Авилгатай тэмцэх газраас жил бүр албан тушаалтнуудын хөрөнгө орлогын мэдүүлгийг авч нийтэд ил болгодог болсоор багагүй хугацаа өнгөрчээ.  Дарга нараа идэж уугаад байна гэж олон жил хардаж явсан Монголчууд эрх мэдэлтнүүдийн хөрөнгө орлого чухам ямар байгааг ил тод мэдэж авах болсноор авилгатай тэмцэх ажилд чамлахааргүй ахиц гарсан гэж үздэг.  Энэ жилийн хөрөнгө орлогын мэдүүлэгт албан тушаалтнууд хэн юу гэж мэдүүлсэн нь олон нийтийн дунд багагүй шуугиан дэгдээгээд байна. Ингээд албан тушаалтнуудын хөрөнгө орлогын мэдүүлгийн сонирхолтой, өрөвдөм, атаархам, бахархам явдлуудаас хамтдаа сонирхоё.

 Байртай болсон нь

 Саяхан л “нэр хугарахаар яс хугар”  нэвтрүүлэгт “нөгөө л чингэлтэйн хашаа байшиндаа амьдарч байгаа” гэж хуучилж суусан эрхэм гишүүн маань 188 сая төгрөгийн орон сууцтай болсноо хөрөнгө орлогын мэдүүлэгтэй тусгажээ. Гишүүний өөрийнх нь орлого 30 орчим сая төгрөг бол, гэр бүлийн гишүүнийх нь орлого 90 сая төгрөг болсон байна. Түүнчлэн 56 саяын үнэтэй автомашинтай болж. Хадгаламжиндаа 10 000 төгрөгийн үлдэгдэлтэй тэрээр 95 сая төгрөгийн зээлтэй. Бодвол найман хувьд хамрагдсан бизээ. Ямартай ч нэг болтугай өрх халуун устай, тохилог орон сууцтай болж байгаад баяр хүргэх хүмүүс олон байна.

Бенз хаачив

Жиргээчдийн хамгийн их сонирхож байсан сэдэв бол Л.Эрдэнэчимэгийн бенз байлаа. Гэтэл түүний хөрөнгө орлогын мэдүүлэг дээр Бенз алга болжээ. Бенз хаачив гэсэн бөөн эрэл сурал жиргээчдийн дунд өрнөж энэ талаар манай хүн хариу ч хэлсэнгүй. Бараг өөрөөс нь ухаантай шахуу компьютержсэн, хүнээр бариулахгүй шахуу хөгжсөн хайран сайхан эдээ эрхэм гишүүн маань хааш нь далдруулсан нь тодорхойгүй байна. Олны егөөдлөөс ичээд ойрын хүндээ зарчихсан ч гэх шиг.

 Эхнэрээрээ тэжээлгэдэг хүмүүс

Энэ жилийн эхнэрээрээ тэжээлгэгчдийн номмунацид УИХ-д анх удаагаа сонгогдсон  О.Содбилэг, удаах байрыг “офшор” хоч зүүх дээрээ тулаад байгаа С.Баярцогт тэргүүлж үүний араас Я.Содбаатар, Д.Батцогт нар удаалжээ. О.Содбилэг гишүүний гэр бүлийн гишүүдийн орлого өнгөрөгч онд 8 сая төгрөг байснаа 1.99 тэрбум болтолоо өсчээ. Өөрийнх нь орлого 27 сая төгрөг. Харин С.Баярцогтын гэр бүлийн гишүүний орлого 974 сая төгрөг бол Я.Содбаатарын гэр бүл 179 төгрөгөөр нөхрөө тэтгэж байна. УИХ-ын нийт 76 гишүүний орлого 132 тэрбум орчим төгрөг болох ба  үүний 85 тэрбум буюу 65 орчим хувь нь гишүүдийн гэр бүлийн орлого байна. “Эхнэрээрээ тэжээлгэдэг” гишүүд буюу гэр бүлийнхэний орлогыг нь намаар ангилж үзвэл 57.3 хувь нь МАН-ынхан, 30.1 хувь нь АН, 9.3 хувь нь эвслийнхэн байна.

 Баян хоосны баларсан хол зөрүү

Ардчилсан намын хамгийн баян гишүүн Л.Болд 33 тэрбумын орлоготой бол хамгийн ядуу гишүүн  Л.Гантөмөр 18.5 саяыг л олсон байх жишээтэй. Харин МАН-ын хамгийн их орлоготой Ж.Энхбаяр гишүүн л гэхэд АН-ын хамгийн баянаас 10 дахин бага буюу 3.3 тэрбумын орлоготой байжээ.  Баян хоосны ялгаа нийгэмд төдийгүй улстөрд их гаарч байна. Гишүүд нийтдээ 46 тэрбумын орлоготой бол үүний 85.9 хувийг АН-ынхан, 10.7 хувийг МАН-ынхан байна. Харин "шударгууд" нийт орлогын 3 хувь буюу 1.3 тэрбумын орлоготой байна. Олон жилийн турш олигархи гэж цоллуулж ирсэн МАН-ынхан үгүйрч, Шинэчлэлийн салхи сэвэлзүүлэгч АН-ынхан зузаарч байгааг эндээс харж болно.

 Сахил хүртсэн биш шал дордов уу

МАК хэмээх Монголын алтны магнат, дэд бүтцийн аварга төслүүдийг хэрэгжүүлэгч компаний эзэн Н.Номтойбаяр УИХ-ын гишүүнээр сонгогдсноор 19 сая төгрөгийн орлоготой болжээ. Гэр бүлийн орлого 0. Түүнд 960 сая төгрөгийн автомашин, 1.6 тэрбумын орон сууц барилга байгаа хадгаламжиндаа 13 сая төгрөгтэй л үлджээ. Ерөнхий сайдтай нэлээд ширүүн авалцаад эхэлснээс хойш МАК компаний үйл ажиллагааг нэлээд дарамтлах болсон гэх бор шувуу их нисдэг. Ямартай ч мань хүн гишүүн болсноороо хөрөнгө орлого нь буурч ядуувтар гишүүний жагсаалтыг голлож байна. Мөн “MCS” группын удирдагчдын нэг Л.Энх-Амгалан өөрийн орлого нь буурагчдын жагсаалтыг тэргүүлж байна. Эдгээр эрхмүүдийн хөрөнгө орлогын байдлыг үзээд сахил хүртсэн биш шал дорджээ гэж хэлэх хүмүүс олон байна.

Адуу минь зүсээрээ сайхан байна даа

Ерөнхий сайд Н.Алтанхуяг нэг ч адуугүй гэжээ. Ерөнхий сайдыг хөдөө орон нутагт очих бүрт нь бараг очсон айл болгон адуу бэлэглэдэг гэлцдэг. Харин Мон-Ураны гэх тодотголтой Х.Наранхүү гишүүн 800 саяар адуу авлаа гэж шуугиулж байсан бол хөрөнгө орлогын мэдүүлэгтээ 107 сая төгрөгийн мал аж ахуйтай гэж тэмдэглэжээ. Хамгийн олон малтай төрийн түшээгээр батлан хамгаалахын сайд, УИХ-ын гишүүн  Д.Бат-Эрдэнэ тодорсон бөгөөд түүний сүрэг 250 адуутай. Харин Ерөнхийлөгч Ц.Элбэгдорж 23 адуу, 5 үхэр, 30 хонь, 23 ямаатай бол УИХ-ын дарга З.Энхболд амины ганц адуутай ажээ.

Машины илүүдэл ба гачигдал.

Хамгийн олон тээврийн хэрэгсэлтэй хүнээр Х.Наранхүү шалгарчээ. Түүний машинууд нийлээд 1.7 тэрбумыг давж байна. Түүний эзэмшилд Rolls Royce phantom-4 ширхэг, Landcruiser-1 ширхэг, mercidesbenz G500-1ширхэг, rangerover -1 ширхэг тус тус байна. Ерөнхийлөгч Ц.Элбэгдорж, УИХ-ын дарга З.Энхболд нар амины тэргээр гачигдаж яваа бол Ерөнхий сайд Н.Алтанхуяг албанаасаа буусан ч LEXUS LX 470, LX 570-тайгаа байна.

Орон гэргүйчүүд ба өрөнд баригдагч

Тэр нэгэн жил “би түрээсийн байранд амьдарч байна” гэж УИХ-ын гишүүн Ц.Нямдорж дуулиан дэгдээж байсан. Харин тэрээр энэ жил орон гэргүйчүүдийн эгнээнээс гарчээ. Гэтэл УИХ-ын гишүүн О.Баасанхүү орон гэргүйчүүдийн эгнээнд орж ирсэн байх юм. Төрийн түшээдээ орох оронгүй явуулаад байна гэдэг муу хэрэг гэж халаглах хүмүүс жиргээчдийн дунд их байлаа. Энэ парламентын хамгийн их өртэй хүнээр эрчим хүчний сайд, УИХ-ын гишүүн М.Сономпил тодроод байна. Тэр нийтдээ 5 742 000.00 өртэй гэдгээ мэдүүлэгтээ бичсэн бол Зам тээврийн сайд А.Гансүх 1 145 922.00 төгрөгийн өртэйгээр удаалж байгаа юм байна.