Долларын ханш өсч, эдийн засаг хямрахтай зэрэгцэн загас мэт аниргүй болсон хүн бол Н.Батбаяр сайд.  Түүнийг төгрөгийн ханш, эдийн засгийн хямралд огт буруугүй болохыг бид ойлгох ёстой. 2014 оны  төсвийг батлахдаа долларыг ямар үндэслэлээр 1384 төгрөгөөр бодож оруулсан бэ? гэх иргэдийн асуултанд “ийм боломж байсан ч УИХ нэмж бонд гаргах асуудлыг батлаагүй.  Бонд гаргаж гаднаас их хэмжээний доллар оруулж ирээд төгрөгийн ханшийг тогтвортой барих байсан” гэж хариулсан билээ. Гүндүүгүй Монгол эр хүний шударга хариулт. “Өр тавиад аргацаах байсан юм. Даанч УИХ өр тавиулаагүй” гэж хээвнэг хариулж байгаа сайд маань ер нь биднийг хөгжүүлэх биш хөгжөөх үүрэгтэй хүн гэдгийг ингэж л мэдэж авсан даа. Төгрөгийн ханш юунаас болж суларсаныг эдийн засагчид бүгд тайлбарлаж байгаа. Ихэнхи нь төрийн үйл ажиллагаатай холбогдоно. Үүнд хариуцлага хүлээдэг хүнийг хайх хэрэггүй. Ер нь буруутай хүн байхгүй. Сайд бүр буруугүй. Мөнгөний ханш унаж, эдийн засаг уруудаа л биз. Ингэлээ гээд сайн сайхан юм бодоод л явж байх ёстойгоос хойно. Үнэтэй шаазангаа газар савж хагалаад өөр нэгийг нэхээд уйлдаг буруу эрхэлсэн хүүхэд шиг сайдынхаа толгойг "эвий эвий" гээд элээд л өнгөрөх ёстой. Шаазан өгч хагалуулаагүй эцэг эхийнх нь буруу юм шүү дээ.

Ерөнхий сайд асан Д.Бямбасүрэнгийн хэлж байгаагаар валютын ханшийг тогтооно гэхээс эргэж буулгадаггүй гэнэ. Одоо 1800 төгрөг дээр тогтох уу? Үгүй юу? гэдэг нь эргэлзээтэй гэж хашир буурай хэлж байна. Ингэж эдийн засгийн асуудлаар хариуцлага хүлээдэггүй эдийн засгийн яамтай яваа ч ядаж сайд маань ард түмнийхээ төлөө дээд тэнгэртэй холбогдож, галаа тахиад байдаг нь яамай даа. Үүний араас зам, тээвэр хариуцдаггүй зам тээврийн сайдтай боллоо бид.

Төмөр замын гэх мянгуужингийн үлгэр 2008 оноос хойш 6 жил яригдаж байна. “Төрийн төмөр зам эх оронч, хувийнх бол урвагч” гэсэн томьёогоор Х.Баттулга сайд байхдаа эхлүүлсэн энэ бантанг түүний үнэнч “албат” А.Гансүх үргэлжлүүлэн хутгасан. Хувийн компани өөрийнхөө хөрөнгөөр байгуулж байсан төмөр замыг зогсоогоод улсаас 80 гаруй тэрбум төгрөг гарлагдаж нөхөн олговор өгсөн. Овоолсон шороог нь худалдаж авчихаад одоо хүртэл царигаа шийдэж чадаагүй яваа нь яалтчгүй тус салбарынханы бодлогын алдаа, хариуцлаггүй байдал. Одоо харин мөрөөрөө явж байсан хувийн ажлыг нурааж, мөрөөдлөөс цааш ашиг дагуулахгүй төлөвлөгөө гаргаад түүнд нь санхүүжилт өгөөгүй хөгжлийн банк төмөр зам өдий хүртэл босоогүйн гол буруутан болох гэнэ. А.Гансүх сайдын хэлж байгаагаар хөгжлийн банк санхүүжилт өгөөгүйгээс болж төмөр зам зогсоод байна. Харин хувийн хэвшлийн хөрөнгө оруулалттай төмөр замыг яагаад зогсоов? Өөрсдөө чадахгүй юм бол өрөөлд гай тарих ямар хэрэг байв? Зэрэг асуудал урган гарч байгаа ч “үүнээс цааш улсын нууц чишшшш” гэх сайдын мэргэн тайлбарт таглуулна. Цаашлаад энэ жил хэчнээн аймаг авто замд холбогдох вэ? гэсэн сэтгүүлчийн асуултанд “Түүнийг эдийн засгийн хөгжлийн яамнаас асуугаарай, эрхийг нь тэнд өгчихсөн би мэдэхгүй шүү” гэж цагаарав. Ийнхүү сайд А.Гансүх маань ч салбарынхаа хүрээнд хүлээх хариуцлаггүй боллоо.

Энэ жишгээр бол шүлхий гарсан нь салхины буруу, утаа их нь өвлийн буруу, Монголын эдийн засаг хямарсан нь Хятадын буруу юм байна. Салбарт нь өөдөлж боссон ажил дээр тууз хайчлах нь сайд хүний үүрэг болохоос, саар муу юмыг шийдэх нь үүрэг биш аж. Бусадруугаа бухаад л байхад будилж, манараад хариуцлага гэдгийг ард түмэн мартах нигуртай ажээ. Булхайгаа бултуулах хамт олонтой хүн ийм л сайхан.

                                                                                                                                                                                            Цагариг