Өнөөдрийн хуваарийн дагуу АН-ын бүлэг хуралдаж энэ долоо хоногт УИХ, Байнгын хороогоор хэлэлцэх асуудлуудын талаар хэлэлцсэн байна. Хуралд АН-ын бүлгийн дэд дарга С.Одонтуяа, УИХ-ын гишүүн Д.Зоригт нар оролцож цаг үеийн асуудлаар мэдээлэл өглөө. УИХ дахь АН-ын бүлэг Засгийн газраас өргөн барьсан эдийн засгийг эрчимжүүлэх арга хэмжээний тухай тогтоолын төслийг нэн яаралтай хэлэлцэхийг дэмжиж гэв.   Дээрх тогтоолын төсөлд нийтдээ 23 асуудал тусгагдсан байгаа аж.

Тус 23 асуудлын талаар УИХ-ын гишүүн Д.Зоригт танилцууллаа.  Дээрх асуудлуудад энэ хаврын чуулганы хугацаанд бизнес эрхлэгч, хөрөнгө оруулалтыг сайжруулах бодитой хэд, хэдэн хуулийн төслийг батлах ёстой гэсэн заалтуудыг тусгаж өгчээ. Мөн бизнесийн хөрөнгө оруулалтыг сайжруулж, татварын таатай орчин бүрдүүлэх чиглэлээр бизнес эрхлэгч аж, ахуй нэгжүүдээ дэмжих ажлуудын төлөвлөгөө ч багтсан байна.

 Харин АН-ын бүлгийн зүгээс бизнес эрхлэгчдэд тулгамддаг хүн суртлыг арилгах, түүнд дотроо тусгай зөвшөөрлийг бууруулах шийдлийг гаргаж холбогдох хуулиудад өөрчлөлт оруулах, давхардсан хяналт шалгалтыг багасгах талаар Засгийн газарт чиглэл өгөхөөр болжээ. Мөн Засгийн газрын зүгээс "Эдийн засгийн эрчимжүүлэх 100 хоног" аяныг энэ долоо хоногоос эхлэн явуулах гэж байгаа. Үүнийг нь дэмжиж ажиллана гэдгээ АН-ын бүлгээс мэдэгдлээ.   Монгол улсыг зорьж ирж буй мөнгөний урсгалыг идэвхжүүлэх мөн бусад сувгийг нээхэд тусалсан  хуулиудыг хаврын чуулганы хугацаанд дэмжих хэрэгтэй гэж тус бүлгээс үзэж байгаа аж. Нэн ялангуяа гадаадын хөрөнгө оруулалтын 80 хувийг дангаараа бүрдүүлдэг уул уурхайн салбарын хууль эрх зүйн орчныг хөрөнгө оруулагчдад илүү таатай болгох шаардлагатай гэж үзсэн байна. Үүнтэй холбогдуулж ашигт малтмалын тухай хууль болон газрын тосны тухай хуульд өөрчлөлт оруулах аж.

Энэ үеэр тус бүлгийн дэд дарга С.Одонтуяагаас зарим асуултад тодруулга авлаа.

-Монгол Улсын Ерөнхийлөгчийн санаачилсан “Давхар дээл”-ийг тайлах хуулийн төсөл ирэх долдугаар сарын 1-нээс хэрэгжиж болзошгүй нөхцөл үүсээд байна. Энэ тохиолдолд Засгийн газар унах боломж бүрдэнэ. Сайд нарын 50 хувийг шинээр томилох нөхцөлд Засгийн газар автоматаар унадаг. Үүнээс гарах гаргалгаа юу байна вэ? 

-Шийдвэр эцэслэгдээгүй байна, Засгийн газрын тухай хуульд нэмэлт өөрчлөлт оруулах тухай, Монгол Улсын Их хурлын тухай хуульд өөрчлөлт оруулах тухай хуулийн төслийн эцсийн хэлэлцүүлгийг Төрийн байгуулалтын байнгын хороогоор хийнэ. Унасан саналаа буцааж сэргээхэд гишүүдийн гуравны хоёрын саналыг авах шаардлагатай болно. Магадгүй санал дэмжлэг хүлээхийг үгүйсгэх аргагүй. Дэмжигдэхгүй одоогийн саналаараа хууль батлагдвал Ерөнхийлөгч хуулийн төсөл дээр хэсэгчлэн буюу бүхэлд нь хориг тавих бүрэн эрх бий. УИХ хуулийг ёсчлон баталсны дараа тав хоногт багтаж Ерөнхийлөгч хориг тавих бололцоотой. Гэхдээ энэ бүхнийг урьдчилан хэлэх боломжгүй.

- Ерөнхийлөгч хориг тавина гэж хэлсэн нь үнэн үү?

-Ухаалаг төрийн хэлэлцүүлэг дээр Ерөнхийлөгч “Монгол Улсын Засгийн газар тогтвортой үйл ажиллагаа явуулах ёстой.  Хэрвээ хуулийн өөрчлөлтөөр Засгийн газрыг огцруулах болбол улстөрийн тогтворгүй нөхцөл байдал үүсгэх учраас хориг тавина гэж Ерөнхийлөгч хэлсэн байгаа.

-УИХ-аар Засгийн газрын тухай хуульд нэмэлт өөрчлөлт оруулах тухай хуулийн төслийг хэлэлцэх үед УИХ дахь Ардчилсан намын бүлгийн дөрвөн гишүүн эсрэг кноп дарсан. Дөрвөн гишүүнд Ардчилсан нам хариуцлага тооцно гэх юм, энэ үнэн үү. Хариуцлага тооцсон нөхцөлд яг ямар арга хэмжээ авдаг юм бэ?

-Бүлгийн хуралдаанаар өнөөдөр энэ асуудал яригдаагүй. Мөн хуулийн төсөлтэй холбоотойгоор УИХ-аас эцсийн шийдвэр гараагүй байна.  Ардчилсан намын дүрэмд зохицуулалт байдаг, тэр нь Засгийн газрыг огцруулсан тохиолдолд гэсэн өгүүлбэрээр бий. Тодруулбал, Ардчилсан намын гишүүний өгсөн санал Засгийн газрыг огцруулахад нөлөөлсөн бол тухайн гишүүдийг намаас гаргана.

- Хэрвээ Засаг огцорвол ямар хариуцлага тооцох вэ?

- АН-ын дүрэмд бол хэрвээ дээрх хүмүүсийн санал Засгийн газрыг огцорход нөлөөлбөл намаас арга хэмжээ авна гэсэн байдаг.

- Хувь хүний сонголтын асуудал биш үү?

-Тийм. АН-ын бүлгийн гишүүд хувь хүнийхээ саналыг өгөх эрхтэй. Гэхдээ олонхийн бүлгийн шийдвэрийг дагах үүрэгтэй.