Хууль зүйн сайд Х.Тэмүүжинг огцруулах асуудлыг маргааш УИХ-ын нэгдсэн чуулганаар эцэслэн хэлэлцэнэ. Үүнтэй холбогдуулан УИХ дахь МАН-ын бүлгийн дарга  С.Бямбацогтоос зарим зүйлийг тодрууллаа.

-Х.Тэмүүжин сайдыг огцруулах асуудлыг маргааш чуулганы хуралдаанаар хэлэлцэнэ. МАН-ын бүлэг уг асуудалд ямар байр суурьтай байгаа вэ?

-Манай намын бүлэг энэ асуудалд нэлээд нухацтай хандаж байгаа. Х.Тэмүүжинтэй холбоотой нууцын зэрэглэлтэй материал УИХ-ын чуулганд орж ирсэн. Тус материалтай УИХ-ын гишүүд бүгд танилцсан байгаа. Үүнд манай бүлэг байр сууриа нэгтгэж хариуцлага тооцох ёстой гэж үзсэн.

-2007 онд Л.Болд, Х.Тэмүүжин нар Америк улстай худалдааны хөрөнгө оруулалтын нууц гэрээ хийсэн байдаг юм байна. Энэ гэрээ нь үндсэн хуулийг зөрчсөн бөгөөд Монголын аюулгүй байдалд нөлөөлж байна гэх зүйл яригдаж эхэллээ. Энэ талаар мэдээлэл байна уу?

- Худалдааны ил тод байдлыг хангах гэрээ нь үндэсний аюулгүй байдлыг зөрчсөн байна гэдэг асуудал гарсан. Үүнд ажлын хэсэг байгуулан судалж  байна. Засгийн газрын гишүүд хариуцлаггүй хандсан байж болзошгүй зүйлүүд илэрч байгаа. Гэхдээ эцсийн дүгнэлт гараагүй байна. О.Баасанхүү гишүүний үндэслэлээс гадна нууцын зэрэглэлтэй асуудлууд байгаа. Үүнийг судалж байна.