"Шударга ёс" эвслийн бүлэг өнөөдөр хуралдаж Эдийн засгийн эрчимжүүлэх тогтоол гарахтай холбогдуулан эдийн засгийн байдал ямар байгаа талаар Сангийн сайдаас дэлгэрэнгүй мэдээлэл сонсож  Эдийн засгаа эрчимжүүлэх тогтоолын төслийг батлан гаргах нь зүйтэй гэж үзсэн байна. Цаг хугацааны хувьд хоёр үе шаттай арга хэмжээ авагдах талаар тус бүлгийн дарга Н.Батцэрэг хэллээ. Тухайлбал, Улсын баяр наадам хүртэл хаврын чуулганы явцад батлан гаргах шинэ хуулиуд, дараачийн үе шат нь бүхэлдээ эдийн засгаа эрчимжүүлэх талаар юу хийх вэ гэдэг зүйл тусгагдсан байна.

Дараагийн хэлэлцсэн асуудал нь Хяналтийн тухай хуульд өөрчлөлт оруулах тухай хэлэлцсэн байна. Өнгөрсөн намрын чуулганаар тус хуулийн төслийг шадар сайд Д.Тэрбишдагва өргөн барьсан бөгөөд хуулийн төсөлтэй холбогдуулан бүлгийн хуралдаанд  өнөөдөр мэдээлэл өгсөн байна. Энэ хуулийн хэлэлцэх эсэхийг энэ 7 хоногийн байнгын хороо болон Чуулганы нэгдсэн хуралдаан дээр ярихаар болжээ. Хуулийн төсөл дотор асууж магадлах, шинээр томьёолох зүйл олон байсан гэдгийг бүлгийн дарга хэлж байлаа.

Мөн Өршөөлийн тухай хуулийг өргөн бариад удаж байгаа бөгөөд олон нийтийн хүлээж байдаг хууль юм. Хууль санаачлагч Ц.Оюунбаатар гишүүн уг хуулиа ирэх 7 хоногоос хэтрүүлэлгүй хэлэлцүүлэх гэсэн санал гаргаж бүлгийн даргад шаардлага хүргүүлсэн байна. Тиймээс энэ 7 хоногт УИХ-ыд даргад Өршөөлийн тухай хуулийг хэлэлцэх асуудлын дараалалд ирэх 7 хоногоос хожимдолгүй оруулж өгөөч гэдэг хүсэлтийг тавина гэж байлаа.

О.Баасанхүү гишүүн Хуульзүйн сайд Х.Тэмүүжинг огцруулах асуудлыг хөндөн тавьсан. Энэ асуудал Хуульзүйн байнгын хорооны хурал дээр яригдсан боловч зарим зүйлийг тодруулах шаардлагатай гэсэн үндэслэлээр тодорхойгүй хугацаагаар хойшлоод байгаа. харин энэ 7 хоногийн хэлэлцэх асуудлыг жагсаалтад Х.Тэмүжин сайдыг огцруулах эсэх асуудал байхгүй байгаа аж. Бүлгийн дарга Н.Батцэрэг "О.Баасанхүү гишүүн өөрөө хуульч хүний хувьд авсан горимын санал УИХ-ын дэгийн тухай хуулийн 38.2-ийг зөрчиж байгаа гэж үзэж байгаа юм байна. Энэ тухайгаа бүлгийн даргадаа албан бичгээр өгсөн. Бүлгийн гишүүдтэйгээ зөвшилдсөний үндсэн дээр өнөөдөртөө багтаагаад Хуульзүйн байнгын хорооны даргад хандана" гэлээ.

"Шударга ёс" эвслийн бүлгийн дарга Н.Батцэрэгээс зарим зүйлийг  тодрууллаа

"Давхар дээл" тайлах хуулийн төслийн хэрэгжих хугацаа энэ оны 7 дугаар сарын 1-нээс болчихлоо. Засгийн газар огцорч магадгүй гэдэг зүйл яригдаж байна. Шударга ёс эвслийн бүлгийн байр суурь ямар байгаа вэ?

-Огцорно гэдэг үгийг хэрэглэх тохиромжгүй байна. Ерөнхийлөгчийн өргөн мэдүүлсэн хуулийн эцсийн хэлэлцүүлгийг хийхээр хүлээгдэж байна. Хууль эцэслэн батлагдаж гараагүй учрас тэгнэ, ингэнэ гэж  шууд ярьж болохгүй. Олонхийн авсан санал буцаж унах юм бол 3/2 санал шаардагддаг. Тэгэхээр гишүүдийн саналаа өгсөн байдлыг хараад үзэхэд тийм байдал үүсэх үү, үгүй юу гэдгийг хэлж мэдэхгүй байна. Гишүүд өөр, өөрийн бүрэн эрхийн хүрээнд саналаа өгөөд явах байх.

-Д.Батцогт гишүүн бүлгээсээ гарна гэдгээ мэдэгдсэн. Ямар үндэслэлээр бүлгээсээ гарах болсон бэ?

-Д.Батцогт гишүүн би бүлгээс гарна гэдгээ алба бичгээр хандаагүй байна. Тодорхой асуудлын хүрээнд хэлэлцүүлэг өрнөж байхад "Би ер нь бүлгийн хуралд суухгүй" гэж хэлчихээд гараад явсан. Түүнээс биш албан ёсоор хандаагүй байна. Дэгийн тухай хуульд гишүүн бүлгээс гарах гэсэн зохицуулалт байхгүй. Яагаад гэхээр сонгуульд аль нэг субъектээс нэр дэвшсэн бол тэрхүү субъектэй хамтарч ажиллана. Бүлгийн хуралд суухгүй яваад байвал хурал тасладаг гишүүн болно. Дэгийн тухай хуулинд өөрчлөлт оруулах хуулийн төсөл санаачилж өргөн бариад тэрийгээ батлуулж байгаад хийнэ биз. Одоо байгаа хуулийн орчинд бүлгээс гарч болно гэсэн хуулийн зохицуулалт байхгүй байгаа.

-Та бүхний хооронд үл ойлголцсон, санал зөрөлдсөн асуудлууд байгаа юу?

-Тийм зүйл болоогүй. Хувь хүнийхээ хувьд бид хоёр сайн найзууд. Бүлгийн даргын хувьд санаа зовж л байна. Юу болсныг үнэндээ мэдэхгүй байна. 

-Эдийн засгийг эрчимжүүлэх зарим арга хэмжээний тухайд "Монголын баялаг" холдинг байгуулах, нөгөө талаар төрийн өмчийн томоохон аж ахуйн нэгжийг 2014-2016 онд хувьчилна гэсэн заалт оруулсан байна. Мөн  төрийн өмчийн томоохон аж ахуйн нэгжид дэмжлэг үзүүлнэ гэсэн байна. Ер нь эдийн засгийг эрчимжүүлэх тогтоолын төсөл нь яг эдийн засгийг эрчимжүүлэхэд чиглэгдэж байна уу, томоохон компаниудыг дэмжихэд чиглэгдэж байна уу?

-Наад асуудлаар чинь Ерөнхий сайдын саналыг сонсож байсан. Өнөөдөр Сангийн сайдын байр суурийг сонслоо. Бүлэг ямар байр суурьтай байгаа вэ гэхээр нэгдүгээрт Баялаг бүтээгчдийг бүхий л зүйлээр дэмжих ёстой. Тоон үзүүлэлт талаас нь аваад үзэхээр томоохон хөрөнгө санхүү эзэмшдэг компаниуд байдаг мөртлөөсөө эдийн засагт үзүүлж байгаа үр нөлөөлөл сайнгүй байгаа юм. Хувьчлалын тухайд сүүлийн жилүүдэд тодорхой төрийн бодлого гараагүй яваа. Засгийн газар зарим аж ахуйн нэгжүүдийн хувьчлалын асуудлыг хөндөж байгаа. УИХ-аар оруулж ирнэ. 

-Х.Тэмүжин сайдыг огцруулах асуудлыг байнгын хорооны хурлаар хэлэлцэх үед гишүүд тодорхой мэдээлэл авмаар байна гэж байсан. Таны хувьд хэр мэдээллээр хангагдаж байгаа вэ?

-УИХ-ын гишүүн З.Баянсэлэнгэ: Илүү тодорхой мэдээлэлээр хангагдах хэрэгтэй байна гэж Д.Ганбат гишүүн горимын санал гаргасан. Тэр үед мэдээллийг хаанаас авах вэ, Х.Тэмүүжин сайдаас эхлээд тайлбар сонсмоор байна гэдгийг би хэлсэн. Ингээд хэлэлцүүлэг явж байх үед сайд мэдээлэл хийсэн. Нэгэнт горимын санал гарсан учраас санал хураалгаж дэмжигдсэн. Миний ойлгосноор Тусгай хяналтын дэд хороо, Ёс зүйн дэд хороо хуралдаж сайдтай холбоотой асуудлаар заавал шалгалт хийж дүгнэлтээ гаргах ёстой юм байна. Одоогоор дэд хороод энэ асуудлыг авч хэлэлцээгүй юм байна лээ. Бид илүү мэдээлэл хаанаас авах нь тодорхойгүй байна.

-Давхар дээлний асуудлаар та нам, бүлэг эвслийг хооронд нь зөрчилдүүлж байна гэсэн байр суурийг илэрхийлсэн. Таны хэлсэнчлэн эвсэл дотроо хоёр нам зөрчилтэй байна уу?

-Ерөнхийлөгч өөрөө эхлээд энэ бүх маргаан, зөрчилдөөнийг тавьсан хүн шүү дээ. Энэ хуулийн төсөл маань үндсэн хуулиа зөрчсөн учраас УИХ-ын нэгдсэн чуулган дээр бид хэлэлцэх шаардлагагүй байсан. Гэтэл өнөөдөр Ерөнхийлөгч нь хуулиа зөрчөөд оруулж ирсэн хуулийн төсөл дээр гишүүд хэлэлцэх эсэх дээр маргалдаж байна. Ер нь ийм хуулийн төсөл оруулж ирсэн хүн нь өөрөө энэ асуудлыг цэгцлэх ёстой гэсэн байр суурийг илэрхийлсэн. Магадгүй манай эвслийг тараасай, бутраасай гэсэн улс төрийн намуудда өгөөш болох вий гэсэн болгоомжилсон үүднээс хэлсэн.