Төрийн байгуулалтын байнгын хорооны хуралдаан 14.00 цагт эхлэх байсан ч гишүүдийн ирц хүрээгүй учраас хуралдааныг хойшлууллаа.

Тус байнгын хорооны өнөөдрийн хуралдаанаар Засгийн газрын тухай хуульд өөрчлөлт оруулах буюу "давхар дээл" тайлах төслийн эцсийн хэлэлцүүлгийг хийх байсан юм. Гэвч хуралдаанд зургаан гишүүн ирсэн учраас Төрийн байгуулалтын байнгын хорооны хуралдаан ийнхүү хойшилсон юм. Уг асуудалд Төрийн байгуулалтын байнгын хорооны МАН-ын гишүүд  ихээхэн шүүмжлэлтэй хандаж байгаа бөгөөд АН-ынхан албаар ирцээ бүрдүүлэхгүй байна гэдэг шүүмжлэлийг хэллээ.

Ерөнхийлөгчийн өргөн барьсан “Давхар  дээл-ийн талаарх хуулийн төслийн  эцсийн хэлэлцүүлгийг  өнөөдөр хэлэлцэж, нэгдсэн шийдэлд хүрсэн бол ирэх  пүрэв гаригт уг асуудлыг чуулганы нэгдсэн хуралдаанаар авч хэлэлцэх байв. Харин ирцээ бүрдүүлээд хурлыг хуралдуулах боломж байсан уу гэдгийг Төрийн байгуулалтын байнгын хорооны дарга А.Бакейгаас тодрууллаа.

Тэрбээр "АН-ынхан дотооддоо шийдэх асуудал байсан байх. Түүнийгээ хэлэлцээд нэгдсэн шийдвэр гаргасаны дараа хуралд суух боломжтой болох байх. Түүнээс биш ирцийг хүчээр бүрдүүлэхгүй. Ирц бүрдэх боломж бүрдсэний дараа "давхар дээл"-ний асуудлыг байнгын хороогоор хэлэлцэнэ. АН-ын гишүүдэд хоорондоо зөвшилцөх, ярилцах хугацаа хэрэгтэй байсан байх. Тийм учраас би дүгнэлт хэлэхгүй".