УИХ гишүүдийн давхар дээлийг тайлах хуулийг хэлэлцэж, санал хураах үеэр “Шударга ёс” эвслийн бүлэг 5 хоногийн завсарлага авснаар сайд нарын хувь заяаг тодорхойлох хугацаа дахин долоо хоногоор хойшилсон.Тус эвслийн ихэнхи гишүүд давхар дээлийг тайлах ёстой гэсэн байр суурьтай байгаа. Үүнийгээ ч бүлгийн хурлаараа баталгаажуулж санал нэгджээ. Гэтэл санал хураалт болоход “Шударга ёс” бүлгийн дарга Н.Батцэрэг гэнэтийн завсарлага авсан нь тус бүлгийнхнийг багагүй гайхшруулж заримынх нь эгдүүцлийг хүргэсэн байна. Эрх баригчдын бодлогыг дэмжихгүй байгаа Г.Уянга гишүүн талбайд гарч тэмцлээ эхлүүлэхээр шийдсэн бол, гэнэтийн хувийн тоглолт хийсэн даргадаа уурссан Д.Батцогт гишүүн хуралдаан дээр  “давхар дээлтэй сайд нар чинь хаачсан юм бэ, халууцаад байгаа юм уу, асуух юм их байна” гэж дургүйцлээ илэрхийлсэн нь санамсаргүй үйлдэл биш юм. Учир нь нэлээд эртнээс байр суурь нэгдсэн тэдний шийдвэрийг цөөн хэдэн хүн сайд байх сүүлчийн боломжийнхоо төлөө ашиглаж байгаа нь нэлээд маргаан дэгдээсэн гэдгийг эх сурвалж мэдээллэж байна. МАХН-ын дарга Н.Энхбаяр давхар дээлийг тайлах чиглэл өгсөн бол МҮАН-ын дарга М.Энхсайхан ч сайд нараа огт хамгаалахгүй, тэдний төлөө юу ч хийхгүй байгаа гэнэ. Харин Д.Тэрбишдагва, Ч.Улаан нарын гишүүд эрх мэдэлтэйгээ үхэлдэн зууралдаж асуудлыг аль болох гацаах, аргацаах арга барилтай байгаа нь тэдний хооронд багагүй зөрчлийг хутгаж эхэлжээ. Тэдний хувьд энэ Засгийн танхим сайд байх сүүлчийн боломж юм.

    АН-ын бүлэг лхагва гарагт  ширүүхэн хуралдаж сайд нарыг санал өгүүлэх шийдэлд хүрсэн ч түүнийг нь нэлээд гишүүд дагахгүй гэдгээ мэдэгдсээр хэрүүлтэй салцгаасан байна. Тэр оройноо тал бүртээ бүлэг фракциараа хуралдсаар гишүүдээ хайрцаглаж чадалгүй нэгдсэн чуулгантай золгосон. Давхар дээлийг даруй тайлахыг зөвхөн МАН-ынхан хүсээд байгаа юм биш. Нийгмийн шаардлага ч үүндээр маш хүчтэй төвлөрч байна. Тэр ч бүү хэл “Алтангадасаас салж намаа аврах сүүлчийн боломж шүү” гэсэн мессеж АН-ын дотор газар авч, эхнээсээ зарим сайд нар санал хураалтанд оролцохгүй гэдгээ илэрхийлээд байгаа. Хэрэг явдалд хяналтнаас гарсанд АН-ын удирдлагууд арга буюу МАХН-ын бүлгийн даргатай сэм тохирч завсарлага авахад хүрчээ. Сэм үгсэн хуйвалдсан үүний цаана маш том тохироо наймаа явагдсан гэж “шударга ёс” бүлгийн зарим гишүүд үзэж бүлгийн даргадаа нэлээд хатуухан үг чулуудсан гэнэ. 

    Гаднаа гайгүй мэт харагдаж байгаа ч Н.Алтанхуягийн танхим, АН-тай хамтарсан шударга ёс эвслийн бүлэгт гүн гүнзгий ангал үүссэн нь нэгэнт илэрхий болсон. Эргэж буцаад МАН-тай хамтрахаас өөр гарцгүй болж, дотроосоо ганхаж эхэлсэн АН-ыг МАХН-ынхан сайн шантаачилж байгаа гэдгийг эх сурвалжууд мэдээлж байгаа. МАХН-ынханы очсон яам, агентлагт хууль дүрэм байхгүй болсон тендер худалдан авах ажиллагаа ч цагаандаа гарч, шаардлага тавихаар “Засгаас гарна шүү” гэж айлгадаг болсоор удаж байгаа гэдгийг зарим эх сурвалж хэлж байна.

    Нэг талдаа хамтарсан нөхдөө айлгаж, нөгөө талдаа МАН-ынхантай давхар дээлийг тайлах тохироо хийх замаар шийдвэр гаргах тэнцвэрийн цэг дээр голлоод оччихсон тэднийг “Эрх мэдлийн төлөө янхан хийж байгаа хүмүүс” гэж МАН-ын нөлөө бүхий нэгэн улс төрч дүгнэсэн. Түүнчлэн тэдний ичих булчирхайгүйг нь гайхан шогширсон, шударга ёс нэртэй шударга бусчуудын нэгдэл болсныг халаглах ярих хүмүүс саарал ордноор нэг байна.