Төрийн байгуулалтын байнгын хорооны хуралдаанаар өнөөдөр "давхар дээл"-ийг тайлах хуулийн төслийн эцсийн хэлэлцүүлгийг хийсэн юм. Энэ үеэр  УИХ-ын гишүүн С.Баярцогт "Хуулийн хэрэгжилтийг 2016 оноос эхлүүлэх" горимын саналыг гаргасан боловч санал хураалтад оролцсон 17 гишүүнээс 11 гишүүн дэмжсэн нь гуравны хоёрын дэмжлэг хүлээж чадсангүй.

Тус саналыг МАН-ын гурван гишүүнээс гадна АН-ын хоёр гишүүн эсэргүүцэж санал өгсөн нь тус нам дотор нилээн маргааныг дагууллаа. Тодруулбал, УИХ-ын гишүүн Р.Бурмаа, Ж.Батзандан нар намын байр сууриас сөрөг санал өгсөнд УИХ-ын гишүүн Р.Гончигдорж бухимдан “УИХ-ын гишүүн Р.Бурмаа, Ж.Батзандан хоёр гавьяа байгууллаа” гэж хэлээд авав. Учир нь хуралдаанд оролцсон 18 гишүүний 12 нь  дэмжиж саналаа өгсөн бол хуулийн төслийн хэрэгжих хугацааг 2016 он байхаар тусгаж болох байсан юм. Гэтэл ганцхан саналын дутуугаа тус хууль ирэх сарын долдугаар сарын 1-ээс эхлэн хэрэгжихээр болов. 

Мөн хуралдааны үеэр  гишүүд өөрсдийн байр суурийг илэрхийлсэн юм.

Тухайлбал Р.Бурмаа гишүүн "Энэ хууль 2014 оны долдугаар сараас эхлэн хэрэгжих ёстой. Би Ардчилалын төлөө 25 жил зүтгэхдээ энэ төрийг чадамжтай байлгахын төлөө ажиллаж ирсэн. Гэтэл өнөөдөр УИХ-ын дээд байгууллага болон гүйцэтгэх засаглал нь чадамжгүй болсон байна. Учир нь энэ бүхэн "давхар дээл"-тэй сайд нараас болж байна. Тэд төрийн ажлыг цалгардуулж байгаа. Ганцхан жишээ дурдахад "давхар дээл"-тэй сайд нарын УИХ-ын чуулганд суусан ирцийг хараад үз. Ирц үнэхээр муу байдаг. Үүнээс болж Монголын төрийн ажил цалгардаж байна. Гэтэл алдаа дутагдлыг нь хэлсэн ядарсан эмэгтэй гишүүнээ дарамталж, дээрэлхэж намаас хөөнө гэх мэтээр ярьж байна. Үнэхээр хэдэн он бэ гэж хэлмээр байна. Өнөөдөр төрийг тогтвортой байлгахын тулд УИХ нь өөрөө тогтвортой ажиллах ёстой. Бүх сайд "давхар дээл"-тэй болчих юм бол парламент утга учраа алдаж чадамжгүй болно. Засгийн газарт хяналт тавьж чадахаа болино. Өнөөдөр Засгийн газрын оруулж ирж байгаа хуулиуд хичнээн хуудиутай, зөрчилтэй байгаа билээ. Гэтэл УИХ-ын гишүүд кабинетын зарчим гэдэг үүднээс амаа үдүүлээд сууж байна. УИХ-ын гишүүнийхээ кнопийг дарж байхдаа амаа үдүүлсэн байдлаар л хандаж байгаа шүү дээ. Тиймээс Ерөнхийлөгч энэ хуулийн төслийг өргөн барьсан. Би Ерөнхийлөгчийн санаачилсан хуулийг дэмжиж байгаа. Байнгын хорооны өмнөх хурал дээр Засгийн газрын гишүүдийн 50 хувь нь "давхар дээл"-тэй байя гэдэг саналыг гаргасан. Энэ бол их эрүүл  санал. Энэ саналыг нь Д.Эрдэнэбат дарга буцааж татсан. Ийм зүйлээ тооцоолох ёстой. Өнөөдөр буцах газаргүй болчихоод хөөрхий нэг муу эмэгтэй гишүүнийг даралж, доромжилж бүлгээр дайрч байдгаа болих хэрэгтэй. Д.Эрдэнэбат өөрөө хариуцлагаа хүлээ. Өнөөдөг гарцгүй юм алга байна. Үнэндээ чиг үүргийн сайд нар нь үлдлээ гэхэд цаана нь долоон гишүүн листнээс сонгогдсон байна. Тэд нараас үлдэж болно. Тэглээ гээд Засгийн газарт өөрчлөлт орохгүй. долдугаар сарын 1-ээс өмнө гурвыг нь өөрчилчих. Үүний дараа дөрвийг нь өөрчлөөд явах байдлаар асуудлаа шийдэх боломжтой байсан" гэлээ.