АН-ын Хяналтын Ерөнхий хороо хуралдаж УИХ-ын гишүүн Р.Бурмааг намаас хөөх шийдвэр гаргаад байна. Үүнийг ҮЗХ хуралдаж баталгаажуулбал Р.Бурмаа УИХ-ын гишүүний бүрэн эрхээс түтгэлзэхэд хүрэх юм. УИХ-ын чуулганы нэгдсэн хуралдаанаар давхар дээлийг тайлах хуулийн төслийг хэлэлцэх үед намынхаа эсрэг санал өгсөн гэгдэж буй дөрвөн гишүүнд хариуцлага тооцох ёстой гэсэн байр суурийг тус намын гишүүд илэрхийлж хяналтын хороондоо хандснаар Р.Бурмааг намаас хөөх шийдвэрийг ийнхүү гаргаад байгаа. Харин энэ тухай тэрээр "Өнгөрсөн баасан гарагт хяналтын ерөнхий хороо хуралдаж байна, та ирж оролцоно уу? гэж  ярьсан. Яг тэр үеэр би хотоос гадуур явж байсан болохоор "урьдчилж мэдэгдэхгүй дээ" гээд хуралд сууж чадаагүй. Тэгсэн намаас хөөх тухай шийдвэр гарсан гэж дууллаа. Одоогоор хяналтын ерөнхий хорооны шийдвэр албан ёсоор ирээгүй байна" гэж хэлсэн байна.Түүний асуудлыг өөрийг нь байхгүй үед хэлэлцэж шийдвэр гаргасанд тэрээр ихэд гайхаж, бухимдаж байгаагаа ийнхүү илэрхийлэв.