Давхар дээлийг тайлах хуулийн төслийг хэлэлцэж санал хураах үеэр МАХН-ынхан завсарлага авснаар асуудал гацаанд ороод байгаа. Тэгвэл АН-ын зарим гишүүд ч давхар дээлийг тайлах дээр саналаа өгнө гэдгээ илэрхийлэх болсон билээ. УИХ-ын гишүүн, Барилга хот байгуулалтын сайд Ц.Баярсайхан хуулийг хэзээнээс хэрэгжүүлж эхлэх тухай санал хураалтанд оролцохгүй гэдгээ илэрхийлсэн бол "амьдай" гишүүн Г.Баярсайхан ч мөн намын бүлгийнхээ саналыг дэмжихгүй гэдгээ илэрхийлжээ. Тэрээр  "Монгол Улсын Ерөнхийлөгчийн “Том төрөөс ухаалаг төр рүү шилжих ёстой” гэсэн  саналыг дэмждэг. Энэ хүрээнд хийгдэх хамгийн гол ажлын нэг нь УИХ-ын гишүүн хүн Засгийн газарт давхар албан тушаал хашихгүй байх нь зөв зүйтэй алхам юм. Хэрэв ийм тогтолцоо бий болчихвол парламент Засгийн газартаа хатуу хяналт тавьж чадна. Хяналт сайжирвал гүйцэтгэх засаглалын ажил ч сайжирч, улс орны эдийн засаг дээшлэх болно. Өнөөдөр бүх зүйл холилдсон болохоор хэн нь хэнийгээ хянаад байгаа нь мэдэгдэхээ байчихаж. Тиймээс уг асуудлыг дэмжиж байгаа. Харин хугацааны хувьд 2016 он гэх нь оновчтой биш юм болов уу" гэж байр сууриа илэрхийлсэн байна.