“Давхар дээл”-ийг тайлахын төлөө саналаа өгсөн АН, “Шударга ёс” эвслийн гишүүдтэй хариуцлага тооцох асуудал эрчимтэй яригдаж эхэллээ. Учир нь өчигдрийн АН-ын бүлгийн хуралдааны дараах мэдээлэл нийгэмд дуулиан тарьж байна. АН-ын бүлгийн дэд дарга С.Одонтуяа хэвлэлийн бага хурал хийхдээ “АН-ын гишүүний өгсөн санал өөрийн Засгийн газрыг огцруулахад нөлөөлсөн бол тухайн гишүүнийг намаас гаргана гэсэн дүрмийн заалт байдаг” гэж мэдэгдэв. Өөрөөр хэлбэл өчигдрийн АН-ын бүлгийн нийгэмд өгсөн гол мессеж ердөө л энэ байв.

    Ийнхүү “давхар дээл”-ийг тайлах ёстой гэж саналаа өгсөн Х.Баттулга, М.Зоригт, Р.Бурмаа, Ж.Батзандан нарын хувь заяа тун бүрхэг боллоо. Ажиглагчдын үзэж байгаагаар бол энэ дөрвөн эрхмийг АН-аас хөөвөл АН нам биш болно. Хамгийн их ардчилал ярьдаг мөртлөө “давхар дээл”-ээ тайлах ёстой гэж саналаа өгсөн гишүүдээ хөөвөл АН жинхэнэ дарангуйлагч хүчин болж хувирна гэж үзэж байна. Харин зарим хүмүүс энэ дөрвөн гишүүнээ дүрмийн дагуу гаргах байх. Хэрэв гаргахгүй бол дүрмээ биелүүлээгүйд тооцно. Тиймээс цаашид АН-ын өмнө дүрмээ биелүүлэх үү, эс биелүүлэх үү гэдэг уулзварын өмнө иржээ.

    Тэгээд ч АН дотор Х.Баттулга, М.Зоригт, Р.Бурмаа, Ж.Батзандан гэсэн “эсэргүү дөрөв”-өө гаргаж байж л цэвэрших ёстой гэж үздэг цөөнгүй эрхэмүүд байгаа мэдээлэл ирлээ. Цаашдаа ч гэсэн энэ дөрөв намын эсрэг санал өгсөөр байх болно гэж тэд үзэж байгаа аж.

    Өчигдөр бүлгийнхээ дуулиант мэдээллийн дараа АН-ынхан хэд гурваараа хуралдаж улс төрийн шийдлийг хайж эхэлсэн гэж эх сурвалж мэдээллээ. Учир нь АН-ын зарим гишүүд бүлгийн дэд дарга дүрэм ярьж, гишүүдээ хөөнө гэж мэдээлэл хийнэ гэж тохироогүй биз дээ. Тэгээд яагаад ийм асуудал ярих болов гэх мэтээр олон зүйлийг ярьжээ. Бас зарим нь олонхтойгоо зөвшилцөөгүй байж дөрвөн гишүүнээ хөөх дүрмийн заалттай гэж хэвлэлийнхний өмнө мэдэгдэл хийсэн бүлгийн дэд дарга С.Одонтуяатай хариуцлага тооцож хөөх ёстой гэж үзэгсэд ч гарч иржээ. Тэгэхээр цагаа тулаад, дүрмээ яриад “эсэргүү дөрөв”-өө хөөх дээрээ тулаад ирвэл тэдний талд орох цөөнгүй гишүүд гарч ирэх бололтой. Ийнхүү АН-ын удирдлагууд дүрэм ярьж, гишүүдээ хөөж магадгүйгээ зарлав. Тэдний шийдэл энэ долоо хоногийн чуулганаас ихээхэн шалтгаална. Учир нь “давхар дээл”-ийг тайлах асуудал энэ долоо хоногийн чуулганаар дахин орно. Тэрний өмнө “эсэргүү дөрөв”-өө айлгаж, намын гишүүдээр дарамтлуулах гэсэн арга нь ч гэж үзэх хүмүүс байна. Харин Х.Баттулга, М.Зоригт, Р.Бурмаа, Ж.Батзандан нар бүлгийн дэд даргынхаа мэдээллийг сонсоод огтхон ч эмээсэн шинжгүй байсан гэж эх сурвалжууд мэдээллээ. Тэд ийм байдалтай байгаа бол энэ долоо хоногийн чуулганд ч гэсэн байр сууриа хамгаалах нь тодорхой юм.

    Үүний зэрэгцээ “Шударга ёс” эвсэлийнхэн өөрсдийн эсрэг санал өгсөн Д.Батцогт, Л.Цог, О.Баасанхүү, Ц.Оюунбаатар гэсэн дөрвөн гишүүндээ бас л хариуцлага тооцох асуудлыг хөндсөн ч нэгдсэн шийдэлд хүрээгүй байна. Тэгээд ч Д.Батцогт эвсэлээс гарахаа зарласан учир түүнтэй хариуцлага ярина гэдэг “оройтсон бороо” болно. Харин Л.Цог, О.Баасанхүү, Ц.Оюунбаатар гуравтайгаан хариуцлага ярих гэхээр нөгөөдүүл нь Д.Батцогтын араас замнах гээд байгаа учир яаж ч чадахаа больжээ.

    Ийнхүү Засгийн газрын эсрэг санал өгсөн гишүүдийн заримтай нь хариуцлага ярьж, заримтай нь хариуцлага ярих утгагүй болон хувирчээ.