- Та АТГ ажил хийлгэхгүй байна гэж хэлсэн. АТГ-ын талаарх хэлсэн үг тань таны  хувийн байр суурь байсан уу. Эсвэл АТГ үнэхээр Засгийн газрыг ажлыг хийлгэхгүй байна уу?

- АТГ-ын хувьд би хувь хүнийхээ байр суурийг илэрхийлээгүй. Ерөнхий сайдын байр суурийг илэрхийлсэн. Эдийн засгийг өсч хөгжихөд АТГ-ын үйл ажиллагаа маш их саад учруулж байгаа. Ялангуяа баялаг бүтээж байгаа хүмүүсийг дарамталдаг, шоронд хийдэг үзэгдэл их болсон. Энэ бол манай нийгэмд байж болзошгүй зүйл.

- Манай улс нүүрсээ гадны орнууд руу маш хямд гаргаж байгаа. Ер нь цаашид нүүрсний экспортод тавих бодлогоо хэрхэн тодорхойлж байгаа вэ?

- Нүүрсний хувьд бид нэг хэсгийг нь түүхийгээр нь гаргана. Нөгөө хэсгийг Ухаа-Хутагт баригдсан нүүрс угаах үйлдвэрээр дамжуулж гаргана. Ер нь цаашид угааж гаргавал нэмүү өртөг шингэж ашигтай болно.

- Эдийн засгийг эрчимжүүлэх ажлыг 100 хоногт хийгээд үр дүн гарна гэж бодож байна уу? Валютын ханш буурч, инфляци нэг оронтой тоонд орж чадах уу?

- Миний хэлсэн дээрх ажлуудыг 100 хоногт хийснээр валютын ханш тогтвортой байна. Эдийн засгийн өсөлт нэмэгдэнэ.

- Далд эдийн засгийг ил болгохдоо хууль эрх зүйн орчныг хэрхэн бүрдүүлэх вэ?

- Өнөөдөр ихэнхи мөнгө бэлнээр эргэлдэж байна. Үүнээс тооцоо гардаггүй. Үүнийг ил болгоно. Мөн бий болгосон өмч хөрөнгө тухайн хүний нэр дээр бичигдээгүй. Энэ мэт өчнөөн олон зөрчил байгаа юм. Энэ чиглэлээр хууль, дүрэм журам гаргана.

- Хятадын банкийг Монголд оруулж ирэх асуудалд Засгийн газар голлох үүрэгтэй оролцож байгаа юу?

- Өнөөдрийн мөрдөгдөж байгаа хуулиар гадны банк оруулж ирэхийг Монгол банк л шийдэх юм байна лээ.

- Эдийн засгийг эрчимжүүлэх ажлын хүрээнд гадны банк, санхүүгийн байгууллагуудтай уулзаж санал солилцоно гэсэн. Ямар байгууллагуудтай уулзах вэ?

- Хамтран ажилладаг Азийн улс орнуудынхаа банк, санхүүгийн байгууллагуудтай уулзаж, ярилцана.

- ТЕГ-ын дэд дарга С.Эрдэнээг ажлаас нь халсан байна. Ямар үндэслэлтэйгээр халсан юм бэ?

- ТЕГ-ын дэд даргыг ажлаас нь би чөлөөлсөн байгаа. Би өөрөө ажилд авсан. Өөрөө сольсон.

- Буянт-Ухаа хороололд оршин суугчдын сонгон шалгаруулалт замбараагүй явагдаж байна гэж иргэд ярьж байна. Үүнийг хэрхэн шийдэх вэ?

- 8000 гаруй хүний өргөдөл ирсэн байгаа. Өргөдлөө ТҮЦ машинаар авсан. Одоо ирүүлсэн материалыг нь нягталж шалгаж байгаа. Энэ нь өөрөө их хугацаа авч байгаа. Бид эцсийн шалгаруулалтыг электрон сугалаагаар сонгоно гэж бодож байгаа. Тэр нь шударга юм байна лээ. Орон сууцны захиалга өгсөн иргэн бүрийн код бичсэн цааснаас сугалж, азтай орон сууцны эзнийг тодруулна. Энэ долоо хоногийн сүүлээр шалгаруулах боломж бий эсэхийг Төрийн орон сууцны корпорацийн зүгээс лавлахад “Амжихгүй” гэх хариулт өгсөн. Тиймээс ирэх долоо хоногт “Буянт-Ухаа” хорооллын орон сууцны азтан шалгарч мэдэх юм байна.

- "Давхар дээл"-ийг тайлах асуудлаар эсрэг санал өгсөн дөрвөн гишүүндээ арга хэмжээ авна гэсэн. Та тэднийг дарамталж байгаа гэдэг нь үнэн үү?

- Намын даргын хувьд миний барьдаг гол чиг шугам бол эв нэгдэл. Гэхдээ манай намынхан аймгуудын АН-ын дарга нартай цахим хурал хийсэн. Аймгийнханаас тэдэнд хариуцлага тооц гэсэн саналыг явуулсан байна лээ.

- Таныг намаасаа хөөнө гэж хэлсэн хэмээн Ж.Батзандан гишүүн ярьсан. Энэ үнэн үү?

 - Буруу мэдээлэл байна. Би намаас хөөдөг хүн биш.