Энэ долоо хоногийн УИХ-ын чуулганаар давхар дээлийг дан дээл болгох хуулийн төсөл хэлэлцэгдэх учиртай. Өөрөөр хэлбэл УИХ-ын гишүүн нь давхар Засгийн газрын гишүүн байж болохгүй гэдгийг хуулиар зааж өгөх юм.

Учир нь улс төрийн бүх нам эвсэлүүд гүйцэтгэх эрх мэдэл, хууль тогтоох эрх мэдлийг давхар хаших боломж олгосон нь өнөөдрийн засаглалын хямрал үүсэх гол нөхцөл болсон гэдгийг  хүлээн зөвшөөрөөд буй.

Ийм боломжийг МАН эрх барьж байхдаа буюу 2000 онд үндсэн хуульд өөрчлөлт оруулах замаар бий болгосон байдаг. Энэ бүх өөрчлөлтийг дордуулсан долоон өөрчлөлт гэж шүүмжлэх хүмүүс ч их байсан юм.

Тэгвэл үндсэн хуулийн дордуулсан гэх эдгээр өөрчлөлтийг гардаж хийсэн хүмүүс үүнийг алдаа байсан гэдгийг хүлээн зөвшөөрч эхэлжээ. Тодруулбал дээрх долоон өөрчлөлтийг хийхэд МАН-ын урдаа барьдаг хуульч Д.Лүндээжанцан хуулчийнхаа хувьд голлох үүрэгтэй оролцсон бөгөөд тэрээр Үндсэн хуулийн өөрчлөлтийг 14 жилийн дараа алдаа байсныг хүлээн зөвшөөрсөн байна.

Тэрээр энэ талаар “...Бид өмнө нь гаргасан алдаагаа засах ёстой. Энэ алдаанаасаа ичиж цаг алдах шаардлага байхгүй. Ийм учраас Үндсэн хуульд өөрчлөлт оруулсандаа нэг ёсондоо хүлцэл өчиж байна... Энэ өөрчлөлт нь тухайн үед төрийн машин гацаагүй ажиллах нөхцөлийг бүрдүүлсэн гэж тайлбарладаг. Тэр цаг үедээ хагас дутуу таарч тохирч байсан байж болно. Гэвч өнөөдрийн өндөрлөгөөс харахад энэ өөрчлөлт одоо цагт тохиромжгүй гэдэг нь амьдралаар батлагдаж байна” хэмээн буруугаа хүлээжээ.

Түүнчлэн тэрээр өөрийн байр суурийг батлах нэгэн сонирхолтой жишээ татсан нь “Монтеске тэртээ 1748 онд нийтлүүлсэн Хуулийн амин сүнс бүтээлдээ хууль тогтоох, гүйцэтгэх эрх мэдлийг нэгтгэвэл эрх чөлөөг боомилно. Эрх чөлөөг боомилбол шударга шүүх байхгүй. Парламент, шүүх хоёр нийлбэл хуулийн дарангуйлал үүснэ. Эрх мэдэл шүүх хоёр нэгдвэл бодит дарангуйлал үүсэх бололцоотой гэж дүгнэсэн байдаг. Тиймээс Үндсэн хуулийг дордуулсан долоон өөрчлөлтийн хамгийн их шүүмжлэлийн бай болсон энэ заалтыг одоогийн парламент нэн даруй засах шаардлага бий болчихоод байна. Ингэвэл нэгдүгээрт алдаагаа засч байгаа хэрэг” гэсэн байна.