АТГ-ын тэргүүн комиссар Н.Ганболд энэ сарын 7-нд Үндсэн хуулийн цэцийн гишүүн Д.Сугарыг гадаад дахь офшор данс болон хөрөнгө оруулгаа нуун дарагдуулсан гэх үндэслэлээр албан тушаалаас нь огцруулах хүсэлтийг УИХ-ын дарга З.Энхболдод явуулсан билээ. Энэ дагуу өнөөдөр Хууль зүйн байнгын хороо хуралдаж Д.Сугарт хариуцлага тооцох асуудлыг хэлэлцэх гэсэн боловч МАН-ын бүлгийн зүгээс уг асуудлыг түр хойшлуулах саналыг гаргалаа.

Мөн хуулийн дагуу Д.Сугарт хариуцлага тооцох эсэхийг Үндсэн хуулийн Цэц өөрөө шийдвэрлэх боломжтой гэж Хууль зүйн байнгын хороо үзэв.

Хууль зүйн байнгын хорооны дарга Ш.Түвдэндорж энэ талаар "Үндсэн хуулийн Цэцийн гишүүний асуудлаар АТГ-аас манай байгууллагад хандсан. Аливаа байгууллагад ажиллаж байгаа хүн хөрөнгө орлогын мэдүүлэгээ хожимдуулсан, мэдүүлэлгүй орхигдуулсан тохиолдолд зохих шийтгэл оногдуулдаг. Энэ утгаараа Үндсэн хуулийн Цэц асуудлыг шийдвэрлэсэн. Д.Сугар гишүүн УИХ-аас нэр дэвшиж томилогдсон учраас энэ хүний асуудлыг нэр дэвшүүлсэн байгууллага нь хэлэлцэх ёстой гэдэг үүднээс манайд хэлэлцсэн. Өнөөдөр байнгын хорооны гишүүдийн зүгээс энэ асуудлыг эргэн тодруулж, аль нь зөв, яаж шийдвэрлэх зэргийг МАН-ын бүлгээс санал оруулж, хойшлуулахаар болсон. Үндсэн хуулийн цэцийн гишүүнийг эргүүлэн татах нь анх удаа болж байгаа учраас хуулийн дагуу зөв зүйтэй хийх ёстой гэж үзэж хойшлуулсан. Хөрөнгө оруулгаа нуун дарагдуулсан тохиолдолд цалингийн 30 хувиар торгох, албан тушаал бууруулах, ажлаас халах гэсэн заалт хуульд бий. Үүнийг Үндсэн хуулийн Цэц өөрөө шийдвэрлэх бүрэн эрхтэй. Өөрөөр хэлбэл, Үндсэн хуулийн Цэц шийдвэр гаргасан тохиолдолд Төрийн байгуулалтын байнгын хорооны хуралдаанаар хэлэлцэж, бүх шийдвэр гарсны дараа манай байнгын хорооны хуралдаанаар хэлэлцэнэ" гэлээ.