Яг одоо Х.Тэмүүжин сайдыг огцруулах асуудлыг Хууль зүйн байнгын хороогоор хаалттай хэлэлцэж байна. 

Хууль зүйн сайд Х.Тэмүүжинг огцруулах асуудлыг өнгөрсөн долоо хоногт Хууль зүйн байнгын хороогоор хэлэлцэх байсан ч тодорхойгүй хугацаагаар хойшлуулаад байсан юм. Учир нь УИХ-ын гишүүн Д.Ганбат "Хууль зүйн сайдыг сайдыг огцруулах мэдээлэлтэй бүрэн танилцаж амжаагүй.  Тиймээс мэдээлэлтэй танилцах хугацаа хэрэгтэй" хэмээн хойшлуулах горимын саналыг гаргасан юм. Мөн УИХ-ын гишүүн Б.Бат-Эрдэнэ "Х.Тэмүүжин сайдыг огцруулах үндэслэлээс харахад олон ноцтой зүйлийг хөндөж. Хууль зүйн сайдтай холбоотой "Хар тамхины хэрэг хаашаа хөтлөв” нийтлэл өдөр тутмын сонинд гарсан болон өөрийн твиттер хуудаснаа жиргэсэн жиргээнүүдээс харахад ноцтой баримтууд байна. Ийм ноцтой зүйлийн талаар зөвхөн Хууль зүйн байнгын хорооноос гадна бусад УИХ-ын гишүүд ч мэдээлэл авах ёстой" гэсэн билээ.

Дээрх саналын дагуу уг асуудал хойшилсон ч энэ долоо хоногт Байнгын хороогоор хэлэлцэх асуудлын жагсаалтанд албан ёсоор тусгагдаагүй байсан юм. Гэтэл өнөөдрийн чуулганы хуралдааны дараа уг асуудлыг хэлэлцэх болсныг гэнэт зарласаны дагуу хуралдаж байгаа нь энэ аж.

 Дашрамд дурдахад, УИХ-ын гишүүн О.Баасанхүү Хууль зүйн сайд Х.Тэмүүжинг огцруулах тогтоолын төслийг өргөн барьсан. Тэрбээр Хууль зүйн сайд Х.Тэмүүжинг хууль зөрчиж, хариуцлага алдсан, салбараа удирдах чадваргүй гэсэн гурван үндэслэлээр огцуулах хүсэлт гаргаад байгаа юм.