УИХ-ын чуулганы нэгдсэн хуралдаанаар Эдийн засгийг эрчимжүүлэх тухай УИХ-ын тогтоолын төслийг хэлэлцээд маргааш дахин үргэлжлүүлэхээр болов.

Энэ үеэр гишүүд Эдийн засгийг эрчимжүүлэх асуудлаар гишүүд байр сууриа илэрхийлсэн юм.

 УИХ-ын гишүүн Д.Оюунхорол “Өмнөх парламентын үед Сангийн сайдаар ажиллаж байсан УИХ-ын гишүүн С.Баярцогт Төсвийн тогтвортой байдлын тухай хуулийг батлуулж байхдаа “Төсөв, санхүү гайхамшигтай сайхан болно” гэсэн. Гэтэл Төсвийн тогтвортой байдлын тухай хууль хэрэгжиж эхэлсэн анхны жилээсээ зөрчигдсөн. Ийм байж таарахгүй” гэсэн хатуухан үгийг Засгийн газарт хандан хаягласан юм.

Тэгвэл УИХ-ын гишүүн Л.Эрдэнэчимэг эдийн засгийг сэхээхэд хэмнэлт чухал гэв. Хэмнэлтийг төр өөрөөсөө эхлүүлэх, мөн жижиг бизнес эрхлэгчдээ дэмжих ёстой гэлээ. Энэ тухай тэрээр “Баялаггүй орнууд жижиг бизнес эрхлэгчдээ маш сайн дэмждэг. Татвараар дарамталдаггүй. Энэ нь хүн өөрөө өөртөө ажлын байр бий болгодог, цаанаа 2-3 хүнийг ажлын байраар хангадаг. УИХ-ын намрын чуулганы завсарлагаанаар УИХ-ын гишүүд Австрали улсад ажиллахад нийт ажлын байрны 45 хувийг жижиг бизнесийнхэн бий болгодог, түүнийгээ дагаад Хувь хүний орлогын албан татвараас маш их хэмжээний мөнгө орж ирдэг байгаатай танилцсан. 

Гэтэл манай бизнес эрхлэгчид сар бүр НӨАТ-ын тайлан өгнө гэдэг маш том ажилтай суудаг. Жижиг бизнесийнхэнд түрээсийн дарамт маш их. Зээл авахад барьцаа шаарддаг, гэтэл барьцаа байдаггүй. Жижиг бизнес эрхлэгчдийн 80 гаруй хувь нь эмэгтэйчүүд. Эмэгтэйчүүдэд барьцаа байдаггүй. Дээр нь шалгалт, дарамт ихтэй гэсэн юм.