Сайд нарыг “давхар дээл”-ээ хэзээ тайлах бол гэсэн хүлээлт сүүлийн үед олны дунд бий болоод байна. Ерөнхийлөгч Ц.Элбэгдорж бүрэн эрхийнхээ хүрээнд Засгийн газрын гишүүн УИХ-ын гишүүнээр давхар ажиллахгүй байх хуулийн төслийг санаачлан боловсруулсан. Харин дэмжигдэх үгүй нь энэ долоо хоногийн чуулганы хуралдаанаар шийдвэрлэгдэж магадгүй. Магадгүй гэж буйн учир нь уг хуулийн төслийг УИХ-ын дарга З.Энхболд хэлэлцэх асуудлуудаас хасчих магадлал хамгийн өндөр байгаа гэнэ. Хэрвээ УИХ-ын дарга уг асуудлыг хасвал намынхаа эрх ашгийн өмнөөс хууль зөрчсөн гэх хэрэгт унаж, маш том асуудлыг араасаа дагуулах нь тодорхой болно.

    Харин эсрэгээрээ тус хууль батлагдвал УИХ, Засгийн газрын гишүүний ажлыг хавсран хийж байгаа 17 сайдын олонхи нь огцрох аюултай тулгарна.  Тэгэхээр Шинэчлэлийн Засгийн газрын хувь заяа хэцүүдэнэ гэсэн үг. Тиймээс Ерөнхий сайд Н.Алтанхуяг Ерөнхийлөгчөөс аврал эрж, хуулийн төслөө эргүүлэн татахыг гуйсан гэдэг. Харин Ц.Элбэгдорж “Энэ асуудал улс эх орны эрх ашигтай холбоотой” гээд халгаагаагүй байна. Ямартай ч  Ерөнхийлөгч энэ үйлдлээрээ давхар дээлтэй сайд нарыг дэмжихгүй гэдгээ илэрхийллээ. Харин УИХ-ын дарга З.Энхболд давхар алба хашиж буй сайд нарын талаар ямар байр суурь илэрхийлэх нь үнэхээр сонин байна. 

    Тэрбээр уг асуудлыг хаврын чуулганаар хамгийн эхэнд хэлэлцэнэ гэж МАН-ын бүлэгт амалжээ. Тиймээс хэлсэн амандаа хүрч уг асуудлыг энэ долоо хоногт хэлэлцэх ёстой гэж МАН-ын бүлгээс үзэж байгаа юм. Харин хэлэлцэх асуудлаас хасвал түүнтэй хариуцлага ярина хэмээн сөрөг хүчний зүгээс мэдэгдээд байгаа. Үүнээс гадна олны дунд маргаан үүсгээд буй бас нэгэн зүйл нь уг хуулийн талаар санал асуулга явуулахад Засгийн газрын 17 сайд оролцох ёстой, ёсгүй гэсэн асуудал. Хэрвээ тэд санал өгч кноп дарвал ашиг сонирхлын зөрчил болно гэж сөрөг хүчин үзэж байгаа. Хэдийгээр УИХ-ын дарга З.Энхболд “Би сайд нарт ашиг сонирхолын хуулийг сануулна. Сайд нар саналаа өгөх эсэх нь тэдний ухамсарын асуудал. Ер нь ашиг сонирхлын хуулийн дагуу гишүүн өөрөө ийм нөхцөл үүссэн үгүй гэдгийг сайн дураараа шийдэх эрхтэй” гэж буй ч сайд нарыг чуулганы хуралдаанаас “хөөж” гаргах хэрэгтэй гэж үзэх гишүүд цөөнгүй байгаа юм. Учир нь Дээд боловсролын санхүүжилт, суралцагчдын нийгмийн баталгааны тухай хуулийг хэлэлцэх үеэр УИХ-ын гишүүн Д.Оюунхорол, Б.Бат-Эрдэнэ нарыг ашиг сонирхолын зөрчилтэй гэж чуулганы хуралдаанаас гаргаж байсан. Тэгэхээр энэ удаа "давхар дээл"-ийг тайлах асуудлаар сайдуудыг "хөөж" гаргахгүй бол УИХ-ын дарга гишүүддээ ялгавартай ханддаг гэж хэлүүлэхээс гадна өөрөө эвгүй байдалд орох янзтай байгаа юм.

    Ер нь УИХ-ын дарга З.Энхболдыг сүүлийн үед хаданд хавчуулагдсан халиуны зулзага шиг хөөрхийлөлтэй байдалтай байгаа гэж улс төрийн хүрээнийхэн ярьж байна. Учир нь түүнд “давхар дээл”-ийг дан болгох хуулийн төслийг аль болох хойшлуулж хэлэлцүүлэхгүй байх шахалтыг намын гишүүдийнх нь зүгээс үзүүлээд байгаа гэнэ. Харин УИХ-ын дарга намын даргынхаа шахалтанд орж уг асуудлыг хасч орхивол өөрөө хуулийг бүдүүлгээр зөрчсөн болох юм.  Мөн тус хуулийн төсөл дээр санал хураах үеэр 17 сайдыг оролцуулбал МАН-ын бүлгээс түүнийг хууль зөрчсөн хэмээн албан тушаал нь огцруулах асуулдыг ярьж эхэлнэ.  Хэрвээ асуудал улам хурцдаж, огцруулахдаа тулбал түүнийг огцруулах эсэхийг нууц санал хураалтаар шийднэ. З.Энхболдыг хэдэр зантай, муухай ааштай нам дотроо олон хүнтэй таарамжгүй харилцаатайгэж хүмүүс ярьдаг. Тэгэхээр огцруулах санал хураавал олон гишүүн түүний эсрэг кноп дарах магадлалтай. Нөгөөтэйгүүр тэрбээр  2017 оны Ерөнхийлөгчийн сонгуульд АН-аас нэр дэвшихээр хамгийн хүчтэй яригдаж байгаа хүн. Түүнийг хэдэр зантай, муухай ааштай гэж ярьдаг ч улс төрийн ажилд шудрага гэж үнэлдэг. Гэтэл ийм байхад тэрбээр давхар дээлийг тайлах асуудлын үеэр 17 сайдыг санал хураалтанд оруулж намаа цээжээрээ хамгаалаад гарвал улс төрийн хүрээнийхний дунд нэр хүнд нь унана. Харин 17 сайдыг чуулганы танхимын гадаа суулгаж байгаад асуудлаа шийдвэрлэвэл нийгэмд шудрага гэсэн нэрээ хадгалж үлдэж чадах юм.  Гэхдээ түүний нам доторх карьер нь унана. Гэхдээ З.Энхболд нийгэм дэхь нэр хүнд, нам доторх карьерийнхаа алийг нь хадгалж үлдэхийг хэрхэн шийдэхийг харах л үлдлээ.