УИХ-ын чуулганы энэ долоо хоногийн хуралдаанаар Ерөнхийлөгчийн өргөн мэдүүлсэн “давхар дээл”-ийг дан болгох буюу Засгийн газрын гишүүн, УИХ-ын гишүүнээр давхар ажиллахгүй байх хуулийн төслийг хэлэлцэнэ.

Уг асуудлаар УИХ дахь намын бүлгүүд ээлж дараалан завсарлага авснаар энэ долоо хоногтой золгож буй бөгөөд "давхар дээл"-ийг тайлж чадах эсэх нь одоогоор бүрхэг байна.

 Улс төр давхар дээлээр амьсгалж буй энэ үед олны анхаарлыг хамгийн ихээр татаж буй асуудал бол Засгийн газар, УИХ-ын гишүүнийг давхар хашиж буй 17 сайд  санал хураалтад хураалтанд оролцох эсэх болоод байна. Хэрвээ тэд санал өгч кноп дарвал ашиг сонирхлын зөрчил болно гэж МАН-ын бүлгээс үзэж бүх сайдуудад шаардлага хүргүүлсэн.  Цаашлаад “давхар дээл”-ийг дан болгохыг дэмжихгүй гишүүдийн тоо өсөх магадлалтай тул эрх ашгаа бодсон ч сөрөг хүчнийхний сэтгэл зовох нь аргагүй юм. 

Харин МАН-ын 26 гишүүн дээр зарим гишүүд нэмэгдээд уг хуулийг дэмжээд баталчихвал УИХ, Засгийн газрын гишүүний ажлыг хавсран хийж байгаа 17 сайдын олонхи нь огцрох аюултай тулгарна.  Тэгэхээр Шинэчлэлийн Засгийн газрын хувь заяа хэцүүдэнэ гэсэн үг. Тийм ч учраас Ерөнхий сайд Н.Алтанхуяг Засгийн газраа авч үлдэхийн тулд бүхий л арга, мэхээ хэрэглэж яваа сурагтай байна. УИХ дахь МАН-ын бүлгийн зүгээс “давхар дээл”-тэй сайд нар санал өгвөл хууль зөрчсөн асуудал болно гэж байгаа бол АН-ын бүлэг уг асуудал нь ашиг сонирхил үүсгэхгүй гэж байгаа юм. Тэдний зөв, буруу нь мэдэгдэхгүй маргааныг УИХ-ын даргын бөөрөнхийлсөн хариулт улам дэвэргэж байгаа.

УИХ-ын дарга З.Энхболд “Би сайд нарт ашиг сонирхолын хуулийг сануулна. Сайд нар саналаа өгөх эсэх нь тэдний ухамсарын асуудал. Ер нь ашиг сонирхлын хуулийн дагуу гишүүн өөрөө ийм нөхцөл үүссэн үгүй гэдгийг сайн дураараа шийдэх эрхтэй” гэж буй ч сайд нарыг чуулганы хуралдаанаас “хөөж” гаргах хэрэгтэй гэж үзэх гишүүд цөөнгүй байгаа юм. 

Юу ч болж байсан УИХ-ын дарга 17 сайдыг чуулганы хуралдаанаас хөөж гаргахгүй нь тодорхой.
Харин сайд нар уг асуудалд ухамсараараа хэрхэн оролцохоо аль хэдийн олон нийтэд тодорхой зарласан. Тодруулбал, давхар алба хашиж буй 17 сайдын 16 нь санал асуулгад оролцоно гэдгээ мэдэгдээд байгаа юм. Харин нэг л сайд Засгийн газрын гишүүдийн “давхар дээл”-ийг тайлах тухай хуулийн санал хураалтад оролцохгүй гэдгээ албан ёсоор мэдэгдээд байна. Тэр нь Барилга хот байгуулалтын сайд Ц.Баярсайхан. Тэрбээр санал асуулгад орохгүй болсон үндэслэлээ “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль”-тай холбон тайлбарлаж байгаа юм. Ингэхдээ Засгийн газрын гишүүдийн тодорхой хэсэг нь УИХ-ын гишүүн байх заалтын хувьд саналаа өгөх холбогдох хуулиудыг зөрчихгүй гэж үзэж байгаагаа мэдэгдээд байгаа. Харин хуулийг мөрдөх хугацаатай холбоотой санал хураалтад оролцохгүй гэдгээ албан ёсоор мэдэгдсэн нь юм.


Түүнийг ийм шийдвэр гаргасанд намынхан нь болон Засагт хамтран барьж буй танхимын сайд нар нь ихэд дургүйцэж байгаа гэнэ. Цаашлаад түүнд дарамт, шахалтыг ч үзүүлээд эхэлсэн талаар зарим эх сурвалжууд мэдээллээ.

Ц.Баярсайхан сайдын хувьд эр зоригтойгоор ийм санал гаргахад нь зөвхөн ухамсар, ёс зүй нь нөлөөлсөн бус сайдын албан тушаалаасаа огцрохоор аль эртнээс төлөвлөж байсан нь нөлөөлсөн аж. Ер нь Ц.Баярсайхан сайд Засгийн газарт ажиллах ямар ч хүсэлгүй гэдгээ ойр дотныхондоо ярьж яваа сурагтай. Учир нь тэрбээр Засгийн газартай бодлого, зөрчилдөж эхлээд удсан гэнэ.

Ц.Баярсайхан сайд бол барилгын тусгай зөвшөөрлийг авахад учирдаг хүнд суртлыг багасгаснаас эхлээд олон шинэчлэлийг өөрийнхөө хариуцаж буй салбарт хийж чадсан нэгэн. Харин хийсэн ажлуудыг нь дэмжихгүй байх тохиолдол их байсан учир энэ Засгийн газрын танхимд ажиллах сонирхол нь аль хэдийн алга болсон гэнэ. Нэг ёсондоо бодлого нийлэхээ больсон учраас "давхар дээл"-ийг далимдуулж Засгийн газраас гарна гэдгээ мэдэгдээд буй нь энэ аж.