УИХ дахь АН-ын бүлэг өчигдөр 23.00 цаг хүртэл хуралдсан. Хуралдаанаар  Эдийн засгийг эрчимжүүлэх төсөл, "давхар дээл"-ийг тайлах асуудал болон Хууль зүйн сайд Х.Тэмүүжинг огцруулах талаар тус тус хэлэлцсэн байна.

Улс орны эдийн засгийн хүндрэлтэй үед  Засгийн газраас Эдийн засгийг эрчимжүүлэх төслийг УИХ-д өргөн барьсан. Энэ төсөл нь хаврын чуулганы хугацаанд хэрэгжиж дуусах ёстой учраас ирэх зургадугаар сарын 1-ний дотор  тогтоол хэрэгжих бүх хууль, хуулийн өөрчлөлтүүдийг УИХ батлах ёстой гэж АН-ын бүлгийн дарга Д.Эрдэнэбат онцоллоо. Эдийн засаг хямарч байгаад нөлөөлж байгаа гол хүчин зүйлүүдийг зөв харж, үүссэн нөхцөл байдлаас маш хурдан гарах ёстой гэж тус бүлгээс үзжээ.

Бүлгийн хуралдаанаар "давхар дээл" тайлах төслийн хэрэгжилтийг 2016 оны долдугаар сарын 1-ээс хэрэгжүүлэх нь зүйтэй гэдэг дээр АН-ын бүлгийн гишүүд нэг байр суурьтай болжээ. Өмнө нь АН-ын зарим гишүүд хуулийн хэрэгжилтийг 2014 оноос хэрэгжүүлэх ёстой гэдэг дээр саналаа өгч, байр сууриа илэрхийлээд байсан билээ. Энэ долоо хоногт хуралдах байнгын хороо болон чуулганы хуралдаан дээр АН нэгдсэн байр суурьтай санал хураалтад оролцоно гэж АН-ын бүлгийн дарга Д.Эрдэнэбат онцоллоо.

Мөн  Хууль зүйн сайд Х.Тэмүүжингийн асуудалд  АН-ын бүлгийн зүгээс энэ асуудалд нэгдсэн байр суурьтай болжээ. Тодруулбал Х.Тэмүүжин сайдыг огцруулахгүй гэдэг дээр санал нэгдсэн байна.   Энэ талаар Д.Эрдэнэбат "Энэ бол зөвхөн Ардчилсан намын асуудал биш. Нийгэмд хүлээгдэж байгаа хүлээлт, АН-ын гишүүдийн хүлээлт гэж ойлгож байгаа. АН энэ дөрвөн жил  шударга ёсыг тогтоохын тулд эрхзүйн орчноо өөрчилж, хууль хяналтын байгууллагыг өөрчлөнө гэсэн бол түүнийгээ дуусгах үүрэгтэй. АН-ыг, ардчилалыг төлөөлж, тэргүүн эгнээнд нь явж байгаа хүн бол Х.Тэмүүжин сайд мөн. Тиймээс  АН нэгдсэн байр сууринд очих ёстой гэдгийг АН-ын Гүйцэтгэх зөвлөл тогтоол өгсөн. Энэ тогтоолыг хэлэлцээд АН-аас Х.Тэмүүжин сайдыг огцруулахгүй байх, АН-аас эхлүүлсэн шинэчлийн ажлыг цааш үргэлжлүүлэх нь зүйтэй  гэсэн шийдвэр гаргасан" гэлээ.