Сүүлийн үед “давхар дээл”-ний асуудал, эдийн засгийн хүндрэлийг олны анхаарлаас холдуулахын тулд эрх баригчид өөр сэдэв хайх болсон. Тэд эрэл хайгуулын явцдаа УИХ дахь сөрөг хүчний даргын чуулганы хуралдааны үеэр хэлсэн үгийг шүүрч аваад бөөн асуудал болгосон юм. Энэ маргааны эцсийн цэгийг Ерөнхийлөгч Ц.Элбэгдорж хатгалаа.

Учир нь “Мал өслөө, эдийн засаг сайжирлаа. Шинэчлэлийн Засгийн газрын ажлын үр дүн” гэх мэт утгатай байр суурийг Засгийн газрынхан чуулганы хуралдаанд илэрхийлсэн юм. Харин үүнд нь сөрөг хүчний бүлгийн дарга С.Бямбацогт бухимдаж “эдийн засаг уруудан доройтсон”, “малыг хуц ухна хээлтүүлсэн, Засгийн газар өөрсдийн хийсэн ажлаа болгож ярих нь утгагүй” гэсэн агуулгатай үгийг хэлсэн юм. Үүнийг Засгийн газрынхан шүүрч аваад гуравхан хоногийн дараа хэдэн малчид авчирч “малчдын хөдөлмөрийг үгүйсгэлээ” гэсэн хэвлэлийн бага хурал хийлгүүлж бас дараа нь мэдэгдэл гаргуулсан.

Харин олон нийт С.Бямбацогт ортой л үг хэлсэн. Үүнд Засгийн газар эмзэглээд малчдын төлөөллийг цуглуулж хэвлэлийн бага хурал хийлгээд байгаа нь дэндүү инээдтэй хэрэг. Үүнийхээ оронд уруудаж доройтсон эдийн засгаа босгох хэрэгтэй гэсэн байр суурийг илэрхийлэх болсон. Тэгээд ч энэ Засгийн газар малчдын талаарх, мал аж ахуйг хөгжүүлэх бодлого болсон “Монгол мал” хөтөлбөрийг зогсоочихоод яаж малчдад хайртай болж чадаваа гэж ярих иргэдийн тоо нэмэгдэв.

Тэгвэл энэ асуудлын талаар Ерөнхийлөгч Ц.Элбэгдорж өчигдөр UBS телевизэд яриа өгөхдөө ч байр сууриа илэрхийлээд авав. Тэрээр “Монголчууд чинь буруу ярьж зөв ойлгодог гэдэг. Ер нь улс төрд орж байгаа залуу хүмүүс алддаг. Би бол үгнээсээ болж асар их өөлүүлдэг хүн. Жаахан алдсан байж болно. Алдаагаа засаад явах хэрэгтэй. Энэ дээр ерөөсөө тийм сүртэй асуудал биш. Шүүмжиллээ гэж гомдоллох хэрэггүй. Магадгүй тэр хүний ярьж байгаа яриаг бэлдэж өгсөн хүн нь буруу хийж өгсөн байж магадгүй. Мэдээлэл нь буруу байж магадгүй” гэх мэтээр ярив. Мөн улс орны эдийн засгийн тулгамдсан асуудал их байхад жижигхэн зүйлээр хөөцөлдөөд байж болохгүй талаар ч Ерөнхийлөгч яриан завсараа дурдав. Ийнхүү хуц, ухны яриаг улс төржүүлэх утгагүйг Ерөнхийлөгч эвтэйхнээр тайлбарлав.