Цэцийн гишүүний бүрэн эрхийн нуувчинд бүгсэн Төрийн өмчийн хорооны дарга асан Д.Сугартай холбоотой авлига албан тушаалын хэргүүд шил шилээ даран хөвөрсөөр байдаг. Гэвч тэрбээр аливаа хэргээс сугарч үлдэн төрийн хуульд дийлдэхээ болиод удаж байна.

 Хамгийн сүүлд л гэхэд түүнтэй холбоотой авлигалын шинэ хэрэг илэрсэн нь тэрбээр Төрийн өмчийн хорооны дарга байхдаа Дарханы төмөрлөгийн үйлдвэрийг “Жаст” группийн ерөнхийлөгч асан Ш.Батхүүтэй хамтран Америкийн “HSBC” банкинд 10 сая долларын барьцаанд тавьсан байдаг.

Ер нь тэрбээр МАН-ыг эрх барьж байсан цаг үед л дураараа авирлаж, төрийн мөнгийг хайр найргүй залгиж байжээ.

Тодруулбал, "Ах" намыг мандан бадарч байх үед Д.Сугар бүх төрийн өмчит компаниудын ТУЗ-ийн дарга болж, олон оронтой тоогоор хэмжигдэх мөнгийг хууль бус аргаар олж байсан гэдэг. Тиймдээ ч түүнийг хэрэг төвөгт орооцолдох бүрт МАН-ын нэр, гуншин давхар яригдаж явдаг. Харин МАН-ынхан сүүлийн үед Д.Сугараас залхсан уу, яасан түүнийг намаасаа хөөхөөр ярилцсан ба түүнтэй холбоотой асуудлыг УИХ дахь Ёс зүйн хороонд тавьсан байна. Хуулийн дагуу үндсэн хуулийн гишүүнийг УИХ-аас томилдог учраас түүнтэй холбоотой ёс зүйн асуудлыг ч мөн УИХ дахь Ёс зүйн хороогоор хэлэлцүүлдэг аж. Мөн АТГ-ын тэргүүн комиссар Н.Ганболд энэ сарын 7-нд Д.Сугарыг Үндсэн хуулийн цэцийн гишүүн гэх төрийн халхавчнаас нь гаргаж, албан тушаалаас нь огцруулах хүсэлтийг УИХ-ын дарга З.Энхболдод явуулсан билээ.

Гэвч Д.Сугар сугарч үлддэг аргаа энэ удаад ч хэрэглэхээр бэлтгэж байгаа талаар эх сурвалжууд мэдээллээ. Тодруулбал тэрбээр намынхаа удирдлагуудтай тохиролцож “Би бүх хэргээ цэгцэлнэ. Бүх зүйлийг сугандаа хавчуулаад гарч чадна” гэсэн амлалтыг өгчээ. Тиймээс МАН-ынхан Д.Сугарыг өмөөрч түүнийг албан тушаалд нь авч үлдэхээр зүтгэх гэнэ.

 Ямартай ч Д.Сугартай холбоотой асуудлыг удахгүй УИХ дахь Ёс зүйн хороо, УИХ-ын чуулганаар хэлэлцэх нь. Энэ үед МАН-ынхан түүний талд зогсох нь тодорхой боллоо.

Д.Сугар бол төрийн мөнгийг баруун, солгойгүй залгиж, өөртөө өчнөөн тэрбумыг босгож чадсан нэгэн. Түүнтэй нэр холбогдоогүй авлигалын том хэргүүд ч ховор. Мөн Солонгос, Япон зэрэг улсад өөрийн нэр дээр байр авч, Хонгконгийн "Эйч Си Би Эс" банкинд оффшор данстай байсан нь нотлогдсон. Д.Сугар хөрөнгө босгоод байгаа атлаа түүнийгээ хөрөнгө орлогын мэдүүлэгтээ огт мэдүүлдэггүй байсан талаар АТГ-ын тэргүүн комиссар Н.Ганболдын УИХ-ын даргад илгээсэн албан дурдсан байна. Энэ мэт хэргүүдээс болж Д.Сугарыг олон нийт үзэн ядаж байхад МАН-ынхан түүнийг өмөөрч авч үлдвэл тэд өөрсдөө муухай харагдана.

Д.Сугараас болж улс төрд унаж яваа нэр хүндээ улам дордуулна гэдгээ М.Энхболд тэргүүтнүүд мэдэж байгаа гэдэгт найдья.