Өнөөдөр Хууль зүйн байнгын хороогоор  Х.Тэмүүжин сайдыг огцруулах асуудлыг 14.00 цагт хэлэлцэх юм. Тэгвэл үүнтэй холбогдуулан О.Баасанхүү гишүүн дөнгөж сая мэдээлэл хийлээ. Тэрбээр “Би байр суурин дээрээ бат бөх зогсоно. Хууль зүйн сайд Х.Тэмүүжинг  огцруулах төслөө маш чухал үндэслэлтэйгээр тавьсан гэж ойлгож байгаа.  Ганцхан жишээ дурдахад, Төрийн албан хаагчдын эмнэлэгт байсан 3.2 тэрбум төгрөгний аппаратыг үгүй хийсэн явдал. Тийм үнэтэй, иргэдэд хэрэгтэй аппарат байсаар байхад  гаргалгүйгээр, өөр газарт шилжүүлэлгүйгээр  засвар хийж тухайн аппаратыг эвдэлсэн. Гэтэл энэ хэрэгт сайд өөрөө хариуцлага хүлээхгүй засвар хий гэсэн үүрэг даалгавар авсан ажилчид нь цагдаагийн байгууллагаар шалгуулаад явж байна.  Ер нь Х.Тэмүүжин сайдын энэ мэтийн хууль зөрчсөн маш олон үйлдэл байгаа. Үүнийг би 14.00 цагт хуралдах Байнгын хорооны хурлаар баримттай, хуулийн зүйл заалттай нь дэлгэнэ. Мөн намайг хэвлэлээр Х.Тэмүүжингийн суудалд улайрч байна гэх мэдээлэл гараад байна. Тэгвэл надад ямар ч Хууль зүйн сайд болох бодол байхгүй гэдгийг хэлэх нь зүйтэй биз.  Түүнчлэн, энэ асуудлыг би нэг жилийн өмнөөс хөндсөн” гэв.