Х.Тэмүүжин сайдын асуудлаар УИХ-ын гишүүн Г.Уянга "Шударга ёс" эвслийн бүлгийн хурлын үеэр өөрийн байр суурийг илэрхийлжээ. Тэрбээр Х.Тэмүүжин сайдыг огцруулахыг дэмжихгүй гэдгээ илэрхийлээд түүнийг албан тушаалаас нь буулгах хангалттай үндэс байхгүй гэж үзсэн байна.

Ингээд Г.Уянга гишүүний байр суурийг хүргэе. Би нэг зүйлд их нухацтай хандаж байгаа. Х.Тэмүүжин сайд хуульзүйн салбарын шинэчлэлийн бодлогыг гаргаж тавьсан. Энэ бол олон жил муу зүйл бугшсан салбарын үүрийг бужигнуулсан үйлдэл. Олон дарга цагдаа үүнд маш дургүй байгаа.Учир нь тэдний амь, амьдрал тасрахад ойртсон. Энэ салбар ямар аймар болсон бэ гэдгийг тэдэнтэй байнга тэмцэлддэг байсан хүний хувьд гадарлаж байна. Сая тойргоороо явж байхад, 10 мянган хүн амтай хороонд ганцхан хэсгийн байцаагч байна. Ганц хүн юундаа ч хүрэхгүй, унаа унаш ч байхгүй. Тэгэхэд ланд 570 унаж мөрийтэй тоглосон, гүзээтэй дарга цагдаа нар дээд түвшиндээ овоорсон байгаа. Тэд хэзээ ч хорооны цагдаа хийхийг хүсэхгүй. Яг л уруугаа харсан пирамид шиг.

 Яагаад цагдаа дипломат, цагдаа элчин сайд болдог юм бол?! Энэ юу гэсэн үг вэ. Цагдаагийн байгууллага өөрөө гэмт хэргийн үүр уурхай, өөрсдөө рэкетчин, шантаажчин. Ийм л үүрийг Х.Тэмүүжин сайд бужигнуулчих шиг болсон. Х.Тэмүүжингийн тухай ар араасаа цуварч байгаа энэ янз бүрийн яриа нь дээрх үүр уурхайг ухаж төнхөж эхэлсний төлөөс биш биз?! Ямар ч үнээр хамаагүй өөрсдийгөө амьд авч үлдэх гэсэн улайрал шиг надад анзаарагдах боллоо.

О.Баасанхүү гишүүн гаргаж ирээд байгаа энэ баримтуудаа яаж олж авсан бэ? Хэн нэгний гар хөл болоогүй байгаа гэж бас бодогдож байна. Ийм учраас би асуудлыг одоо санал хурааж мухарлахын эсрэг байна. Ямар ч байсан Х.Тэмүүжин сайдыг сонсох ёстой гэж бодож байна. Түүний дараа ямар санал өгөхөө шийднэ. Нөгөө талаар өнөөг хүртэл хуульзүйн салбарын шинэчлэлийн талаарх Х.Тэмүүжин сайдын бодлогыг эсэргүүцсэн хүн олон байгаа ч өөрийн альтернатив хувилбараа сөргүүлэн тавьсан хүнийг би олж харсангүй.