Монгол Улсаас Саудын Арабын Вант Улсад суух Онц бөгөөд Бүрэн эрхт Элчин сайд С.Энхбат Саудын Арабын Вант Улсын Гадаад хэргийн дэд сайд Абдулазиз бин Абдулла бин Абдулазиз-д энэ сарын 14-нд Итгэмжлэх жуух бичгийнхээ хувийг гардуулав.

Уулзалтын үеэр Элчин сайд С.Энхбат Монгол Улсын Ерөнхийлөгч Ц.Элбэгдоржийн мэндчилгээг Саудын Арабын Вант Улсын Цог Жавхлант Ван, Хоёр ариун сүмийн хамгаалагч Абдулла Бин Абдулазиз Аль Сауд-д, Гадаад харилцааны сайд Л.Болдын мэндчилгээг Саудын Арабын Вант Улсын Эрхэм дээд Ханхүү бөгөөд Гадаад хэргийн сайд Сауд Бин Файсал Бин Абдулазиз Аль Сауд-д  уламжлахыг хүсэв.

Мөн Гадаад харилцааны сайдын мэндчилгээг Саудын Арабын Гадаад хэргийн дэд сайд А.А.Абдулазиз-д уламжилж, Монгол, Саудын Арабын харилцаа, хамтын ажиллагаа болон Монгол Улсын Гадаад харилцааны сайдын Саудын Арабын Вант Улсад энэ оны 4 дүгээр сард хийх айлчлалын талаар санал солилцов.

Итгэмжлэх жуух бичгийн хувийг барихад Саудын Арабын талаас ГХЯ-ны Ёслолын газрын захирал Аззам А.Аль Гаин, Азийн газрын захирал Мустафа Кавтар, манай талаас ЭСЯ-ны зөвлөх Д.Батсайхан нар байлцлаа.