УИХ дахь МАХН-МҮАН-ын "Шудрага ёс" эвслийн бүлгээс хэвлэлийнхэнд мэдээлэл хийлээ. Тус бүлэг өчигдөр хуралдаж үндсэн дөрвөн асуудлыг хэлэлцсэн байна. Улс орны эдийн засгийн өнөөгий нөхцөл байдалтай холбогдуулан Ерөнхий сайд Н.Алтанхуяг, "Монгол банк"-ны ерөнхийлөгч Х.Золжаргал, Уул уурхайн сайд Д.Ганхуяг нарыг бүлгийн хуралдаа суулган дэлгэрэнгүй мэдээлэл авсан байна. "Шудрага ёс" эвслийн бүлгээс эдийн засгийг хямарсан гэж үзэж буй тул Засгийн газарт үүрэг чиглэл өгч, яаралтай арга хэмжээ авахыг даалгажээ.

Тус бүлгээс эдийн засагт үнэлэлт, дүгнэлт өгсөн байр сууриа маргааш албан бичгээр гаргаж хэвлэлээр дамжуулан олон нийтэд хүргэнэ гэлээ. Мөн Оюутолгойн далд уурхайн санхүүжилттэй холбоотой асуудлаар бүлгийн гишүүд санал бодлоо илэрхийлжээ. Ингээд уг асуудалд нягт, хянамгай хандах ёстой гэж тус бүлгээс үзсэн байна. Тиймээс "Шудрага ёс" эвслийн бүлгийн гишүүд ойрын хугацаанд Оюутолгой уурхайд  өөрсдийн биеэр ажиллахаар болсон байна.

Бүлгийн хуралдаанаар хэлэлцсэн бас нэгэн асуудал нь "Давхар дээл"-ийг дан болгох хуулийн төсөл аж. "Шудрага ёс" эвслийн бүлгийн зүгээс Ерөнхийлөгчийн санаачилсан уг хуулийн төслийг дэмжинэ гэдэг байр сууринд дахин нэгдсэн байна. Энэ хуулийг хэлэлцэж, батлах ёстой гэж тус бүлгийн дарга Н.Батцэрэг хэллээ.

Мөн УИХ-ын гишүүн О.Баасанхүү Хууль зүйн сайд Х.Тэмүүжинг огцруулах тогтоолын төслийг энэ долоо хоногт өргөн барьсан. Уг асуудлаар маргааш "Шудрага ёс" эвслийн бүлэг хуралдаж, тодорхой шийдвэр гаргахаар болжээ.