Яг одоо чуулганы хуралдаанаар “Эдийн засгийг эрчимжүүлэх зарим арга хэмжээний тухай” тогтоолын төслийг үргэлжлүүлэн хэлэлцэж байна. Уг тогтоолын төслийг Засгийн газраас өнгөрсөн долоо хоногт нэн яаралтай хэлэлцүүлэхээр өргөн мэдүүлсэн юм.

Энэ үеэр УИХ-ын гишүүн Г.Уянга “Эдийн засгийг эрчимжүүлэх тогтоолын нэгт Ашигт малтмалын тухай хуулийн төслийг боловсруулна гэсэн нь Урт нэртэй хуулийн эсрэг схем байна гэж би хардаад байна. Үнэхээр тэгэх гэж байгаа бол энэ заалтыг би дэмжих боломжгүй. “Оюутолгой” 34 хувийг хувьчлах асуудал яригдаж байгаа гэсэн. Тиймээс энэ асуудлыг эсэргүүцэж байна. Эдийн засгийн хүндрэлээс гарахын тулд ийм арга хэрэглэхийг дэмжихгүй” гэж асуув.

Түүний асуултанд Уул уурхайн сайд Д.Ганхуяг “Урт нэртэй хуульд өөрчлөлт орохгүй. Дагаж мөрдөх журмын тухай хуульд өөрчлөлт орж байгаа. Бид урьчилж хараагүй гол мөрөнтэй газраа лиценз олгосон.  Төрийн албан хаагчийн буруу ажиллагаанаас хайгуулын зөвшөөрөл өгсөн гээд олон асуудал үүсч буй. Үүн дээр хамтдаа шийдвэр гаргах ёстой. “Оюутлгойн” ХХК-ийн 34 хувийг зарах талаар яриагүй. Гадаад, дотоодын хөрөнгийн бирж дээр үнэлэгддэг асуудлыг судалж үзье гэж тусгасан.  Гэрээгээр болон Монгол Улсын хуульд заасан үүргээ биелүүлээд хийх байхаа гэж бодож байна” гэж хариуллаа.

УИХ-ын гишүүн Д.Ганбат “Эдийн засагт төр хэтэрхий оролцож байна. 20 гаруй жагсаалт биш дорвитой хоёр, гурван хувилбар гаргах ёстой. Эдийн засаг хүндэрсэн үед аль хэсэгт нь нөлөөлөх вэ гэдгийг сайн судлах ёстой. Үүнээс гадна валютын ханшийг тогтворжуулах дээр ажлын хэсэг байгуулах нь зүйтэй байх.  Хэрэв бүс чангалах гэж байгаа бол төр бас бүсээ чангалах ёстой байх Мөн бондын мөнгийг ашиг олох зүйлд зарцуулсан уу.  Бондын зөвлөл ямар нэгэн хариуцлага хүлээх сүбьект мөн үү” гэж асуулаа.

Харин Н.Батбаяр сайд “Бондын мөнгийг экспортыг дэмжих, импортыг орлох төсөлд зарцуулж байгаа. Мөн Таван толгойн гүний уурхай болон эрчим хүчний цахилгаан станц барихад зарцуулсан. Бас төмөр, цементийн үйлдвэрлэл,  гудамж төсөл, шугам сүлжээтэй холбоотой газарт, хөнгөн хүнсний үйлдвэрлэлд зарцуулсан. Мөн аймгуудыг хар замтай холбох ажилд бондын мөнгийг ашиглаж байгаа. Бас орон сууцны найман хувийн тогтолцоог бий болгоход гол суурь нь бондын мөнгө байсан.  Монгол улс анх удаа өөрийн гэсэн онгоцтой болсон. Цаашид энэ мөнгөөр үйлдвэржилтээ дэмжинэ. Бондын зөвлөл нь олон туршлагатай эдийн засагчаас бүрдсэн байдаг" гэсэн хариултыг өгөв.

Хэлэлцүүлэг үргэлжилж байна.