“Шударга ёс” бүлгэмийн тэргүүн Галигаагийн Баярсайхантай ярилцлаа.

    - Сүүлийн үед танай “Шударга ёс” бүлгэм хэвлэлийн хурал хийж, мэдэгдэл гаргаад их идэвхтэй байх шиг?
    - Идэвхтэй байхгүй бол болохгүй цаг үе байна. Засгийн газрын тухай хуульд нэмэлт, өөрчлөлт оруулах тухай Ерөнхийлөгчийн санаачилсан хуулийн төсөлд буй хууль хэрэгжиж эхлэх цаг хугацааг наашлуулан, тогтвортой ажиллаж буй Засгийн газрыг унагах тоглоом болгож хувиргалаа. УИХ дахь МАН-ын гишүүд, АН тэргүүтэй эвсэлийн нэр бүхий 8 гишүүнтэй хуйвалдан энэ санаархалаа хэрэгжүүлэх гэж улайран оролдож байна. Одоо засаг төрөө бужигнуулж, албан тушаал булаалдаж суух цаг биш. 2012 оны ялагчгүй сонгуулийн дараа арайхийн эвсэл байгуулж, Засгийн газраа Үндсэн хуулийн дагуу бүрдүүлсэн. Одоо ямар Засгийн бүрдүүлэх гээд байгаа юм бэ, арай МАНАН-гийн Засгийн газар байгуулах гэсэн хуйвалдаан явж байгаа юм биш биз. Тэгвэл манай бүлгэм эрс хатуу тэмцэнэ. Одоохондоо МАН-ын гишүүд Засгийн газарт орох гэж сонирхоогүй гээд байгаа, цагаа тулахаар яаж ч эргэж буцаж мэдэх хүмүүс. Эсвэл 1996-2000 онд сөрөг хүчин байхдаа Ардчилсан холбоо эвсэлийн Засгийн газруудыг эвсэлээсээ урваж шарвасан гишүүдтэй хуйвалдан унагаж, улс төрийн ашиг хонжоо гаргаж байсан муу зуршилаа давтахыг хичээж байна. АН тэргүүтэй эвсэлд намын бодлогодоо захирагддаггүй, дур зоргоороо загнадаг гишүүн цөөнгүй байгаа нь ил боллоо. Эдгээр хүмүүс МАН-д хямдхан өгөөш болж байна, ийм нөхцөлд хэн нь эрх баригч вэ гэдэг ч ойлгомжгүй болчихлоо.

    - “Давхар дээл”-ийн асуудлыг үргэлжлүүлэн хэлэлцэх ёстой байсан УИХ-ын Төрийн байгуулалтын байнгын хорооны хурлын ирц хүрээгүй гэсэн шалтгаанаар хойшиллоо?
    - Үндсэн хуульд: “УИХ-ын, Засгийн газрын гишүүний ажлыг хавсарч болно” гээд заачихсан байгаа. Үндсэн хуульд өөрчлөлт оруулаагүй цагт “давхар дээл” тайлах хуулийн төсөлийг хэлэлцэх шаардлагагүй. Үндсэн хуулийн агуулга, үзэл санаанд харшлах хуулийн төсөлийг УИХ хэлэлцэж болохгүй. Тэгэхээр УИХ-ын Төрийн байгуулалтын байнгын хорооны хурлын ирц хүрэхгүй байхаас өөр аргагүй, УИХ-ын гишүүд буруу юманд орооцолдсоноо ойлгоод эхэлчихэж гэж үзэж байна. Ер нь энэ асуудал мордохын хазгай гэдэг л болсон.

    - Засгийн газрын үйл ажиллагаанд сэтгэл дундуур байгаа хүмүүс ч цөөнгүй байх юм?
    - “Давхар дээл” тайлах тухай асуудал намар, хаварын чуулган дамжин үргэлжилж, Засгийн газрын тогтвортой байдлыг алдагдуулж мэдэхээр боллоо. Энэ мэтийн хоосон улс төржилт ажлын садаа болж байна. 2013 онд бүтээн байгуулалтын ажил маш эрт эхэлж, сайн гүйцэтгэлтэй байсан. Одоо энэ Засгийн газар улс төрийн хүнд дарамт шахалтан дор ажиллаж байна гэвэл дэгсдүүлсэн болохгүй. Ийм хүнд нөхцөлд Засгийн газраас Эдийн засгийг эрчимжүүлэх 100 хоногийн хөтөлбөр дэвшүүлж байгаа юм байна. УИХ-ын зарим гишүүд энэ хөтөлбөрийг муулж баалж л байна лээ, харин манай бүлгэм Шинэчлэлийн Засгийн газарт энэ хөтөлбөрөө амжилттай хэрэгжүүлэхийг хүсч байгаа. Ялагчгүй сонгуулийн дараа Үндсэн хуулийн дагуу олонхийг бүрдүүлж байгуулагдсан эвсэлийн Засгийн газарт итгэхгүй юм бол өөр юунд итгэх юм бэ.