Эдийн засгийн нөхцөл байдалтай холбогдуулж Монгол Улсын Ерөнхий сайд Н.Алтанхуяг УИХ-ын чуулганд мэдээлэл хийж гишүүдийн асуултанд хариулж байна. Энэ оны эхний улирлын байдлаар Монгол Улсын татварын орлого 170 орчим тэрбум төгрөгөөр тасраад байна. Тодруулбал ТЕГ эхний улиралд 520 тэрбум төгрөг төвлөрүүлэхээс 401 тэрбум орчим төгрөг ГЕГ 362 тэрбум төгрөг төвлөрүүлэхээс 302 тэрбум төгрөгийг улсын төсөвт төвлөрүүлээд байна. Үүнийг хувилж тооцвол улсын төсвийн бүрдүүлэлт 25 орчим хувиар тасраад байгаа юм. Төсөвт орж ирэх мөнгө ингэж багассаны учир нь дотоодын эдийн засаг нөлөөлсөн мөн дотоодын компаниудаас орж ирсэн НӨАТ багассан, импорт багассан гэсэн гурван зүйлтэй холбоотой аж.

Гадаад худалдааны алдагдал багасч эдийн засагт зарим нааштай үзүүлэлтүүд гарч байгааг мөн Ерөнхий сайд мэдээллэж байна. Өнгөрөгч оны нэгдүгээр улиралд манай улс 809.2 сая долларын экспорт хийж байсан бол энэ оны эхний улиралд 986.9 сая долларын экспорт хийсэн үзүүлэлттэй байгаа бөгөөд импортын хэмжээ 1.2 тэрбум доллараас 900 сая доллар болж буурснаар гадаад худалдааны алдагдал -395.8 саяас -9.1 хүртэл огцом буурчээ. Энэ онд дэлхийн эдийн засгийн өсөлтийг олон улсын байгууллагууд хүндхэн сорилтууд үргэлжилсэн жил байх болно гэж тайлбарлаж байна. Харин Монголын эдийн засагт эерэг нааштай үзүүлэлтүүд гарна гэсэн прогнозыг дэвшүүлжээ.