Давхар дээлийг тайлах асуудал улстөрий халуун сэдэв болж эрх барьж байгаа АН хамтарч байгаа “шударга ёс” эвслийнхэний дотор багагүй зөрчлийг үүсгэлээ. Хуулийг 2014 оны долдугаар сарын 01-ний өдрөөс хэрэгжүүлэхээр УИХ-д олонхи нь санал өгсний дараа Н.Алтанхуягийн Засгийн газрын хувь заяа бүрхэг боллоо гэж олон хүн дүгнэсэн. Ерөнхийлөгч Ц.Элбэгдорж  “намайг байхгүй хойгуур асуудлаа шийд” гэж хэлчихээд Япон орныг зорьсон гэсэн яриа дээр дооргүй хөвөрсөөр Засгийн газрыг дор бүрнээ огцруулж, шинээр сайд томилж бүр МАНАН байгуулаад хүртэл амжсан. Харин Ерөнхийлөгч эргэн ирж хүмүүсийн эргэлзээг арилгаснаар бужигнаад байсан АН-ынхан хоорондоо хэл амаа ололцож эхлэв бололтой. Хуулийн хэрэгжих хугацааг наашлуулбал хориг тавина гэж тэрээр байр сууриа дахин илэрхийлсэн. Ерөнхийлөгчийн хоригийг гишүүдийн гуравны нэг нь дэмжихэд л хангалттай. Хагарлаа, хальтарлаа гэхэд АН-ын 34, Шударга ёс эвслийн 11, ИЗН-ын 2 гишүүнээс 26 нь Ерөнхийлөгчийг дэмжих нь гарцаагүй. Тэгэхээр Ерөнхийлөгчийн хориг энэ Засгийн газар цаашлаад сайдын албаар гол зогоож байгаа “Шударга ёс” бүлгийнхэнд аврал гэсэн үг. Ерөнхийлөгч харин хэд хэдэн нөхцөлтэйгээр авралын зарлигаа буулгана гэдгээ тэдэнд сануулж, хүсэлтийг ёсчлон бүтээхээр АН-ынхан бөхөлзөн гүйх боллоо.  

    Нэн түрүүнд хууль зүйн сайд Х.Тэмүүжинг авч үлд гэсэн лүндэнг тэрээр буулгав. “Би хуулийн шинэчлэлээс ухрахгүй, Х.Тэмүүжин бол энэ Засгаас хамгийн түрүүнд явуулах сайд биш. Х.Тэмүүжин бол үнэт зүйлтэй залуу хүн” гэж хэлснээр Х.Тэмүүжинг аврах ажиллагааг АН-ынхан яаравчлан эхлүүлэв.  Өмнө нь Х.Тэмүүжингийн асуудлаар нэгдсэн байр сууринд хүрэхгүй гишүүд өөрсдийнхөө итгэл үнэмшлээр саналаа өгнө гээд тулааны давцанд илдгүй гаргачихсан. Түүнийг МоАХ болон Шонхор фракцынхан зайлуулахыг хамгийн ихээр тэчьяадан хүсч хууль зүйн байнгын хорооны хурлаар огцруулах нь зүйтэй гэсэн дүгнэлт гаргаад байсан. Хууль зүйн байнгын хороогоор хүзүүн дээр нь хутга тулгаад байсан тэд арга буюу Х.Тэмүүжинд илд бамбай бариулж, хоолойд нь тулгасан хутгаа хуйнд нь буцаалаа. Ийнхүү АН-ын бүлгийн дарга Б.Эрдэнэбатын хэлсэнчлэн “Хуулийн салбарын шинэчлэл Х.Тэмүүжинтэй хамт үргэлжлэх” болж байна.

Ерөнхийлөгчийн удаах лүндэн бол “Ажлаа хийдэггүй сайд нарыг огцруул” гэсэн байв. Тэр дундаа эдийн засгийн хөгжлийн сайд Н.Батбаярыг тун тодорхой хэлж “үнэхээр тэвчээр барагдаж байна” гэдэг үгээр лүндэндээ хүч нэмлээ. Хэд хэдэн сайд нарыг өргөдлөө өг гэж хэлсэн ч нөгөө хэд нь чихгүй толгойлоод таваргасаар өдийг хүрсэн гэдгээ “пал” хийтэл олон нийтэд зарласан. Ерөнхийлөгчийн хүсэлтийг талаар болгож АН 2, МАХН 2 сайдаа “золигт гаргах” тохироонд хүрсэн гэх. АН-ын зүгээс “улстөрийн тахилгад” Н.Батбаяр, Д.Ганхуяг нарыг “МАХН”-аас Н.Удвал, Ч.Улаан нарыг галын бурхандаа өргөх хувилбарыг лүндэнд тааруулан зуржээ. Тэднийг огцруулах асуудлыг тун удахгүй УИХ-д өргөн мэдүүлнэ гэх яриа саарал ордноор хэсүүчилж байна. Тэгвэл эдгээр сайд нараас гадна Ц.Баярсайхан сайдыг “намч бус” бичгээ хулгайд алдсных нь төлөө явуулах ёстой гэсэн байр суурийг олон хүн илэрхийлж, бие даагчдаар хатгуулж эхэлсэн гэдгийг эх сурвалжууд онцолж байна.

    Хэрэггүй яамаа татан буулгах лүндэнд тохируулж эдийн засгийн хөгжлийн яамыг татан буулгах нь бараг тодорхой болжээ. Эдийн засгийн хөгжлийн яам байгуулагдаж эхэлсэн өдрөөсөө л Монголын эдийн засаг уруудаж эхэлсэн. Сангийн яамны зарим чиг үүргийг хувааж, Ерөнхий сайдын эдийн засгийн санаачлага, нэгдмэл байдлыг алдагдуулсан ийм яам бий болсноор хөгжиж дэвшсэн биш, хөшиж гандсан зүйл нь дэндүү их болсон гэдэгтэй дээр дооргүй санал нийлсэн гэнэ. Дотроосоо нэгэнт зайдчуулсан ийм Засгийн газар бүтэн арьсаа хамгаалаад бүрэн эрхээ дуусгаж чаддаггүй гэдгийг улстөрийн түүх гэрчилнэ. Нэгэнт үүссэн ан цаваараа агаар салхи оруулж, сэлгэний тамирчдаасаа хэдийг нь талбайд гаргахгүйгээр Н.Алтанхуягийн баг цаашаа явах аргагүй. Ажлаа хийдэггүй зарим сайд нарыг огцруулах, бүтэц орон тоогоо цомхтгох нь нийгмийн захиалга болчихоод байгаа энэ цаг үед үүнийг хэлбэрийн төдий ч болтугай ёсчлохгүй бол болохгүй. Тиймээс нэн түрүүнд гавьяанаас илүү давсан гай таригч эдийн засгийн хөгжлийн яамыг татан буулгаж, хөгжлийн хороо, сангийн яам гэсэн хуучин бүтэц дээр нь аваачих нь зүйтэй гэж тэд үзжээ. Гэтэл нөгөө талаас эдийн засгийн хөгжлийн яамыг хэрэггүй гэж үзэж байгаа юм бол соёл спорт, аялал жуулчлалын яам ямар хэрэгтэй юм бэ? батаарын яам гэгдэх болсон энэ газрыг ч бас татан буулгах хэрэгтэй гэсэн шүүмжлэл өрнөж Ц.Оюунгэрэл ч ажлаа муу хийдэг огцрох ёстой гэсэн байр суурийг зарим нэг нь илэрхийлсэн гэнэ. Үүнд эгдүүцсэн Ц.Оюунгэрэл ч “ажлаа авбал ав” гэсэн хатуухан гомдлын үгийг нөхөддөө дайсан гэх. Ойрын өдрүүдэд улстөрийн хүрээнд шинээр газрын зураг ажиллагаа ийнхүү эрчимтэй өрнөж байна.