А.Бакей бол УИХ дахь Төрийн байгуулалтын байнгын хорооны дарга. Харин түүнийг байнгын хорооны гишүүддээ ялгавартай хандаж, эмэгтэй гишүүдийг дарамталдаг талаар өнөөдөр УИХ-ын гишүүн О.Баасанхүү хэлэв. Тодруулбал, Төрийн байгуулалтын байнгын хорооны өнөөдрийн хуралдааны үеэр УИХ-ын гишүүн Р.Бурмаа намынхандаа дээрэлхүүлж, дарамтуулж байгаагаа хэвлэлийнхний өмнө илээр зарлаж орхив. Түүнийг гомдоллосон өнгө аястай үг хэлэх бүрт л Төрийн байгуулалтын байнгын хорооны дарга А.Бакей түүнд үг хэлэх хугацаа нь дууссаныг сануулж, ярьж буй зүйлээ дуусгахыг шаардаж эхэлсэн юм.

Түүнийн энэ үгийг сонссон О.Баасанхүү гишүүн "А.Бакей даргаа та үргэлж эмэгтэй гишүүдийг дээрэлхэж үгийг нь хэлүүлдэггүй. Энэ зангаа боль" гээд хэлээв авав. Харин А.Бакей дарга хариуд нь "Хууль зүйн байнгын хороонд харъяалалтай гишүүн энд орж ирээд дуугараад байх юм. О.Баасанхүү чи юу гээд байгаа юм бэ" гэж хэлэн маргалдаад амжсан.

Дашрамд дурдахад, өнөөдрийн хуралдаанаар Засгийн газрын гишүүн УИХ-ын гишүүнээр давхар ажиллаж болохгүй буюу "давхар дээл"-ийг дан болгох хуулийн төслийн эцсийн хэлэлцүүлгийг хийсэн юм.  Гишүүдийн маргааныг дагуулаад буй гол асуудал нь хуулийн хэрэгжилтийг энэ оны долдугаар сарын 1-ны өдрөөс эхлүүлэх үү эсвэл 2016 оны долдугаар сар уу гэдэг юм. АН-ын гишүүд тус хуулийг 2016 оны долдугаар сарын 1-ны өдрөөс эхлэн хэрэгжүүлье гэдэг саналыг гаргаад буй.

 Харин АН-аас Төрийн байгуулалтын байнгын хороонд харъяалагддаг хоёр гишүүн л намынхаа нэгдсэн байр сууриас өөр саналтай байгаа юм. Тодруулбал УИХ-ын гишүүн Р.Бурмаа, Ж.Батзандан нар намын бүлгийнхээ эсрэг саналыг өгснөөрөө АН дотор нилээн маргаан дагуулаад байна.

Т.Энхэлээ