Ойрын өдрүүдэд эдийн засгийг эрчимжүүлэх төлөвлөгөөг УИХ-аар хэлэлцээд тун зав муутай. Улс орныхоо эдийн засгийг 100 өдрийн дотор сэргээх гайхалтай энэ санаачилга дахиад өр тавихаас эхэлж байгаа нь олон хүний эгдүүцлийг хүргэв. Үүнд бухимдсан зарим нэг хүн “Наадах чинь эдийн засгийг эрчимжүүлэх биш, хямралыг эрчимжүүлэх хөтөлбөр болчихлоо” гэж хэлж байлаа. Ямартай ч эрх баригчид эдийн засагт ямар нэгэн юм болохгүй болж, нэг зүйл сэдэж хийх хэрэгтэй гэдэгтэй санал нийлж эхлэв бололтой. “Амьдрал сайхан байна, сайн юм бод, тансаг үнэтэй юм битгий хэрэглэ, тэгээд та нар доллар өсгөөд байна ш д” гэж иргэдээ зэмлэдэг сайд дарга нар маань эдийн засгийг эрчимжүүлэх тухай ярьж эхэлсэн нь сайшаалтай. Гэхдээ хямарсан эдийн засгийг сэргээх тухай яригдах болохоос эрчимжүүлнэ гэдэг нь эрүүл эдийн засагт болж буй процесс гэдэгтэй хэн хүнгүй санал нийлнэ. Гэтэл цаашид авах арга хэмжээнийхээ тухай тайлбар өгч, өнгөрсөн бүх үйл явдалд дүгнэлт хийж байгаа сайд Н.Батбаяр дахиад л ард иргэдээ мэхэлсэн, басамжилсан өнгө аястай ойлголт түгээж байгаа нь харамсалтай. 

Манай улс эдийн засгийн хөгжлийн яамтай болсон цагаасаа эхлээд эдийн засаг нь доройтож байна. Харин сайд Н.Батбаярын үзэж байгаагаар Монголын эдийн засаг сүүлийн хоёр жил сайн өсөлттэй байсан аж. Өндөр хөгжилтэй орнууд хүртэл үгүйрэн хоосрохын зовлонг эдэлж яаж ч чармайгаад эдийн засгаа өсгөж чадахгүй махаа идэж байхад Монголчууд эдийн засгийн өсөлтөөрөө эхний 10-т орж байна гэнэ. Дэлхийн банк, ОУВС бүх орны эдийн засгийн өсөлтийн таамгийг буулгачихаад Монголын эдийн засгийг л 12.5 хувиар  өснө гэж нэмсэн байна. Тэгэхээр “бид алнаа, ална” гээд явж байх ёстой юм байх. Гэтэл Азийн хөгжлийн банк Монгол Улсын эдийн засгийн өсөлт нэг оронтой тоонд орж 9.5 хувь болж буурна гэсэн таамаглал гаргасан бөгөөд үүний дараа дэлхийн банк, ОУВС ч Монголын эдийн засгийн өсөлт саарна гэсэн дүгнэлтийг хийх болсон билээ.  Сайд маань ард иргэдээ сонин, телевиз хардаггүй харанхуй бүдүүлэг хүмүүс гэж боддог бололтой. 

Ердөө долоон сарын өмнө долларын ханшийн өсөлт бол түр зуурынх буцаад бууна гэдэг зүйлийг ярьж явсан сайд маань өнөөдөр долларыг тогтвортой байлгана гэж хэлэх боллоо. Монгол Улсад гадаадын хөрөнгө оруулалт огцом буурч, уул уурхайн томоохон төслүүд зогсож, эрх баригчид нэгдмэл бус хэт үрэлгэн бодлого явуулсны гороор төгрөгийн ханш 30 хувиар уначихаад байгаа. Харин төгрөгийн ханш 30 хувиар унасан нь Америкчүүдийн буруу гэнэ. Тодруулбал АНУ-ын төв банк бодлогын хүүгээ чангаруулснаар долларын ханш өссөн гэдгийг бидэнд тайлбарлав. Үнэхээр холбооны нөөцийн банк хатуу бодлого явуулж байгаа нь үнэн л дээ. Гэхдээ төгрөгийн ханш 30 хувиар унахад энэ бодлого хэрэгжиж эхлээгүй байсныг бичиг үсэг хагас тайлагдсан хүмүүс бүгд мэднэ. Мөн АНУ-ын мөнгөний хатуу бодлого манай хоёр хөрш ОХУ, БНХАУ-ын эдийн засагт онц нөлөө үзүүлэхгүй байхад зөвхөн бидэнд л нөлөөллөө үзүүлээд байдаг нь туйлын хачирхалтай. Долларын ханшийг 1380 төгрөг барих боломж байсан ч УИХ өр тавих эрх өгөөгүй тул ийнхүү алдсан гээд хээвнэг ярьж яваа нөхөртэй ер нь ёс суртахуун хариуцлагын тухай яриад ч нэмэртэй юу? үгүй юу? 

Цаашлаад тансаг хэрэглээний ангилалд архи, тамхи орох болсныг дуулгасан. Улс орон хөгжихийн хэрээр тансаг хэрэглээ хүмүүст хүртээмжтэй энгийн зүйл болдог бол манайд энгийн байсан зүйлс тансаг ангилалд ордог жамтай болж. Өндөг, будааны араас архи, тамхи тансаг хэрэглээний ангилалд орох болсон ба Засгийн газар импортын тансаг хэрэглээг багасгах бодлогыг тууштай хэрэгжүүлсээр байгаа билээ.

            Энэ мэтээр эдийн засгийн хөгжлийн сайд Н.Батбаяр ард иргэдээ мэдээлэлгүй, мэдлэггүй бичиг үсэгт тайлагдаагүй гэж бодож явдаг мэт элдэв янзын итгэхэд бэрх зүйлийг ярьсаар л явна.

О.Цагариг