Давхар дээл, дан дээлний маргаан Монголын улстөрд төдийгүй нийгмийн амьдралд ч асар их зөрчлийг бий болгоод байна. Өнгөрөгч долоо хоногт улстөрийн намууд эл асуудлаас болж дотоод гадаадгүй бөөн дажинтай өнжиж, энд тэнд элдвийн бүлэг фракцын хурал тасарсангүй. Хамгийн гол нь Ерөнхийлөгчийн санаачилсан уг хуулийн төсөл Засгийн газрын ирээдүйг тун бүрхэг болгочихоод байгаад эгдүүцсэн хүмүүс олон байна.

Давхар дээлийг дан болгох хуулийг хэзээнээс хэрэгжүүлж эхлэх тухай санал хураалт болоход УИХ-д хамгийн олон суудалтай АН-аас Х.Баттулга, Р.Бурмаа, Ж.Батзандан, М.Зоригт нарын гишүүд уг хуулийг энэ оны долдугаар сараас хэрэгжүүлж эхлэх нь зөв гэж санал өгснөөр Засгийн газрын хувь заяа хүндхэн байдалд ороод байна. Хэдийгээр хуулийн төслийн хэлэлцүүлэг цаашид үргэлжлэх ч байдал эрх баригчдад ашигтайгаар эргэх нь юу л бол гэсэн хүмүүс олон байна.

Тэгвэл намынхаа шийдвэрийг сөрж зогссон эдгээр гишүүдийг эхнээс нь “буланд шахах” ажиллагаа хэдийн эхэлсэн гэнэ. Тодруулбал Засгийн газрын гишүүд Х.Баттулга сайдгүйгээр хуралдаж, түүний эсрэг 800 сая орчим төгрөг төсөвлөсөн хар пиарын ажиллагаа эхэлсэн гэх бор шувуу жиргээчдийн дунд газар авсан.

Энэ бүхнээс илүүтэй Ж.Батзанданг намнах ажиллагааг яаравчлан хийхийг эрх баригчид туйлаас их хүсэх болсон гэнэ. Ж.Батзандан 2008 оны долдугаар сарын 01-ний хэргээр түр саатуулахад  сууж байгаад гарч ирмэгцээ АН-ын батлах өвөрлөснөөр тэдний хамгаалалтанд орсон. Гэтэл тус намын нэрээр УИХ-ын сонгуульд нэр дэвшиж гарч ирчихээд эргээд намынхантайгаа хатгалдах болсон нь “Хойноос ирээд хот манайх, хотонд ороод хонь манайх” гэгчийн үлгэр болсон гэж эгдүүцэх залуучууд АН-д олон байна. АН-ын бүлгийн хурал дээр тэрээр Ерөнхий сайд Н.Алтанхуягтай хэд хэдэн удаа  ширүүн авалцсан сураг бий. Намынхан нь түүнийг бүлгийн хурал дээрээ аргадаж байр суурь нэгдээд гардаг ч УИХ-ын чуулганы танхимд ормогцоо хэлсэн тохирсноо мартаад огт өөр зүйл яриад хувийн улстөр хийгээд явчихдаг ойлголцох аргагүй хүн гэж тодорхойлдог. Тиймээс л түүнийг 2016 оны сонгуульд АН-аас нэр дэвшихгүй, одоо бараг намаасаа гарсанд тооцогдсон зэргээр ярьж, ойртож нөхөрлөх хүнгүй болсон гэдэг.

Тэгвэл намынхаа олонхийн шийдвэрийг дагадаггүй Ерөнхий сайдын уурыг үргэлж хүргэж байдаг Ж.Батзанданг хуулийн байгууллагаар шалгуулахаар болсон гэдгийг эх сурвалжууд мэдээллэж байна. Түүнийг шалгуулах хэд хэдэн үндэслэл бий гэнэ.

Хамгийн түрүүнд дуулиант 2008 оны долдугаар сарын 01-ний хэргээр түүнийг буруутгах явдал. Жагсаал цуглааныг тараах, хяналтанд авах явцдаа алдаа гаргасан гэж цагдаагийн дарга нар шийтгүүлсэн байхад хэргийг өдөөн турхирчихаад уснаас хув хуурай мултарсан Ж.Батзанданг яагаад шалгахгүй байна гэсэн үүднээс уг асуудлыг сөхөж тавих болсон байна.

Мөн түүнийг Эрдэнэс Тавантолгой ХК-ийн ТУЗ-ын даргаар ажиллаж байхдаа тус компанид огт ашиглагдахгүй 7 тэрбум орчим төгрөгийн дугуй шахсан тухай мэдээлэл одоогоос яг нэг жилийн өмнө хэвлэлүүдээр бичигдээд өнгөрсөн. Зарим эх сурвалжууд уг дугуйны наймааны 1.2 тэрбум нь Ж.Батзандантай холбоотой нь тогтоогдсон зэргээр бичиж байсан ч тэрээр “энэ бүх асуудлаа хуулийн байгууллагаар шалгуул” гэсэн тайлбарыг өгч байсан юм. Тэгвэл яалтчгүй түүнийг шалгах цаг нь иржээ.  Үүнээс гадна түүнийг шалгуулах хэд хэдэн асуудлыг сөхөж тавихаар АН-ын томчууд тохирсон гэнэ.

Ийнхүү эрх баригчид өөрсдийнхөө бодлого шийдвэрийг дагахгүй гэсэн “эсэргүү” гишүүдээ хуулийн хайчаар тасдан хаях ажиллагааг Ж.Батзандангаар эхлүүлж байна.