УИХ-ын гишүүн Г.Уянга өнөөдөр Чингисийн талбайд сандалтай суулт зохион байгуулж байна. “Монголын нэг өдөр-2014” нэрийн дор зохиогдож байгаа тус цуглаанд ахмад голдуу иргэд ирсэн байна. Энэхүү цуглаанаа Г.Уянга гишүүн эрх баригчдад амьдрал таниулах ардын цуглаан хэмээн нэрлээд байгаа юм. Тиймээс УИХ-ын гишүүдэд цуглаанд идэвхитэй оролцохыг уриалж албан бичиг явуулсан билээ. Харин Г.Уянга гишүүний цуглаанд О.Баасанхүү гишүүнээс өөр гишүүн ирсэнгүй. "Архитай, архичинтай тэмцмээр байна", "Малгүй болсон Монголын иргэд энэ орны иргэн мөн үү", "Соёлын сайд СӨХ-ны соёлгүй байрны зовлонг мэдэх үү", "Олон намын систем олон шашины урсгал газар авч байна. Их хурал дахь намуудыг тараая" гэсэн уриа лоозон барьсан иргэд сандалтай жагсаалт оролцож байлаа. Уг цуглаанд амьдралд нь асуудалтай байгаа, түүнийгээ олон нийт, эрх баригчдад хүргэж мэдүүлэх шаардлагатай гэж үзэж буй иргэд оролцож байгаа аж. Мөн цалин тэтгэвэр нь амьдралд нь хүрэхгүй байгаа, нийгмийн халамж зайлшгүй шаардлагатай боловч түүнээс хүртэж чадахгүй байгаа иргэд шударга бус шүүхийн шийдвэрээс хохирсон иргэд, гэр хорооллын дахин төлөвлөлтөд хамрагдаж байгаа иргэд эрх баригчдад амлалтыг нь сануулахыг хүсэгчид, зээлд хамрагдаж чадахгүй байгаа иргэд мөн оролцож үгээ хэлж байгаа юм байна. Цуглаан хоёр өдөр үргэлжлэх юм.

Энэ үеэр иргэдийн сэтгэгдлийг сонслоо.

Чингэлтэй дүүргийн 9 дүгээр хорооны ахмад настан Ц. Гэрэлмээ: Ард түмний амьдрал доройтож байна. Ахмад настнуудын тэтгэвэр бага байна. Үр хүүхдийн нөмөр, нөөлөгт л амьдарч байна. Ард түмний амьдралын  төлөө ажлаа хийх хэрэгтэй байна.  Эрх баригчид Монгол орныхоо төлөө, байгаль орчны төлөө санаа зовдоггүй юм байх даа.

Өмнөговь аймгийн  Манлай сумын иргэн Х.Сугар: Орон нутгаас ирж энэ цуглаанд оролцож байна. Цаг үеэ олсон чухал цуглаан болж байна. Монголын ард түмний өмнө шийдлээ хүлээж байгаа маш олон асуудлууд байна. Тэр дундаа ард түмний ядуурал хэцүүдлээ. Гурав хоногийн өмнө нэгэн зэрэг 100  төгрөгөөр нэмэгдэж байна. Энэ ядуурал юунаас болоод байгаа юм бэ. Хувьдаа баяжих гэсэн, мөнгө олох гэсэн ийм л хэсэг бүлэг хүмүүсийн үйл ажиллагаа. Өнөөдөр Монголд нэн яаралтай болохгүй байгаа төрийн тогтолцоогоо өөрчлөх хэрэгтэй. УИХ-ын гишүүн болохын тулд хувиасаа хэдэн зуун сая төгрөг зарцуулдаг. Ингээд УИХ-д орж ирээд  зарцуулсан мөнгөө олж авахын төлөө өдөр шөнөгүй ажиллаж байна. Үндсэн үүрэгт ажлаа, иргэдээ мартаж байна. Мөнгө л олж байвал чөтгөртэй нөхцсөн ч хамаагүй болжээ.