Шинэчлэлийн Засгийн газар хавтгайрсан халамжийн тогтолцоог цэгцэлж, бэлэнчлэх сэтгэлгээ суусан хөдөлмөрийн насныхныг ажил хөдөлмөр эрхлүүлж, ажлын байр нэмэгдүүлэх чиглэлтэйгээр Хөдөлмөрийн яамыг шинээр эмхлэн байгуулсан гэдгийг сайд уулзалтын эхэнд хэллээ. Уулзалтын үеэр ажил олгогч, аж ахуй нэгж байгууллагуудаас ирсэн захиалгын дагуу зохион байгуулж байгаа мэргэжилтэй ажилтан бэлтгэх богино хугацааны эрчимжсэн сургалтын олон асуулт ирлээ. “Үндэсний мэргэжилтэй ажилтан бэлтгэх хөтөлбөр”-т хамрагдагчид Улаанбаатар хотын 26, орон нутгийн 31 мэргэжлийн боловсрол сургалтын байгууллагад 53 мэргэжлээр суралцаж байгааг сайд хэллээ. Эхний 2 сар танхимд онолын мэдлэг заалгаж, үлдсэн 3 сарыг ажил олгогчийн ажлын байранд үйлдвэрлэлийн дадлага хийдэг. Сургалтын бүхий л шатны үйл ажиллагаанд ажил олгогчийг оролцуулдаг бөгөөд ингэснээр ажил олгогч суралцагчдад ямар ур чадвар түлхүү эзэмшүүлэхээ сонгодог байна. Мөн ажил олгогчид үйлдвэрлэлийн дадлагыг өөрийн үйлдвэр, аж ахуйн нэгж дээр хийлгэн төгсөлтийн шалгалтыг хамтран авч, ажлын байраар хангах зэргээр хамтран ажиллаж байгаа нь “Үндэсний мэргэжилтэй ажилтан бэлтгэх хөтөлбөр”–ийн онцлог гэлээ. Тус хөтөлбөрийн хүрээнд өнгөрсөн жил 6417 мэргэжилтэн бэлтгэж, нийт төгсөгчийн 79 хувь нь ажилтай болжээ. Энэ жилийн эхний ээлжийн 5220 суралцагч танхимын сургалтаа дуусган үйлдвэрлэлийн дадлaгад гарсан бол хоёрдугаар ээлжинд 1728 иргэн бүртгүүлж, ажил олгогчидтойгоо гэрээ байгуулан сургалтад хамрагдаж эхэлжээ.
Ийнхүү эх орондоо ажилтай болох боломж нээгдсэнээр гадаадад ажиллах иргэдийн тоо буурчээ. Өмнө нь нэг жилд 3000 гаруй хүн БНСУ-д ажиллахаар явдаг байсан бол өнгөрсөн жил 1900 болсон байна.
Жижиг, дунд үйлдвэрийг хөгжүүлэх сангийн зээлийн талаарх мэдээллийг Хөдөлмөрийн яам ил тод болгосон. Аймаг тус бүрт аль компанид ямар зориулалтаар хэдэн төгрөгийн зээл олгосон тухай мэдээллийг яамны цахим хуудсанд байршуулснаар зээлийн санхүүжилтэд иргэд хяналт тавих боломжтой болжээ.
Хөдөлмөрийн сайдын уулзалт ярилцлагад 5000 орчим иргэн хандлаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
