Хохирлыг эргэн төлөгдөх нөхцөлөөр барагдуулах тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийн баталлаа.

Энэ хуулийн төсөл нь Хадгаламж зээлийн хоршоодын  хохирлыг эргэн төлөгдөх нөхцөлтэйгээр барагдуулахыг хуульчилж байгаа юм.  Хууль зүйн байнгын хорооны танилцуулгатай холбогдуулан УИХ-ын гишүүд зарим асуултад хариулт авлаа. Тухайлбал, УИХ-ын гишүүн Ж.Батзандан “ХЗХ-ын хохиролыг барагдуулах тухай бид олон жил ярьж байгаа. ХЗХ-ны хохирогчдын хохиролыг барагдуулах тухай хууль батлахад хэний лоббигоор батлагдсан бэ.  Хариуцлагыг зөвхөн иргэдтэй биш эрх мэдэлтнүүдэд ч бас хариуцлага хүлээлгэдэг. Тиймээс ХЗХ-нуудыг дампууруулсан тэр эрх мэдэлтнүүдэд нь хариуцлага тооцох ёстой. Хохирогчдын хохиролын 50 орчим хувийг барагдуулсан. Үлдсэн хөрөнгийг эргэн төлөгдөх нөхцөлтэйгээр хохиролыг барагдуулж байгаа нь хохирогчдын хохиролыг 100 хувь  барагдуулж чадахгүй.  ХЗХ-ны араас Хөгжлийн банк явах байх. Иймэрхүү маягаар төр, ард түмний мөнгийг үрэн тарах хийдэг  тогтолцоо бий болоод байна. ХЗХ-ыг дампууруулсан хэдэн өндөр албан тушаалтан хариуцлага хүлээсэн бэ” гэсэн асуултад Хууль зүйн байнгын хорооны дарга Ш.Түвдэндорж “ХЗХ-ын хохирогчдын хууль хэний лоббигоор батлагдсаныг мэдэхгүй байна. Санхүүгийн зохицуулах хороо  хяналт тавих ёстой. Энэ бол анхнаасаа зохион байгуулалттай луйвар хийсэн гэж хардаж болохоор байна.  Тиймээс үүнтэй холбоотой бүх хүмүүсийг шалгаж байгаа гэж Хууль зүйн яам мэдэгдсэн” гэлээ.

УИХ-ын гишүүн Б.Бат-Эрдэнэ “Ажлын хэсэгт орж байсан хүмүүс хуулийг өргөн барьж байсан зорилгоосоо хазайхаар байна. ХЗХ-ын хөрөнгө мөнгийг хурааж авсан, дундаас нь шамшигдуулсан зүйл олон бий. Үүний цаана эрх мэдэлтэй, албан тушаалтнуудтай холбоотой асуудал яригдаж байгаа. Энэ хүмүүсийг шалгаж байгаа, хариуцлага тооцож байгаа зүйл байна уу” гэсэн асуултад Хууль зүйн байнгын хорооны дарга Ш.Түвдэндорж “Хууль зүйн яам хариуцлага тооцох, шалгаж байгаа гэсэн мэдээллийг өгсөн” гэлээ. Ингээд хуулийн төслийн эцсийн хэлэлцүүлгийг хийж, 71,9 хувийн саналаар хуулийн төсөл батлагдлаа.