МАН-ын гол хутгуурчин, авлигалын загалмайлсан эцэг гэгдэх Т.Бадамжунай Америкийг зорьсон талаар эх сурвалж мэдээллээ. Тэрбээр Америкт урт удаан хугацаанд амьдрахаар явж байгаа нь энэ юм байна.

Т.Бадамжунай бол цагтаа УИХ-ын гишүүнээс эхлээд Монгол төрийн сайдын албыг хүртэл хашиж явсан нэгэн. Нөгөөтэйгүүр түүнийг дээлээ нөмөрч “Ганц худаг"-т очвол зохилтой гишүүдийн нэг ч гэж хүмүүс ярьдаг. Түүнийг  авлигалын аалзны торыг уран нарийнаар татсан хүн гэдгийг нь намынх нь журам нэгт нөхөр Ж.Сүхбаатар олон нийтэд пал хийтэл мэдээлсэн.  Мөн намынхаа авлигачдын талаар бичиж буй номондоо түүнийг эхний хуудсанд онцолно гэдгээ ч дуулгаад авсан юм. Ер нь Т.Бадамжунайг авлигал авсаныг нь гэрчлэх олон хүн бий. Гэтэл тэрбээр одоог хүртэл сул чөлөөтэй амьдарч байна. Тодруулбал "Алтжин" компанийн захирал Г.Алтантай нэгэн цагт "Тоонот гэрт толгой холбож, тогоотой шөлөнд хошуу холбож явсан" С.Жамъянсүрэн хэвлэлийнхэнд хандаж экс эхнэрээ Ц.Нямдорж, Т.Бадамжунай нарт авлигын мөнгө өгдөг байсныг илчилсэн. Ганц энэ ч биш Т.Бадамжунай хотын ерөнхий менежерээр ажиллаж байхдаа газрын хууль бус наймааг жинхэнэ утгаар нь мафийн зохион байгуулалтад оруулж, төрөөс төрсөн тэрбумтнуудын тэргүүнд дүүхэлзэх болгосон гэлцдэг.  Мөн Хүнс, хөдөө аж ахуй хөнгөн үйлдвэрийн сайд байхдаа Жижиг, дунд үйлдвэрийг дэмжих сангийн 500 сая төгрөгийг зориулалтын дагуу ашиглаагүй, тодорхой хэсгийг хувьдаа завшсан байж болзошгүй гэж үзэн, Авлигатай тэмцэх газраас шалгасан нь түүний хувьд хууль, шүүхийн хаалга татсан анхны тохиолдол нь байж.

Гэвч Т.Бадамжунай ямар ч хэргээс сугарч чадсан юм.

Түүнийг "Хадгаламж" банкны ахлах нягтлан бодогч Ц.Чимэдцэрэнгийн мөнгөөр Солонгосын казинод тоглосон хэргээр шалгах гэсэн боловч УИХ-ын гишүүний халдашгүй бүрэн эрх нэрийн дор олонтоо мултарч чадаж байжээ. Хууль хяналтынхан төдийгүй МАН-ын лидерүүд өөрсдөө Т.Бадамжунайг яаж ч чаддагүй нь бас хачирхалтай. Ер нь Т.Бадамжунайг  цагтаа Ерөнхийлөгч, Ерөнхий сайд, УИХ-ын эрхэм 76, Авлигатай тэмцэх газар, Улсын ерөнхий прокурор, хууль хяналтынхан гээд ер хэн ч дангаараа дийлэхгүй байсан гэлцдэг билээ. 

Энэ мэт хийсэн хэргээрээ хол гайхагдах Т.Бадамжунай Монголыг орхиж хэсэгтээ л Америкт амьдрахаар явжээ. 2000 оны сонгуулийн дараа АН-ынхан бүгд Америкийг зорьж байсны адилаар 2012 оны сонгуулийн дараа МАН-ынхан эрх чөлөөний орон руу цувцгаах боллоо. Үүний үргэлжлэл нь Т.Бадамжунай болж байна.