Яг одоо чуулганы хуралдаанаар “Эдийн засгийг эрчимжүүлэх зарим арга хэмжээний тухай” тогтоолын төслийг үргэлжлүүлэн хэлэлцэж байна. Уг тогтоолын төслийг Засгийн газраас өнгөрсөн долоо хоногт нэн яаралтай хэлэлцүүлэхээр өргөн мэдүүлсэн юм.

Уг асуудлыг хэлэлцэх үеэр Н.Энхболд гишүүн “Өндөг, будаа идэхгүй амьдрах нь монголчуудын жам ёсны амьдрал юм уу. Бүсээ чангалах нь танай Засгийн газрын гол бодлого уу” гэж асуулаа.

Харин Н.Батбаяр сайд “Өнөөдөр бүх зүйл сайхан биш байгаа. Амьдралд бэрхшээлтэй зүйл олон байна. Үүнийг сайжруулаад алдаагаа засаад явах нь Засгийн газрын хийх ажил.  Ханш өссөн. Ханшийг дагаад үнэ өсч байна. Үнийг дагаад амьдрал хэцүүдэж байна. Ханшийн өсөлтөд нөлөөлсөн гол гурван зүйл нь экспортын барааны үнэ дэлхийн зах зээлд унасан. Оюутолгойн хөрөнгө оруулалт буурсан. Ур нь явуулж байсан алдаатай бодлогын үр дагавараас үүдэлтэй. Ханш чинь урт хугацааны угшилтай байсан юм. Үүнийг манай Засгийн газар шийднэ. Гэхдээ манай гадаад худалдааны алдагдал буураад л байгаа шүү дээ. Энэ  нь эргээд ханш тогтворжих эдийн засгийн нөхцөл болж байгаа юм. Импорт 14.4 хувиар буурсан. Эрдэс баялагийн үнэ дэлхийн зах зээл дээр унасан нь бас эдийн засагт муугаар нөлөөлж байгаа. Тэгэхээр бид экспортоо нэмэгдүүлнэ. Гадаадын хөрөнгө оруулалт буурсан нь үнэн. Энэ нь дэлхийн эдийн засаг муудсантай холбоотой.  Тэгэхээр бид өөрсдөөсөө хамааралтай зүйлээ хамтдаа хийе" гэж хариуллаа.