Шинэчлэлийн Засгийн газраас Эдийн засгийг эрчимжүүлэх 100 хоног аянг ирэх долоо хоногт эхлүүлэхээр болжээ. Уг аяны хүрээнд олон ажлыг хийхээр төлөвлөсөн талаар өнөөдөр Ерөнхий сайд сэтгүүлчидтэй уулздаг 30 минут уулзалтынхаа үеэр мэдэгдлээ.

Өнөөдрийн уулзалтаар Ерөнхий сайд Н.Алтанхуяг Монгол улсын эдийн засгийн нөхцөл байдлын талаар танилцууллаа. Сүүлийн хоёр жилийн үзүүлэлтээс харвал эдийн засаг аль ч талаасаа өсөлттэй байгаа талаар Ерөнхий сайд онцоллоо. Тэрбээр эдийн засгийн үзүүлэлтийг илтгэх тоо баримтыг танилцуулсан бөгөөд уг тоог Монгол банк, Статистикийн газар, Сангийн яамнаас гаргасан гэлээ.

2012 онд Монгол улсын эдийн засаг 11.7 хувиар өссөн үзүүлэлттэй гарсан байна. Мөн 2013 онд манай улсын эдийн засгийн үзүүлэлт өсөлттэй гарсан талаар Олон улсын валютын сангаас мэдэгдсэн аж. 2014 оны хувьд эдийн засгийг хоёр тоонд барих зорилт тавин ажиллаж байгаа гэхдээ энэ нь их хүнд гэж Ерөнхий сайд хэлэв. Учир нь дэлхийн эдийн засаг хүнд байгаа нь манайд улсад нөлөөлж байгаа аж. ДНБ-ний хувьд 2012 оноос хойш бага зэрэг өссөн үзүүлэлттэй байгаа юм байна. ДНБ өсөхөд нөлөөлсөн зүйл нь барилгын салбарт дэмжлэг сайн үзүүлсэнийх гэж Засгий газраас үзэж байгаа аж. Мөн хөдөө аж ахуй, уул уурхай, бөөний худалдаанаас орж ирэх ашиг нөлөөлсөн байна. 

2012 онд Монгол улс 82 мянган тонн зэсийн баяжмал гаргасан бол энэ жил 150 сая тонн болж нэмэгдсэн байна.  Мөн газрын тосыг олборлож гадагш гаргах хэмжээ 1.5 сая тонноор нэмэгджээ. Энэ мэтчилэн эдийн засагт нөлөөлөх үзүүлэлтүүд өсөлттэй байгаа ч НӨАТ-аас орж ирэх хөрөнгө багассан аж. 2013 онд 292 тэрбум төгрөгийг НӨАТ-аас босгож байсан бол энэ жил 280 болж буурчээ. Энэ нь аж ахуй нэгжүүдийн тоо хумигдаж байгаатай холбоотой хэмээн Ерөнхий сайд хэллээ. Манай эдийн засагт гарсан бас нэг эерэг үзэгдэл нь гадаад худалдааны алдагдал багассан явдал байна.

2012 онд манай улс 580 сая долларын алдагдалтай гарсан бол 2013 онд энэ тоо 400 болж буурчээ. Харин энэ жил 9.1 тэрбум сая доллар болж эрс буурсан байна. Энэ нь төгрөгийн ханш суларснаас үүдэлтэйгээр гаднаас янз бүрийн хэрэгтэй, хэрэггүй юм авах нь багассантай холбоотой гэж Ерөнхий сайд Н.Алтанхуяг хэлэв. Юмны үнэ өссөн гэж байгаа ч албан ёсны үзүүлэлтээр буурсан байгаа гэдгийг ч тэрбээр мөн хэллээ. Импортоор орж ирдэг барааны тоо ч буурсан нь хүмүүс Монголынхоо барааг хэрэглэж эхэлсэнтэй холбоотой гэв. Энэ жил нүүрс, зэс, төмөр, түүхий нүүрс, газрын тос, ноолуур зэргийнхээ тоог өсгөж гадагш гаргаж чадвал экспорт сайжирна гэж Засгийн газраас үзэж байгаа аж.