Цаг үеийн асуудлаар УИХ-ын гишүүн Ж.Батзандангаас зарим зүйлийг тодрууллаа.

- Сүүлийн үед танай намын дарга нар таныг дарамталж байгаа гэсэн мэдээлэл байна. Энэ үнэн үү?

- Намайг янз бүрээр дарамталж байна. Намаас хөөнө гэх мэтээр дарамталж байгаа. Гэхдээ манай намын одоогийн дарга бол өөрөө дүрмээ зөрчиж сонгогдсон хүн. Намын даргыг намын Их хурлаар сонгодог. Гэтэл Н.Алтанхуяг намын их хурлаас сонгогдоогүй. Үндэсний зөвлөлдөх хороог жил бүр хуралдуулж, шинэчилж байх  ёстой. Мөн намын дотоод байгууллагад цус сэлбэлт хийж залуу үеийг оруулж ирэх ёстой юм. Гэтэл өнөөдөр гурван жил Үндэсний зөвлөлдөх хороог хуралдуулаагүй байна. Энэ өөрөө АН-ыг хоцрогдож байгааг харуулж байна. Энэ намд шинэчлэл хэрэгтэй байна. Харин ч жирийн гишүүн намайг огцруулах асуудлыг ярьж байгаа дарга нартай би тэмцэнэ. Ардчилалаа хамгаалахын төлөө мөн энэ намаа шинэчлэхийн тулд би ажиллана. Цаашлаад АН-ын дүрмийг хэрэгжүүлж, Үндэсний зөвлөлдөх хороог хэрэгжүүлэхийн төлөө би тэмцэнэ.

- Таныг хуулийн байгууллагаар шалгуулна гэсэн. Үнэхээр шалгуулахаар болоо юу?

- Тийм. Намайг шалгуулна гэсэн. Би хариуд нь "Намайг шалгуулах л газар байвал шалгуул" гэсэн. Ер нь би "давхар дээл"-ийг тайлах асуудлаар гаргасан шийдвэртээ үнэнч байна. Тэднийг дарамталлаа гээд бодлоо өөрчлөхгүй. Би бол ард түмний төлөөлөл. Тэдний өмнөөс шийдвэр гаргана. Түүнээс биш намын шийдвэрээр хөдөлдөг хүн биш.

- Удахгүй Төрийн байгуулалтын байнгын хороогоор "давхар дээл"-ийг тайлах хуулийн төсөлд өөрчлөлт оруулах асуудлыг хэлэлцэх гэж байна. Зарим хүмүүс өөрийн эрх ашгийн үүднээс Засгийн газрыг огцруулах нь гэсэн яриа байна. Та үүнийг юу гэж дүгнэж байгаа вэ? 

- Засгийн газрыг огцруулах тухай асуудлыг хэн ч яриагүй. "Давхар дээл"-ийг тайлах тухай асуудал яригдаж байгаа. Цаашлаад давхар дээлтэй явах юм уу дан дээлтэй байх уу гэдэг зүйлийг би асууж байгаа. Надад хандсан манай Баянзүрх, Налайх дүүргийн иргэд бүгд "давхар дээл"ийг тайлж өгөөч гэж хүссэн. Нэг хүн Засгийн газрын гишүүн, УИХ-ын гишүүн, Байнгын хорооны дарга хийснээс болж Монгол төрийн ажил цалгардаж байна. Тийм учраас давхар дээлийг тайлах асуудлыг ярьсан. Түүнээс биш Засгийн газрыг унагах шийдвэрийг гаргаагүй. Харин Засгийн газрыг унагах шийдвэрийг зарим сайдууд нь УИХ-ын удирдлагууд нь өөрсдөө гаргасан. Ж.Батзандангийн ганц кнопоос болоод асуудал ингэж эргэсэн гэж байгаа нь худал. Эдийн засаг уналтад орсон байна. Ард түмний амьдрал доройтсон. Барааны үнэ өдрөөс өдөрт өсч байна. Энэ Ж.Батзандангаас болоод байгаа юмуу. Үгүй шүү дээ.