УИХ дахь "Шударга ёс" эвслийн бүлэг хуралдаж, хэд, хэдэн асуудлыг хэлэлцсэн байна. Тэд энэ долоо хоногт УИХ-ын нэгдсэн чуулганаар хэлэлцэх асуудлын талаар байр сууриа нэгтгэсэн байна. Тодруулбал, Засгийн газраас өргөн мэдүүлсэн "Эдийн засгийг эрчимжүүлэх зарим арга хэмжээний тухай УИХ-ын тогтоолын төслийн" талаар санал солилцсон байна. "Шударга ёс" эвслийн бүлгийн гишүүд дээрх тогтоолын төслийг ерөнхийд нь дэмжиж байгаа бөгөөд зарим нэг зүйлтэй санал нийлэхгүй байгаа аж. Тогтоолын төсөлд амьдралд нийцэхгүй зарим зүйл заалт байгааг бүлгийн дарга Н.Батцэрэг онцолсон. Тиймээс тус бүлгээс маргааш эдийн засагчид болон салбарын хүмүүсийг цуглуулсан өргөн цар хүрээтэй хурлыг зохион байгуулахаар болжээ. Уг ажлыг  зохион байгуулах ажлын хэсгийн ахлагчаар бүлгийн гишүүн Ц.Оюунбаатар ажиллаж  байгаа аж.

  Түүнчлэн энэ долоо хоногт чуулганы нэгдсэн хуралдаанаар Авто замын тээврийн тухай хууль хэлэлцэхтэй  холбогдуулж бүлгийн хуралдаанаар  Зам тээврийн сайд А.Гансүхээс  мэдээлэл сонсох гэсэн боловч тэрбээр ирээгүй байна.  Харин орон тооны бус ажилтан Мөнх-Од гэдэг хүнийг явуулсан нь бүлгийн гишүүдэд сайшаагдаагүй гэдгийг хэллээ. Учир нь "Шударга ёс" эвслийн бүлэг Зам тээврийн сайд А.Гансүхийг өмнө нь бүлгийн хурал дээрээ дуудаж мэдээлэл авахыг хүссэн боловч ирж байгаагүй аж. Тиймээс дээрх явдалд бүлгийн дарга Н.Батцэрэг дургүйлхэж байгаагаа илэрхийлсэн юм. Мөн тэрбээр " УИХ дахь намын бүлэг гэдэг бол хууль батлах, гаргах томоохон субьект.  Үүнийг үл тоож бүлгийн хурал дээр мэдээлэл хийхгүй өнгөрөх нь байж боломгүй асуудал.  Тиймээс А.Гансүх сайд өөрийн эрх үүргийн ажлаа өөрөө хийж, биелүүлэх ёс той" хэмээн мэдэгдлээ. 

УИХ дахь МАХН-МҮАН-ын Шударга ёс эвслийн бүлгийн дарга Н.Батцэрэгээс цаг үеийн асуудлаар зарим зүйлийг тодрууллаа.

-УИХ-ын гишүүн Д.Батцогт бүлгээсээ бүр мөсөн гарсан гэж ойлгож болох уу, бүлгийн гишүүд энэ асуудлаар санал солилцсон уу?

-Бүлэг дээр энэ асуудлаар санал солилцсон. Д.Батцогт гишүүн өөрөө надад албан бичиг ирүүлсэн. Тэр албан бичиг дээр УИХ-ын тухай хуулийн 26.11 дээр заасанчлан бүлгээс гарах хүсэлтийг шийдвэрлэж өгнө үү гэсэн байсан. УИХ-ын тухай хуулийн 26.11 дээр бол их хурлын гишүүн нэг бүлгээс гарч нөгөө бүлэгт орох харилцааг л зохицуулдаг юм билээ. Түүнээс биш бүлгээс гараад сул гишүүн болох зохицуулалт биш юм. Тиймээс яг тэр хандсан албан бичгийнх нь дагуу би шийдвэрлэж өгөх бололцоогүй. Ийм хариуг л Д.Батцогт гишүүнд өгнө дөө.Мөн түүний хувьд Шударга ёс эвслийн бүлгээс л гарч байгаагаас биш аль нэг өөр намд элсэхгүй, МҮАН-д хэвээрээ үлдэнэ гэсэн. Түүнээс гадна Д.Батцогт гишүүн хувийн шийдвэрээсээ илүү сонгогчид, эвсэл, намынхаа эрх ашгийг түрүүнд нь тавих ёстой байсан болов уу гэж бодож байна Д.Батцогт гишүүн бүлгээс гарах шийдрийнхээ талаар "өөрийн бодол өөртөө зөв" хэмээн ярьсан байна лээ.  Энэ бол өөр асуудал.  Хэрвээ Дорж, Дулмаагийн асуудлыг ярьж байгаа бол өөрийн хувийн бодлыг ярьж болно.  Харин олны түмний санал авч, мандат өвөртлөөд гарч ирсэн хүн бол олон түмний эрх ашгийг нэгдүгээрт тавих ёстой байсан.  Д.Батцогт гишүүн бүлгээс гарах өөр нэг шалтгаанаа намын тохиролцоо зэргийг хүлээн зөвшөөрөхгүй  гэж хэлсэн байна лээ.  Хэрвээ улс төрийн тохирооны талаар мэдэж байгаа бол түүнийгээ олон нийтэд дэлгэх хэрэгтэй.  Тийм зүйлгүй олон нийтэд буруу ойлголт төрүүлээд байж болохгүй.

-Хууль зүйн сайд Х.Тэмүүжиний асуудлыг энэ долоо хоногт хэлэлцэнэ. Шударга ёс эвсэл ямар байр суурьтай байгаа вэ?

- Хууль зүйн сайд Х.Тэмүүжиний асуудлаар Хууль зүйн байнгын хороо хуралдаж тодорхой шийдвэр гаргасныг та бид мэдэж байгаа. Тиймээс байнгын хороон дээр гарсан тэр шийдвэрээрээ л цаашид үргэлжлэх байх.

-"Давхар дээл"-ийн хуулийн төсөлд нэгдсэн байр сууринд хүрсэн үү?

-Энэ асуудлаар дахин хэлэлцэх шаардлагатай гэж үзэж байгаа. Уул нь чуулганы хуралдаанаар 3 хоногийн завсарлага авахыг хүссэн ч их хурлын дарга зөвшөөрөөгүй. Ер нь давхар дээлийг дан болгох ёстой гэдэг дээр аль аль нам санал нэгтэй байгаа.Манай бүлгийн хувьд Монгол Улсын Засгийн газар тогтвортой үйл ажиллагаа явуулах ёстой гэж үзэж байна. Харин ажлаа хийж чадахгүй байгаа сайд нартай хариуцлага тооцох ёстой. Цаашлаад огцруулах хэрэгтэй. Ерөнхийлөгч ч гэсэн ингэж үзэж хуулийн төслийн хугацаатай холбоотой асуудлаар хориг тавина гэсэн.

-МАХН-МҮАН-ын АН-тай хийсэн гэрээний асуудлаар мэдээлэл өгнө үү, гэрээ ил болсонтой холбоотойгоор өөр хувилбар яригдах уу?

-Гэрээний хувьд яг одоогийн байдлаар ямар нэгэн шийдэлд хүрсэн зүйлгүй. Тодорхой хэмжээнд л яригдаж байгаа. Харин МАХН-МҮАН-ын хооронд байгуулсан есөн жилийн гэрээний хувьд зөрчигдсөн өөрчлөгдсөн зүйл байхгүй.