Сайдын алба давхар хашиж байгаа УИХ-ын гишүүдийн "давхар дээл"-ийг тайлах хуулийн төслийг маргааш УИХ хэлэлцэж, нэг тийш болгоно. "Шударга ёс" эвслийн бүлгийн авсан завсарлага дуусч байгаа учир эрх баригчдын зүгээс энэ хуулийн төслийг дахин гацаах гэж оролдвол өөрсдийгөө хэн болохоо зарласантай ялгаагүй. Тэгэхээр маргаашийн сценари хэнд ч ойлгомжтой л доо. Энэ хуулийн төслийг бид дэмжиж байгаа гэх боловч хэрэгжих хугацаан дээрээ зөрүүтэй байр суурьтай байгаа "Шударга ёс" эвслийн бүлгийнхэн өнөөдөр хуралдаж шийдвэрээ гаргана. Юун төлөө завсарлага авсан билээ, эвслийн бүлэг часхийсэн шийдвэр гаргах байлгүй. АН-ын бүлэг сайд нараа санал хураалтад оролцуулах гэж бүхий л чадлаараа зүтгэх байх. Мэдээж энэ хуулийн санал хураалтад оролцохгүй гэдгээ хэдэн хоногийн өмнө олон нийтэд зарласан Барилга, хот байгуулалтын сайд Ц.Баярсайхан санал хураалтаас урьтаж чуулганы танхимаас гарч таарна. Хэлсэн, амласандаа хүрэх шиг сайхан юм үгүй шүү дээ. Харин түүн шиг ашиг сонирхлоо эрэмбэлж чаддаг, эх оронч сайд маргааш "төрөх" болов уу, яадаг бол. Үгүй ядаж Ашиг сонирхлын зөрчлийн хуулийг өлгийдөж авсан автор Хууль зүйн сайд Х.Тэмүүжин амандаа ус балгасан мэт зогсохгүй байлгүй дээ. Сайд нарын "давхар дээл"-ийг тайлах талаар хэвлэлээр зоригтой дуугарч байсан АН-ын бүлгийн гишүүд ч байр сууринаасаа буцахгүй бол уг нь энэ хууль батлагдчих гээд л байдаг. М.Батчимэг, Ж.Батзандан, Д.Ганбат нарын "давхар дээл"-ний талаар хэлсэн үг ард түмэнд их таалагдсан юм даг. Маргааш тэдний үгийг дахин сонсохыг хүсч, хүлээж л суугаа.
С.Ганбаатар гишүүн сайд нарын "давхар дээл"-ийг өнөө маргаашгүй тайлъя гэж уриалсан. Сөрөг хүчин мөн ийм байр суурьтай байгаа. "Давхар дээл"-ээ тайлж, ухаалаг төр рүү шилжихийг уриалж байгаа төрийн тэргүүнийхээ санаачилгыг бодсон ч, ард иргэдийн санал хүсэлт, судалгааны дүнгүүдийг харсан ч УИХ-ын гишүүн, сайд хэмээх "сиамын ихэр" мэт болсон энэ хоёр албан тушаалыг салангид болгох нь өнөөдрийн нийгмийн захиалга болоод байна.
Тиймээс "давхар дээл"-тэй сайд нар ямар санаачилга гаргахаас энэ хуулийн төслийн хувь заяа шалтгаалах нь ээ. Хэрвээ сайдын албыг давхар хашиж байгаа УИХ-ын гишүүн нь сайд ба гишүүний албыг давхар эрхлэхийг хориглохтой холбоотой асуудлаар маргаашийн нэгдсэн хуралдаанд таслах эрхтэй оролцвол ард түмэн ирэх сонгуулиар тэдэнд ямар дүн тавихаа хэнээр ч хэлүүлэлтгүй мэдэх биз ээ. Албан тушаал, эрх мэдлээ улс орон, ард түмний нийтлэг эрх ашгаас дээгүүр тавьж байгаа нөхдийг дэмжихгүй л байх шүү.
Хэрвээ "давхар дээлтнүүд"-ийг дараагийн сонгуулиар сонгохгүй байхыг уриалсан хөдөлгөөн өрнөчихвөл олон нийт түрээд л явах нь тодорхой. Тэгэхээр 16 оны сонгууль "давхар дээл"-ндээ халууцаж, ажилдаа түүртэж яваа сайд нарт халтай л тусах нь дээ.
Сэтгэгдэл (1)