“Давхар дээл”-ийг тойрсон хэрүүл маргаан тасрахгүй байна. АН-ынхан ямар ч байсан “давхар дээл”-ийн асуудлаа ирэх долоо хоног болтол хойшлуулж дөнгөлөө. Цаашдаа ч хэдэн сар, жилээр ч хамаагүй хойшлуулаад байх боломжтойг эх сурвалжууд мэдээлж эхлэв. Тэр ч бүү хэл байнгын хороон дээр гацаагаад хоёр жил болсон хууль бий гэнэ. Тэр жишигээр АН-ынхан гацаагаад 2016 он хүргэх боломжтой гэж ярих хүмүүс саарал ордноор дүүрч. Хэрэв ийм арга барилыг сонгосон бол АН л хасах оноо авна. Учир нь АН-ынхан сөрөг хүчнээ “улдан чангаагч, асуудлыг түгжээд хэвчихдэг” гэх мэтээр элдэв нэр хоч өгсөөр ирсэн. Тэр нэр хочоо өөрсдөө авахаар нөхцөл байдал үүсчихлээ.

Үүний зэрэгцээ уржигдар орой АН-ынхан шөнө дөл болтол хуралдаж “давхар дээл” тайлах уу? байх уу? гэх мэтээр удтал ярилцаж. Харамсалтай нь олон гишүүн бүлгийн хуралдаа суулгүй утсаа салгаад арилж өгч. Өөрөөр хэлбэл эрх баригч намын дотоод зөрчил улам л гүнзгийрч байна гэсэн үг .

Сүүлийн үед “давхар дээл”-ээ тайлах ёстой гэж саналаа өгсөн гишүүдээ илэрхий гадуурхах болсон нь нийгэмд таалагдахгүй байна. Ардчилсан нам ардчилсан бус болж харагдаж эхэллээ. Энэ байдлаас болсон уу? эсвэл угаасаа тийм бодолтой байсан уу? УИХ-ын дарга З.Энхболд “давхар дээл”-ийг тайлах ёстой гэсэн байр суурьтай гишүүдийг дэмжиж эхэлсэн гэсэн яриа шаргал ордноор их таржээ.

Тэрээр “давхар дээл”-ийг тайлах нь зөв гэсэн сэтгүүлчдийн нийтлэлүүдийг цахим ертөнцөөр түгээж, дамжуулах болсон билээ. Тухайлбал Сэтгүүлч Б.Ганчимэгийн бичсэн “Ард түмэн дан дээлтэй даарч явахад тэд давхар дээлтэй халхалзаж байна” гэсэн нийтлэлийг твитертээ оруулсан нь олон хүний анхаарлыг татав. Үнэхээр ард түмнээ дан дээлтэй хаврын хавсарганд даарч явахад эрх мэдэлтнүүд олон давхар дээлэндээ халууцаж байна шүү дээ. Мөн УИХ-ын дарга З.Энхболд “Шударга ёс” эвслийг “давхар дээл”-ийн асуудлаарх завсарлагаа үргэлжлүүлэх гэхэд зөвшөөрөлгүй одоо шийдэх ёстой гээд алхаа тогшоод авсан. Энэ бүхэн УИХ-ын даргыг “давхар дээл”-ийг тайлах ёстой гэсэн байр суурийг баримталж байгаа гэж хардахад хүргэсэн биз.

Хэрэв УИХ-ын даргын энэхүү байр суурь үнэн бол Засгийн газрын гишүүд “давхар дээл” гарцаагүй тайлах болчихлоо.