Уржигдар орой Нийслэлийн МАН-ын хорооны хурал нам жимхэн болж өнгөрөв. Ямар нэгэн шинэ сонин, содон юм болсонгүй. Уг нь хурлаараа Нийслэлийн МАН-ын хорооны шинэ удирдлагыг ярих байсан учир намын гишүүд нь ч, АН-ынхан ч анхааралтай ажиглаж байсан юм. Ажиглаж байсан хүмүүсийн тааварласнаар Нийслэлийн МАН-ын хорооны даргаар Ц.Сандуйг улираан сонгожээ. Гэхдээ бодлогоор ганцаарангийнх нь нэрийг оруулж санал хураалтад оруулахад 97 орчим хувийн санал авчээ.

Нийслэлийн МАН-ын даргад үзнэ гэж улс төрийн бэлтгэлээ базааж байсан гишүүн Д.Сумъяабазар хурлын үеэр барайсан царай гаргачихаад чимээгүй сууж. Тэр нам доторх өрсөлдөөнд урьдчилаад ялагджээ. Ингээд дараагийн сонгуульдаа МАН-ынхан нийслэлд Ц.Сандуй хэмээх даргатайгаа орох нь тодорхой боллоо. Ц.Сандуйг улиран сонгогдож байх агшинд “Central tower”-ийн зоогийн газар Нийслэлийн АН-ын удирдлагад багтах залуус 2016 оны ялалтын баяраа урьдчилан тэмдэглэж байсантай зарим нэгэн таарчээ. Тэд нийслэлийн МАН-ын даргаар Ц.Сандуй улирлаа. “Бид 2016 онд ялгуусан их ялалтыг байгуулах нь тодорхой боллоо”. “Баатарыгаа түшиж ажиллах л үлдлээ”. “Бид нийслэлээ нийслэл шиг болгоно”, “Нийслэлийг яаж хөгжүүлэхийг харуулнаа”, “Нийслэлд бүх түвшинд нь ялна” гэсэн онгироо сагсуу үгийг унагаж хундага тулгаж байжээ. Ямар ч гэсэн Нийслэлийн МАН-ын даргаар Ц.Сандуйг томилогдсонд АН-ынхан баяртай бас урамтай байна.

Тэдэнд ингэж баярлах, хундага тулгах шаардлага байж ч мэднэ. Учир нь МАН-ыг нийслэлд шинэчлэл хий гэж ард түмэн саналаа өгөөгүй. Харин МАН-ынхан шинэчлэлээ хийсэнгүй. Нөгөө л хотыг удирдаж байсан хуучин хүмүүсээ эргүүлэн томилчихлоо. Тиймээс нийслэлийнхэн 2016 онд МАН-ынханд саналаа өгнө гэж итгэхэд хэцүү боллоо.

Тэгээд ч Ц.Сандуй нийслэлийн МАН-ын хорооны даргаар 2012 оноос эхлэн ажилласан гэж эх сурвалж мэдээллээ. Энэ хугацаанд тэрээр нэг ч бүтээлч ажил хийгээгүй. Нэг ч шинэ санал, санаачилга гаргаагүй. Гэтэл Нийслэлийг авсан АН-ынхан яаж ажилдагаа харуулж байна. Гэр хорооллын төлөвлөлт, шинэ байр, шинэ орон сууцны бодлого, гудамжны уулзвар, хурдны зам, давхар зам, төмөр замаар явах автобусаас эхлээд цэцэг тарих, гудамж услах гээд хийхгүй юм алга. Нийслэлийн шинэ удирдлагад ард түмэн үнэхээр ам сайтай байна. МАН-ынхан өмнө юу хийж байсан юм бэ гэж шагширцгааж байна. АН-ынхан ч өөрсдөө шоугаа сайн хийж тархи угаах юм. Нийслэлийн МАН-ынхан таг.

Сүхбаатарын талбайн нэрийг сольж байхад ч, Нийслэлийн намын хорооны байрыг нь булааж байхад ч, түүх соёлыг нь гутааж байхад ч, Нийслэлийг МАН-ынхан сүйтгэсэн гэж доромжилж байхад ч Ц.Сандуй тэргүүтнүүд таг. Нэг ч удаа энэ талаар ам нээгээгүй. Э.Бат-Үүл үнэхээр чадварлаг тоглолтуудыг хийж байна. Сөрөг хүчнийхэн Э.Бат-Үүлтэй тулахаас үнэхээр айж байна. Ийм байж Нийслэлийн МАН-ын дарга болно гэдэг маш том прадокс гэж улс төр судлаачид үзэж эхлэв.
Үүний зэрэгцээ Нийслэлийн МАН-ын хорооны хурлаараа дэд дарга Ш.Сайхансамбууг чөлөөлсөн нь анхаарал татав. Тэрээр энэ намын бүхий л санхүүжилт дээр анхаарч ирсэн гэдэг. Тэр ч бүү хэл нэг удаа тэрбум төгрөгийн хандив өгсөн гээд л шуугиулж явсан удаатай. Ийм чухал хүнийг яагаад тойргийн гадна үлдээв гэдэг асуултын тэмдэг хэвээрээ үлдэв.

Уг нь нийслэлийн МАН-ын хорооны даргад Э.Бат-Үүлтэй тулалдаж чадах зангарагтай эсвэл цоо шинэ face хэрэгтэй байв. Үгүй ядаж л эртнээс яригдсан Д.Сумьяабазарыгаа сонгосон бол арай дээр харгадах байлаа. Гэвч МАН-ынхан нийслэлд ялах хүсэлгүй байх шиг байна гэсэн иргэдийн яриа нэгийг өгүүлж эхэллээ.