УИХ дахь бие даагчдын бүлгээс мэдээлэл хийлээ. Тус бүлэг өнөөдрийн хуралдаанаараа хоёр асуудлыг голлон хэлэлцсэн байна.

Хамгийн эхэнд Ц.Баярсайхан сайдыг огцруулах асуудлыг судалж үзэхээр болсон байна. Учир нь сүүлийн үед барилгын аюулгүй ажиллагаа алдагдсанаас болоод осол их гарч иргэд, амь нас эрүүл мэндээрээ хохирох болсон. Үүнд салбарын сайд нь хариуцлага хүлээх ёстой гэж тус бүлгээс үзэж байгаа аж. Тиймээс  нэг сарын хугацаанд дахин осол, эндэгдэл гарах юм бол Барилга хот байгуулалтын сайд Ц.Баярсайханыг огцруулах асуудлыг хөндөнө гэдгээ мэдэгдлээ. Салбарын сайд нь хариуцлага хүлээхгүй Мэргэжлийн хяналтын Ерөнхий газрын дарга руугаа буруугаа чихдэг байдал давтагдаж байна. Ер нь ямар нэгэн осол, эндэгдэл гарахад салбар хариуцсан яам бус зөвхөн Мэргэжлийн хяналтын байгууллага зэрэг газрууд буруутгагдаж байгаа нь шударга бус юм гэж Бие даагчдын бүлгийн дарга Ц.Даваасүрэн хэллээ. Тиймээс Бие даагчдын зөвлөл барилгын дүрэм, журам, стандартыг судалж үзэхээр болсон байна.

Мөн Газрын тухай хуулийг алдаа ихтэй, засах шаардлагатай хууль болсон хэмээн үзээд хуулийн төслийг санаачлагчид нь дахин боловсруулах шаардлагатай гэлээ. Тиймээс энэ асуудлаар тус бүлгийн гишүүн С.Ганбаатар УИХ-ын дарга З.Энхболдод захидал илгээжээ. Уг захидалд тус хуулийг эргэж харах шаардлагатай талаар санал бодлоо тусгасан байна. Газар өмчлөлийн асуудлаар дамжуулан хүний эрхийг зөрчих, баян, ядуугийн ялгааг ихэсгэх, улмаар тусгаар тогтнолд  заналхийлэх  хэмжээнд байгааг бие даагчдын зөвлөл онцоллоо.