“Давхар дээл”-ээ тайлахгүйн тулд эрх баригчид олон гарц хайж эхэлжээ. Тийм ч учраас өнгөрсөн долоо хоногийн Төрийн байгуулалтын байнгын хорооны хуралд АН-ынхан суулгүй хойшлуулсан юм. Тэд удтал ярилцаж байгаад мэргэн санаа олжээ.

Эдийн засаг хүндэрчихлээ. Нөхцөл байдал буруудлаа. Олон нийтийн бухимдал өдөр өдрөөр нэмэгдэж эхэллээ. “Давхар дээл”-ийг тайлахыг бүхий л түвшинд ярих боллоо. Тиймээс бүгдээрээ огцорч байхаар зарим хариуцлагагүй сайд нараасаа огцруулах нь илүү нэр цэвэр харагдана. Тэгээд ч сөрөг хүчний шахалтаар биш өөрсдөө огцруулах нь зөв. Засгийн тэргүүнийг ч олон нийт хүчтэй байгааг харах болно. Олон түмэн ч хариуцлага тооцлоо гэж үзнэ гэжээ. Ингээд зарим сайд нарыг огцруулах асуудлыг гурван түвшинд ярилцжээ. Нэгдүгээрт хамтран засаг барьж байгаа АН, “Шударга ёс” эвслээс адилхан тооны сайд огцруулья гэж ярилцжээ. Хоёрдугаарт зарим сайдыг огцруулах нь Засгийн нэр хүндэд, ерөнхий сайдад хэрэгтэйг Ерөнхийлөгч зөвлөжээ. Тэрээр энэ тухай амралтын өдөр ярилцлага өгөхдөө “Болохгүй байгаа сайдуудаа Ерөнхий сайд нь чихдээд оруулаад ирэх ёстой. Эхлээд гурван сайд, дараа нь дөрвөн сайдыг огцруулчих. Миний тэвчээр барагдаж байна. Би нилээд хэдэн сайд нарыг дуудаж өргөдлөө өг гэж загнасан. Н.Алтанхуягт ч хэлсэн. Зарим сайд Монголд гай болж байна. Тэднийг явуулах ёстой. Ерөнхий сайд ярьсан сайдуудаа оруулаад ирэх биз” хэмээн ард түмний өмнө пал хийтэл ярьчихсан. Өөрөөр хэлбэл зарим сайдыг өөрсдийн санаачилгаар огцруулах талаар Ерөнхийлөгч, Ерөнхий сайд хоёр сайтар зөвлөлджээ. Тэгээд ч өмнө Ерөнхий сайд Н.Алтанхуяг нэгэнтээ “Би хариуцлагагүй сайд нартайгаа өөрөө хариуцлага тооцно” хэлсэн. Тэр хэлсэндээ хүрэхээр шулууджээ.

Гуравдугаарт хэнийг огцруулж, хэнийг томилох талаар бүлэглэлүүдийн тэргүүнүүдтэй энэ долоо хоногоос яриагаа эхлүүлэх гэнэ.

Ингээд Н.Алтанхуяг намынхантайгаа удтал ярилцаад АН-аас Эдийн засгийн хөгжлийн сайд Н.Батбаяр, Уул уурхайн сайд Д.Ганхуяг хоёрыг огцруулахаар бараг л тохирчээ. Учир нь Н.Батбаяр сайдыг удаа дараа хариуцлагагүй мэдэгдэл хийхээс гадна “Чингэс”, “Самурай” бондуудын зарцуулалтыг буруу хийсэн гэж үзжээ. Харин Уул уурхайн сайд Д.Ганхуягийг хөрөнгө оруулалтыг татах талаар сайн ажиллаагүй, “Оюутолгой”-той ойлголцоогүй гэж үзжээ. Мөн түүний талаар дэлхийн санхүүгийн хамгийн том хэвлэл болох “Financial times” “dickhead” (тэнэг толгой, махан толгой) хэмээн бичсэн нь ч нөлөөлжээ. Ерөнхийлөгчийн “Зарим сайд Монголд гай болж байна” гэж хэлсэн үг ч үүнтэй холбоотой байж мэднэ гэж эх сурвалж мэдээллээ.

Харин “Шударга ёс” эвслийн удирдлагын нэг болох Шадар сайд Д.Тэрбишдагва, Ерөнхий сайд Н.Алтанхуяг хоёр удаа дараа ярилцаад Сангийн сайд Ч.Улаан, Эрүүл мэндийн сайд Н.Удвал хоёрыг огцруулах нь нийгмийн хүлээлттэй нийцнэ гэж тохирчээ. Ингээд эхний ээлжинд огцруулахаар өргөн барих дөрвөн сайдын нэр Н.Алтанхуягийн өмнө бэлэн болжээ. Тэр энэ дөрвөн эрхмийнхээ асуудлыг тун ойрын хугацаанд өргөн барих гэнэ.

Хэрэв энэ дөрвийг “давхар дээл”-нээс өмнө түрүүлээд өргөн барьчихвал улс төрд нилээд бужигнаан үүснэ. Ерөнхийлөгчийн хэлдэгээр “хугацаа авах” ажиллагаа эхэлнэ. Тэгвэл “давхар дээл”-ийг тайлах асуудлыг хэлэлцтлээ удахаар нөхцөл байдал бий боллоо гэж ажиглагчид дүгнэж байна. Үйл явдал ингэж өрнөвөл улс төр дэхь маргаан, үл ойлголцол ихээхэн цаг авахаар болчихлоо. Мөн Сангийн сайдыг УИХ дотроосоо томилчихно. Нөгөө гуравыг нь гаднаас томилно. “Давхар дээлт”-үүд цөөрнө. Олон нийт зөв гэж үзнэ. Ерөнхийлөгчийн шахалт багасна хэмээн тооцоолжээ. Үүнийг АН-ынхан хамгийн зөв хувилбар гэж үзжээ.