамжинд гардаг гэдгийг Иргэний нийгмийнхэн харуулж байна. Өнөөдөр Иргэний хөдөлгөөнийхөн жагсаж байна. Удахгүй Г.Уянга гишүүн сандалтай суулт зохион байгуулна. Мөн төд удалгүй МАН-ынхан тайван жагсана. Энэ бүхэн бол шийдвэр гаргах түвшний хүмүүс ширээний хойно суугаад асуудлаа шийдэж чадахгүй байгаагийн илрэл. Эрх баригчид нь ажлаа хийж чадахгүй мөн сөрөг хүчин, сөрөг хүчин шиг байж чадахгүйгээс болж бүх асуудлууд гудамжинд гарч байгаа нь өчигдрийн жагсаалаас илхэн харагдаж байна.