АН-ын гишүүдийн дотоод зөрчил туйлдаа хүрч байна. Үүний нэг илрэл нь "Төмөр замын шинэ шугам барих тухай" УИХ-ын тогтоолын төсөл болов. Уг тогтоолын төсөл сүүлийн нэг жилийн турш АН-ын дотор далд хэрүүлийн алим тарьсан байна. Эцэст нь уг тогтоолын төслийг Эдийн засгийн хөгжлийн сайд Н.Батбаяр өргөн барьсан нь Х.Баттулга сайдын уур бухимдлын хаазыг дээд цэгт нь хүргэсэн гэж эх сурвалж мэдээлэв.

    Учир нь Монгол Улсад Зам тээврийн сайд гэж бий. Гэтэл "Төмөр замын шинэ шугам барих тухай" УИХ-ын тогтоолын төслийг салбарын сайдаар нь өргөн бариулсангүй. Эдийн Засгийн хөгжлийн сайд нь өргөн барьчихав. Өөр нэг хачирхалтай зүйл анхаарал татав. УИХ-ын тогтоолын төслийн дагалдах бичиг баримтад Эдийн засгийн хөгжлийн сайд Н.Батбаяр, Хууль зүйн сайд Х.Тэмүүжин хоёр гарын үсэг зурахаар бэлтгэжээ. Өөрөөр хэлбэл Зам тээврийн сайдыг ойртуулсангүй. Тийм сайд байдгийг мартсан бололтой. Уг нь ямараар ч бодсон салбарын сайд нь гарын үсэг зурах ёстой л доо.

    Энэ үйл явдал МоАХ болон Х.Баттулгын бүлэглэлийн ямар нэгэн чухал бодлогод оролцуулахгүй гэж АН-ын өөр нэг хэсэг нь үзсэн бололтой. Тийм байлаа ч гэсэн салбарын сайдыг ингэж үл тоож болохгүй шүү дээ гэж учир мэдэх хүмүүс халаглаж байна. Өөр нэг хэсэг нь Монгол Улсад засаглалын хямрал яаж өндрөө авсныг илтгэж байна хэмээн үзэх болов. Нэг салбарынх нь сайдын өмнөөс өөр сайдууд нь УИХ-д бодлого боловсруулж өргөн бариад байвал энэ нь эцэстээ асар том дуулианыг дагуулах гэнэ. Удахгүй мал аж ахуйн талаар баримтлах бодлогыг Барилга, хот байгуулалтын сайд нь өргөн бариад зогсож байхад гайхах зүйлгүй гэж зүйрлэв.

    Зам тээврийн сайд А.Гансүхийг оролцуулалгүй өргөн барьсан "Төмөр замын шинэ шугам барих тухай" УИХ-ын тогтоолын төсөлд юу тусгагдсан бэ? гэдгийг эргэцүүлж үзье.

    Олон жил Төмөр замын царигийн төлөөх тулалдааныг эрчимтэй өрнүүлсэн Х.Баттулга сайдын оролцоогүй гэж хэлж болохоор өргөн барьсан төсөлд Таван толгой–Гашуунсухайт, Сайншанд–Замын-Үүд, Хөөт –Бичигт чиглэлийн төмөр замын шинэ шугамыг 1435 мм-ийн буюу нарийн царигтайгаар барихаар оруулж иржээ.

    Харин Могойн гол–Эрдэнэт, Таван толгой–Сайншанд–Баруун-Урт–Хөөт–Чойбалсан, Хөөт–Нөмрөг чиглэлийн төмөр замын шинэ шугамыг 1520 мм-ийн буюу өргөн царигтайгаар барихаар Улсын Их Хурлын тогтоолын төсөл боловсруулав. Удахгүй эдгээр асуудлыг хэлэлцэх үеэр урьд цагийн маргаан эрчимтэй өрнөх нь гарцаагүй болов.

    Эх сурвалжийн мэдээлж байгаагаар бол Зам тээврийн сайд А.Гансүх АН-ынхаа төмөр замын талаарх УИХ-ын тогтоолын төсөлтэй санал нэгдээгүй байна. Өөр нэгэн эх сурвалжийн мэдээлж байгаагаар бол А.Гансүх сайдыг энэ бодлогыг боловсруулахдаа оролцуулаагүй байна. Мөн Зам тээврийн яамны төрийн нарийн бичгийн дарга Б.Батзаяа гэх хамгаалагч залууг ч бас энэхүү бодлогодоо оролцуулаагүй аж. Өөрөөр хэлбэл төмөр замын талаарх энэхүү бодлогод салбарын яамдын тэргүүнүүдийг үл тоож гадна үлдээжээ.

    Өөр нэгэн сонирхолтой өнцөг бий. Тэр нь одоогоос хэд хоногийн өмнө Ерөнхий сайд Н.Алтанхуяг, Сайд Х.Баттулга хоёрын уулзалт өглөөний найман цагаас үдийн хоёр хүртэл бүтэн 6 цаг хэнийг ч оруулахгүйгээр үргэлжилсэн гэж хэвлэлүүд шуугисан. Уг уулзалтын хийгээд ойлголцолын гол цөм нь "Төмөр замын шинэ шугам барих тухай" асуудал байж. Ингэж олон цаг уулзалдаад АН-ын хоёр лидер ойлголцолд хүрэлгүй хоёр тийш болсон байна. Тэгээд л Ерөнхий сайд Н.Алтанхуяг сайд Х.Баттулгынхныг оролцуулалгүй бодлогоо явуулахаар зүтгэж эхэлжээ.