УИХ-ын нэгдсэн чуулганы хуралдаан үргэлжилж байна. Өнөөдрийн хуралдаанаар хэд, хэдэн асуудал хэлэлцэж байгаагийн дотор Хамтын тэтгэврийн тухай хуулийг хэлэлцэх эсэх асуудал байгаа юм. Тус хуулийн төслийг намрын чуулганаар хэлэлцэх үеэр МАН-ынхан тооцоо, судалгаагүй хууль хэмээн завсарлага авсан юм.

Харин өнөөдрийн хуралдаанаар тус хуулийн төслийг хэлэлцэх нь зүйтэй гэсэн саналд хүрлээ. УИХ дахь МАН-ын бүлгийн дарга С.Бямбацогт энэ талаар "МАН-ын бүлэг хамтын тэтгэврийн тухай хуулийг дэмжиж байгаа. Харин улсын төсөвт дарамт учруулахаар байгаа тул тооцоо, судалгаагаа сайн хий гэдэг үүднээс завсарлага авсан. Гэхдээ өнөөдөр Хамтын тэтгэврийн тухай хуулийг хэлэлцэх эсэхийг дэмжье. Цаашид үндэслэлтэй, судалгаатай байх хэрэгтэй шүү" гэлээ.
Хамтын тэтгэврийн тухай хуулийн төсөлд гэр бүлийн хоёр 20 жил тасралтгүй Нийгмийн даатгалын шимтгэл төлсөн, мөн сүүлийн 10 жил хамтдаа амьдарсан нөхцөлд буурлуудын хэн нэг нь хорвоогийн мөнх бусыг үзүүлсэн бол тэтгэврийнх нь тодорхой хувийг үлдсэн ахмад настанд өвлүүлэх тухай зохицуулалт тусгагдаад байгаа юм. Төсөл санаачлагчдын зүгээс өвлүүлэх тэтгэврийн хувь хэмжээг 50, 70, 100 хувь хүртэл байж болно гэж хэд, хэдэн хувилбараар заагаад буй.

Ингээд тус хуулийн төслийг Нийгмийн бодлого боловсрол, соёл шинжлэх ухааны байнгын хороонд шилжүүллээ. Одоо чуулганы хуралдаанаар Шилэн дансны тухай хуулийн төслийг хэлэлцэх эсэхийг хэлэлцэж байна.